U Vindzarskim zamku Miełanija Tramp była absalutna niepranikalnaj. A paśla pieraapranułasia — i stvaryła procilehłaje ŭražańnie FOTY
Styl Miełanii Tramp — heta mova, jakuju časta ciažka rasšyfravać. Jaje vobrazy byvajuć to strymanymi da niepranikalnaści, to pravakacyjna jarkimi. Hetuju dvaistaść pieršaja łedzi ZŠA ŭ poŭnaj miery prademanstravała padčas dziaržaŭnaha vizitu ŭ Vialikabrytaniju.
Styl pieršych łedzi zaŭsiody znachodzicca pad pilnaj uvahaj presy, ale vobrazy Miełanii Tramp — heta asobnaja historyja, jakaja rehularna prymušaje suśvietnyja ŚMI sprabavać razhadać jaje modnyja rebusy.
Sproba stać niabačnaj
Jak piša CNN, u sieradu, 17 vieraśnia padčas dzionnaj sustrečy z karaleŭskaj siamjoj u Vindzarskim zamku Miełanija znoŭ źviarnułasia da svajho firmovaha pryjomu — kapieluša ź vielizarnymi palami. Hety hałaŭny ŭbor ciomna-ślivovaha koleru byŭ nastolki masiŭnym, što całkam chavaŭ jaje tvar u cieni, robiačy lubyja emocyi niečytelnymi.
Jaje strohi ciomna-šery kaścium ad Dior u vajskovym styli tolki ŭzmacniaŭ uražańnie zakrytaści i surovaści. Asabliva heta było zaŭvažna na fonie karalevy Kamiły, čyj lohki kapialušyk prapuskaŭ soniečnaje śviatło.
Ubor Miełanii, jak piša CNN, stvaraŭ vyrazny sihnał: žadańnie zastacca ŭbaku, paźbiehnuć lišniaj uvahi. Uličvajučy, što nadvorje nie patrabavała abarony ad sonca, hety vybar vyhladaŭ jak śviadomaja zajava.
Heta nie pieršy vypadak, kali pieršaja łedzi vykarystoŭvaje aksiesuary dla dystancyjavańnia. Možna zhadać jaje inaŭhuracyjny kapialuš, jaki fizična nie dazvoliŭ mužu jaje pacałavać. Takim čynam dzionny vobraz u Vindzary praciahvaŭ liniju strymanaści i niežadańnia być navidavoku, što było charakterna dla jaje pavodzin padčas druhoha prezidenckaha terminu muža.
Maksimalnaja ŭvaha
Adnak viečaram Miełanija kardynalna źmianiła taktyku. Kali dla dzionnaha vychadu jana abrała maksimalnuju zakrytaść, to dla dziaržaŭnaha bankietu — ubor, jaki harantavaŭ joj uvahu ŭsich.
Zrazumieła, kapialuš źnik, bo adzinyja dapuščalnyja hałaŭnyja ŭbory na dziaržaŭnym bankiecie — heta karony i dyjademy, jakija nosiać starejšyja členy karaleŭskaj siamji. Ale pieršaja łedzi nie prosta ŭpieršyniu za dzień pakazała svoj tvar, jana zrabiła aktyŭnuju sprobu vyłučycca ŭ sukiency koleru dźmuchaŭca ad Carolina Herrera.
Dla mierapryjemstva z najstražejšym pratakołam, jak adznačaje vydańnie, jaje vybar byŭ davoli ryzykoŭnym. Choć sukienka i mieła doŭhija rukavy i daŭžyniu da padłohi, jana całkam ahalała plečy — detal, na jakuju advažylisia adzinki. Dapaŭniaŭ vobraz kantrasny pastelna-ružovy pojas z bujnoj pražkaj, jaki taksama pryciahvaŭ uvahu.
Stylisty nazvali hety ŭbor «davoli śmiełym», što ŭ śviecie vysokaj mody možna ličyć namiokam na parušeńnie miežaŭ.
Što chavajecca za vybaram adzieńnia?
Zdajecca, Miełanija Tramp mienš za svaich papiarednic kłapocicca pra toje, kab jaje adzieńnie niesła niejki simvaličny pasył. Jana addaje pieravahu pravieranym jeŭrapiejskim brendam kłasa luks, a nie dyzajnieram, čyj vybar moh by niešta skazać pra jaje pazicyju.
Tym nie mienš bazavyja praviły dypłamatyčnaha etykietu jana ŭsio ž vykonvaje. Prybyŭšy ŭ Łondan, jana zrabiła revierans u bok brytanskaj mody, abraŭšy kłasičny trenč ad Burberry. Choć vybar i byŭ pradkazalnym, jon staŭ darečnym znakam pavahi da prymajučaha boku.
Takim čynam, styl Miełanii Tramp zastajecca supiarečlivym: jana to buduje ścianu pamiž saboj i śvietam, to razburaje jaje epatažnym uboram, pakidajučy astatnim tolki hadać ab jaje sapraŭdnych matyvach.
Kamientary
Voś cikava, jana takoje užyvaje u sumiestnam žyćci?))