Byłyja supracoŭniki minskaha ofisa Vizor Games, jaki z krasavika 2024 hoda pracuje pad nazvaj «HiejmTek», raskazali pra chvalu skaračeńniaŭ 2D– i 3D-mastakoŭ. Pavodle ich słoŭ, było zvolniena ad 15-20+ čałaviek, kiraŭnictva tłumačyć zvalnieńni ŭpłyvam ŠI.
U kampanii Devby.io adkazali, što zvolnili «niekalki mastakoŭ».
«Nie hladzieli ni na staž pracy ŭ kampanii, ni na pradukcyjnaść»
Vieranika (imia źmieniena) ličyć, što jaje zvalnieńnie stała častkaj bolš šyrokaha pracesu:
— Z kanca žniŭnia da siaredziny vieraśnia ŭ biełaruskaj studyi Vizor Games prajšła chvala skaračeńniaŭ. Pad udar trapili pieravažna śpiecyjalisty z art-adździeła — 2D– i 3D-mastaki. Pra zvalnieńni ŭ inšych adździełach u mianie infarmacyi niama. Ja viedaju tolki pra skaračeńni ŭ art-adździele, na ŭsich prajektach Vizor.
Ja taksama trapiła pad skaračeńnie. Pry zvalnieńniach nie hladzieli ni na staž pracy ŭ kampanii, ni na pradukcyjnaść. Zvalnieńni mastakoŭ, jakija prachodzili z kanca žniŭnia da pačatku vieraśnia, nie byli źviazany z zakančeńniami pracoŭnych damovaŭ. Zvalniali ludziej biez papiaredniaha paviedamleńnia, infarmacyju jany atrymlivali tolki ŭ apošni dzień pracy. U jakaści kampiensacyi vypłačvali adzin zarobak napierad.
Usiaho zvolnili dakładna bolš za 20 čałaviek, ale nakolki bolš — mnie, na žal, nie viadoma.
Na asobnych prajektach kampanii pad skaračeńnie trapiła da pałovy kamandy mastakoŭ, jakija pracavali nad imi. Akramia taho, častka supracoŭnikaŭ, jakija nie trapili ŭ śpisy zvolnienych, pryniali rašeńnie pakinuć kampaniju samastojna.
Pry zvalnieńni mieniedžar paviedamiŭ mnie, što Vizor pierachodzić na «novyja realii z ŠI». U suviazi z hetym adbyvajucca ciapierašnija skaračeńni. I, mahčyma, buduć dadatkovyja skaračeńni jašče praz paŭhoda, paśla analizu vynikaŭ ciapierašnich.
Mnohija supracoŭniki byli niezadavoleny takim tłumačeńniem, bo praktyčna ŭsie skaročanyja aktyŭna vykarystoŭvali ŠI ŭ pracy. Pry mnie zvolnili samaha pradukcyjnaha i daśviedčanaha śpiecyjalista na prajekcie, jaki taksama karystaŭsia ŠI. U razmovach z kalehami-mastakami my zrazumieli, što amal usie jany pracavali jak IP ź inšych krain. Vierahodna, mienavita tamu Vizor było praściej zvolnić hetych supracoŭnikaŭ «adnym dniom». Pad skaračeńnie trapiła i supracoŭnica, jakaja niadaŭna vyjšła z dekreta.
Adznaču, što prablemy ŭ Vizor pačalisia jašče čatyry hady tamu. U nas prybrali amal usie bieniefity, padarunki na Novy hod. Pavyšeńnie zarobkaŭ było zamarožanaje. Pamiataju časy, kali supracoŭniki źbiralisia na karparatyvy, i pry hetym napoi i picy byli za košt supracoŭnikaŭ. Heta padavałasia tak, što kampanija «pa-čałaviečy» prybiraje bieniefity, zatoje ludziej nie zvalniaje. Paźniej situacyja krychu palepšyłasia, nam viarnuli karparatyvy i padarunki na dni naradžeńnia. Kampanija navat śćviardžała, što apłačvaje (poŭnaściu abo častkova) profilnyja kursy śpiecyjalistam. Ale pry hetym ni mnie, ni maim kaleham tak i nie ŭdałosia ŭzhadnić choć by častkovuju źnižku na kursy, jakija byli profilnymi i traplali pad usie ŭmovy kampiensacyi.
Vizor zvalniaŭ ludziej i raniej: pry zakryćci adnaho z prajektaŭ supracoŭnikaŭ, jakija pracavali nad im, skaracili. Ale zastavałasia nadzieja, što da nas heta nie dojdzie.
«Nibyta biźniesu nie patrabujecca stolki mastakoŭ»
Pa słovach Kaciaryny (imia źmieniena) zvalnieńni ŭ biełaruskim ofisie Vizor Games zakranuli niekalki prajektaŭ:
— Pieršapačatkova skaračeńni prachodzili tolki na dvuch prajektach i tolki siarod 2D– i 3D-mastakoŭ, dyzajnieraŭ i mastakoŭ markietynhu. Za paru miesiacaŭ da hetaha stała viadoma, što jašče adzin prajekt (treci, jaki nie adnosicca da pieršych dvuch) zakryvajecca, i ludziej ź jaho raźmierkavali pa inšych prajektach. Adnak raźmierkavali nie ŭsich, i ŭ dalejšym reštki z art-adździełaŭ treciaha prajekta, jakich nie paśpieli raźmierkavać, zvolnili taksama.
Da taho, jak heta ŭsio pačałosia, usim kazali, što nikoha zvalniać nie buduć i «ŭsich vyratujuć». Tamu dla mnohich ludziej zvalnieńni stali niečakanaściu. Niekatoryja supracoŭniki prapracavali ŭ kampanii pa 6‑-10 hadoŭ.
Akramia taho, zvalnieńni adbyvalisia ŭ adzin dzień, kab čutki nie razpaŭzalisia i nie ŭzdymałasia panika (zrešty, hetaha paźbiehnuć nie ŭdałosia). Čałaviek moh daviedacca, što zvolnieny, vyjšaŭšy na pracu paśla adpačynku, pry tym, što da adpačynku jaho pracu chvalili.
Paśla taho, jak zvolnili 19‑20 čałaviek (2D– i 3D-mastakoŭ, a taksama dvuch dyzajnieraŭ i adnaho art-dyrektara), niekatoryja ludzi pačali zvalniacca sami.
Paźniej kiraŭnictva abhruntavała zvalnieńni ŭkaranieńniem u pracesy ŠI: nibyta biźniesu nie patrabujecca stolki mastakoŭ. Ale, jak pakazała praktyka, hatovych rašeńniaŭ i pajpłajnaŭ pa aptymizacyi pracesaŭ z ŠI nie było — naładžvańnie pierakłali na mastakoŭ, jakija zastalisia.
Dumaju, skaračeńni vialisia pa takoj schiemie: jość fłahmanski prajekt i jość «prajekty nadziei», i jany pakul «u domiku». Skaračeńniami prajšlisia mienavita pa samych stabilnych i pradkazalnych prajektach, heta značyć skarystalisia chutkim sposabam dastać dadatkovaje finansavańnie dla bolš značnych napramkaŭ. Adnak nie ŭličyli ryzyki: mnohim nie spadabałasia takoje staŭleńnie, i chtości, navat nie trapiŭšy pad skaračeńnie, vyrašyŭ syści sam.
Ludziam vypłacili kampiensacyi, pamier jakich adroźnivaŭsia ŭ zaležnaści ad taho, ci byŭ čałaviek u štacie abo pracavaŭ jak IP na addalency. Dla tych, chto pracavaŭ u Biełarusi, kampiensacyja vyhladała jak zarobak za adpracavanyja dni biahučaha miesiaca plus dva zarobki. Tym, chto pracavaŭ ź inšych rehijonaŭ, dapłačvali adzin zarobak, albo ŭmovy zvalnieńnia ahavorvalisia ŭ indyvidualnym paradku.
Kamientaryj kiraŭnika
Dyrektar i suzasnavalnik Vizor Games Siarhiej Bruj adkazaŭ na pytańni devby łakanična: u biełaruskim ofisie «zvolnili niekalki mastakoŭ u kampanii z 700 čałaviek».
Miarkujučy pa ŭsim, havorka tut idzie pra ahulnuju kolkaść supracoŭnikaŭ Vizor Games va ŭsich jurysdykcyjach. U krasaviku 2024 hoda ahulny štat kampanii aceńvaŭsia ŭ bolš jak 600 supracoŭnikaŭ, ź jakich kala pałovy pracavali ŭ Minsku.
Vizor Games zasnavana ŭ Minsku 18 hadoŭ tamu. Kampanija śpiecyjalizujecca na raspracoŭcy šmatkarystalnickich hulniaŭ. Siarod samych viadomych — kazualnyja błokbastary «Zombi-fierma», «Madžonh: Pošuk skarbaŭ», i «Kłandajk: zhublenaja ekśpiedycyja». U 2019 hodzie ŭ kampaniju inviestavaŭ adzin z najbujniejšych suśvietnych mabilnych raspracoŭščykaŭ Playrix. Hałaŭny ofis kampanii znachodzicca na Kipry.
Kamientary