Jak tak vyjšła, što mahiloŭski mańjak-lifcior, jaki zabiŭ vosiem dziaŭčat, spyniŭsia paśla 1999 hoda?
Śledčyja raskryli adnu z samych kryvavych historyj sučasnaj Biełarusi. Z 1996 pa 1999 hod u Mahiloŭskaj, Viciebskaj i Minskaj abłaściach adbyłasia sieryja zabojstvaŭ i zhvałtavańniaŭ dziaŭčat i maładych žančyn va ŭzroście ad 12 da 20 hadoŭ. Ale paśla 1999 hoda mańjak spyniŭsia. MUS dało viersiju, čamu tak adbyłosia.
U 1999 hodzie padazravany traplaŭ u pole zroku pravaachoŭnych orhanaŭ i praz heta spałochaŭsia, raspavioŭ načalnik Hałoŭnaha ŭpraŭleńnia kryminalnaha vyšuku kryminalnaj milicyi MUS Alaksandr Kapišaŭ.
«Paśla słužby ŭ vojsku jon byŭ pracaŭładkavany na adnym z pradpryjemstvaŭ Mahilova. Dadzienaja praca davała jamu mahčymaść pierasoŭvacca ŭ zručny čas na čyhunačnym transparcie.
U 1999 hodzie hety mužčyna traplaŭ u pole zroku pravaachoŭnych orhanaŭ i praz heta spałochaŭsia. Hety čałaviek pa natury bajaźliviec.
U dalejšym jon žyŭ u svaim pryvatnym domie, pracavaŭ na pradpryjemstvie, dzie ŭ jaho nie było nijakich kanfliktaŭ. Jon vioŭ adasobleny ład žyćcia, imknučysia nie traplać nijakim čynam u pole zroku pravaachoŭnych orhanaŭ. Siamji ŭ jaho nikoli nie było», — raspavioŭ Kapišaŭ.
Jon taksama dadaŭ, što harady, u jakich adbylisia napady, raźmiaščalisia na skryžavańni niekalkich čyhunačnych puciej i napramkaŭ: «Mahiloŭ — Orša — Viciebsk» i «Orša — Minsk». Heta dało padstavy dla adnoj ź viersij: złačynstvy mahli ździajśniacca pracaŭnikom čyhunki. Ale dakładna pradpryjemstva, dzie pracavaŭ zatrymany 53‑hadovy mahiloviec, nie nazyvajecca.
Jaho achviary byli žorstka zabitymi i zhvałtavanymi ŭ padjezdach, liftach, na leśvičnych placoŭkach i dachach šmatpaviarchovikaŭ.
Usiaho dakazana vosiem zabojstvaŭ, dva zamachi na zabojstva, zhvałtavańni. Złačyncu šukali 30 hadoŭ.
Sudovaja seksałoha-psichołaha-psichijatryčnaja ekśpiertyza pakazała najaŭnaść u mužčyny psichičnaha razładu. U toj ža čas ekśpierty pryjšli da vysnovy, što čałaviek byŭ pry śviadomaści ŭ momant złačynstvaŭ.
Ciapier čytajuć
«Ja asasin, bł*!» Ekśpiert-juryst z STB nieadekvatna pavodziŭ siabie na Zybickaj. Videa sabrała miljony prahladaŭ — chto jon12
Kamientary