«Rabotnikaŭ z Afryki adpraŭlajuć na kuchniu». Čym zajmajucca pracoŭnyja mihranty ŭ Biełarusi i adkul jeduć?

Popyt na pracu ŭ Biełarusi raście

Na fonie deficytu kadraŭ na praciahu apošnich dvuch hadoŭ u Biełarusi značna spraścili ŭmovy pracaŭładkavańnia zamiežnikaŭ.

Tak, ciapier nie treba atrymlivać śpiecyjalny dazvoł, kab naniać bolš za 10 zamiežnikaŭ. Taksama najmalnikam nie patrebny asobny dakumient dla pryciahnieńnia zamiežnikaŭ pa peŭnych prafiesijach. Hramadzianie krain JEAES i ich siemji mohuć pracavać u Biełarusi bieź śpiecdazvołaŭ i atrymlivać dazvoł na časovaje žycharstva na termin bolš za hod.

Za pieršyja paŭhoda 2025‑ha ŭ Biełaruś aficyjna pryjechała pracavać bolš za 21 tysiača zamiežnikaŭ. Dla paraŭnańnia: za ŭvieś 2024 hod — 34 tysiačy, a za 2023 — 13 tysiač.

Nasupierak razmovam pra namier zaprasić na pracu ŭ Biełaruś 150 tysiač pakistancaŭ, ludziej z hetaj dalokaj krainy da nas jedzie nie šmat. Pa stanie na maj hetaha hoda ŭ Biełarusi pracavała ŭsiaho kala 200 pakistancaŭ. 

Z ulikam taho, što ad niadaŭniaha času zamiežnikam (aproč hramadzian krain JEAES) dla pracaŭładkavańnia na šerah pazicyj treba zdać ispyt na vałodańnie ruskaj abo biełaruskaj movaj, čakać napłyvu pracoŭnych z Pakistana adnaznačna nie varta.

Z 21 259 zamiežnikaŭ, jakija pryjechali ŭ Biełaruś za pieršaje paŭhodździe 2025-ha, amal pałovu składajuć hramadzianie Turkmienistana — 10 050 čałaviek. Na druhim miescy hramadzianie Rasii — 2124, na trecim — Ukrainy (1864). Dalej iduć rabotniki z Kitaja — 1831 čałaviek. Zamykajuć top-5 hramadzianie Uźbiekistana — 1804 čałavieki. Na ŭsie inšyja krainy prypadaje 3586 čałaviek.

Taksisty ź Siaredniaj Azii

Siarod pracoŭnych mihrantaŭ z krain Siaredniaj Azii niamała taksistaŭ. Ich šukajuć u tym liku praz sacyjalnyja sietki. Naprykład, možna patrapić na akaŭnt u tyktoku, jaki viadziecca na turkmienskaj i dzie rekłamujecca praca ŭ taksi.

Pavialičyć

U kamientarach ludzi zadajuć pytańni pra zarobak. U adkazach možna ŭbačyć ličby ad 700 da 1000 dalaraŭ, što supadaje z sumami, jakija nazyvajuć biełaruskija kiroŭcy (pa słovach čałavieka, jaki niekalki miesiacaŭ tamu ŭładkavaŭsia ŭ taksi na arendnym aŭto, za miesiac jon atrymlivaje na ruki ad 2600 da 3000 rubloŭ).

Adzin z kamientataraŭ adkazaŭ, što, kab zarabić tuju tysiaču, treba pracavać pa 12 hadzin. Na što jamu adkazali, što ŭ luboj krainie tak.

Čaściej za ŭsio na zarobki jeduć u Minsk, pakolki zarobki ŭ stalicy bolš vysokija, ale pracoŭnych mihrantaŭ z krain Siaredniaj Azii chapaje i ŭ rehijonach. U asnoŭnym u abłasnych centrach.

Siarod prafiesij, što navidavoku, zamiežnikaŭ možna niaredka ŭbačyć u śfiery handlu.

Uźbieki na kasie, afrykancy na kuchni

Pradavačka, razam ź jakoj u kramie pracuje adrazu niekalki turkmienaŭ i ŭźbiekaŭ, adznačaje, što na kasu ŭ ich čaściej biaruć ludziej z Uźbiekistana, bo jany zvyčajna lepš za turkmienaŭ vałodajuć ruskaj movaj.

U niekatorych kramach ich sietki jość rabotniki z afrykanskich krain, praŭda, pracujuć jany na kuchni, a nie ŭ handlovaj zale, tamu dla šerahovych naviedvalnikaŭ kram jany nie zaŭvažnyja.

Kim jašče pracujuć zamiežniki

Zhodna z aficyjnaj statystykaj, z 21 tysiačy pracoŭnych mihrantaŭ 4319 — heta rabotniki śfiery absłuhoŭvańnia, handlu i inšych rodnasnych vidaŭ dziejnaści.

7240 čałaviek — kvalifikavanyja rabočyja pramysłovaści, budaŭnictva i padobnych zaniatkaŭ.

Jašče 3796 mihrantaŭ uładkavalisia zborščykami vyrabaŭ, apieratarami, aparatčykami, mašynistami i inšymi rabočymi, zaniatymi kiravańniem, ekspłuatacyjaj i absłuhoŭvańniem ustanovak i mašyn.

Hałoŭnaje — vałodać ruskaj

Vakansij, kudy hatovyja brać zamiežnikaŭ, chapaje. Tak, naprykład, budaŭničy hipiermarkiet «OMA» šukaje kładaŭščykoŭ-kamplektoŭščykaŭ dla pracy ŭ pasiołku Pryvolny. Rabočym abiacajuć ad 2500 rubloŭ. 

Pavialičyć

«Vakansija dastupnaja dla zamiežnikaŭ ź viedańniem ruskaj movy», — paznačana ŭ apisańni. 

Zamiežnikaŭ, jakija vałodajuć ruskaj abo biełaruskaj movaj, hatovyja brać u tym liku kasirami ŭ zakusačnuju. Abiacajuć hnutki hrafik i zarpłatu 1250‑1700 rubloŭ.

Pavialičyć

Vierahodna, pad zamiežnikami ŭ takim vypadku majucca na ŭvazie studenty, jakija hatovyja padpracoŭvać, pakolki jechać na zarobki ŭ Biełaruś za $400—550 na miesiac sensu niama.

Naturalna, što dla bolšaści prac treba vałodać miascovaj movaj.

Siarod turkmienaŭ, darečy, taksama nabiraje papularnaść kazachstanski kirunak, pakolki im stała składaniej atrymlivać vizu ŭ Turcyju, dzie tradycyjna pražyvaje šmat turkmienaŭ. Kazachstan, u svaju čarhu, źjaŭlajecca samaj bahataj krainaj u rehijonie, tamu na zarobki tudy ciapier jeduć nie tolki z samaha biednaha Turkmienistana, ale i z Uźbiekistana. A turkmieny, adpaviedna, jeduć na pracu ŭ tym liku va Uźbiekistan.

U Minsk zamiest Maskvy

Biełaruski taksist, jaki pracuje na ŭłasnym aŭto i cikaviŭsia ŭ zamiežnikaŭ, čamu jany jeduć da nas, kaža, što tut skłałasia adrazu niekalki faktaraŭ.

Pa-pieršaje, kali nie lenavacca, to ŭ taksi navat na arendnym aŭto možna mieć pad $1000 u miesiac. Pa-druhoje, u Biełarusi spraścili ŭmovy pracaŭładkavańnia dla zamiežnikaŭ.

Jašče adzin faktar, jaki surazmoŭcu ahučvali taksisty z Uźbiekistana i Turkmienistana, — heta paharšeńnie staŭleńnia da azijataŭ u Rasii paśla teraktu ŭ «Krokus Sici Choł». Maŭlaŭ, ahresii stała bolš, tamu niekatoryja i vyrašyli pierabracca na pracu ŭ Biełaruś, choć minskija zarobki nižejšyja za maskoŭskija.

Kolki mihranty traciać na žytło?

Kali razmova idzie nie pra niejkaje dziaržaŭnaje pradpryjemstva abo kałhas, dzie rabotnikaŭ zabiaśpiečvajuć žyllom, bolšaść pryjezdžych zdymajuć sabie łožka-miescy.

U Minsku ceny startujuć ad $115 z čałavieka na miesiac plus kamunalnyja vydatki. Łožka-miescy dla rabočych zdajuć jak u kvaterach, tak i ŭ katedžach, jakija mieściacca ŭ samim horadzie abo niepadalok ad MKAD.

Pavialičyć

Niekatoryja, praŭda, hatovyja zdavać łožka-miescy tolki biełarusam, pra što ŭkazvajuć u apisańni.

Za 15 rubloŭ na sutki ($150 na miesiac) prapanujuć łožka-miescy ŭ katedžy ŭ Minsku, raźličanym na pražyvańnie 30 čałaviek. U hetuju sumu ŭvachodziać kamunalnyja pasłuhi, źmiena bializny dvojčy na miesiac, bytavaja chimija dla kuchni i hihijeničnyja srodki.

Pavialičyć

Ale jość i tańniejšyja prapanovy: naprykład, u Kałodziščach zdajuć łožka-miescy ŭsiaho pa $70 z čałavieka.

• 3
• 1
• 0
• 3
• 1
• 2
• 2
• 0