Adzin ź ich prezientavali na Bierlinskim kinafiestyvali, druhi raskazvaje historyju śvinhieraŭ-niaŭdačnikaŭ. Filmy pakažuć padčas fiestyvalu «Paŭnočnaje źziańnie».
XI biełaruski kinafiestyval «Paŭnočnaje źziańnie» projdzie z 3 pa 23 listapada. Sioletni słohan — «My prosta dzieci». Filmy buduć pakazvać jak anłajn, tak i afłajn — u Vilni ( 3‑5 listapada), Varšavie ( 6‑9 listapada) i Talinie ( 19‑21 listapada).
Dla ŭdziełu ŭ sioletnim Biełaruskim konkursie fiestyvalu było padadziena 40 zajavak, 9 ź ich byli adabrany dla pakazu. Što ž čakajecca?
«Sud miortvych»
2025, Polšča
5 listapada — Vilnia, k/t Skalvija, kvitki chutka źjaviacca ŭ prodažy
Režysior Andrej Kašpierski razam ź Michaiłam Zujem vydaje aryhinalny satyryčny pohlad na sučasnaść Biełarusi. Chorar maje nazvu «Sud miortvych».
Pa siužecie ŭłady Biełarusi pryniali zakon, jaki dazvalaje sudzić pamierłych biełarusaŭ. Praŭładnaja sudździa Alaksandra (jaje hraje Zoja Biełachvościk) pačynaje pracesy suprać pamierłych apanientaŭ režymu, kab kanfiskavać ich majomaść na karyść dziaržavy. Ale asudžanyja biełarusy paŭstajuć ź miortvych u vyhladzie pryvidaŭ i prychodziać da sudździ…
«Bacia»
2024, Biełaruś
11, 19 listapada — online z 00:00 da 23:59 (tut i dalej Minski čas)
5 listapada — Vilnia, k/t Skalvija, kvitki chutka źjaviacca ŭ prodažy
Karotkamietražka «Bacia» — heta simvaličnaja drama pra niaŭmolnuju płyń času, pra adnosiny pamiž baćkam i synam i ich niaźmiennuju tradycyju — pryjazdžać vudzić rybu.
«Niezabudka»
2025, Polšča
11, 19, 23 listapada — online z 00:00 da 23:59
5 listapada — Vilnia, k/t Skalvija, kvitki chutka źjaviacca ŭ prodažy
Stanisłaŭ Savaściejeŭ, režysior z akciorskim bekhraŭndam, stvaryŭ partret Elizy, žančyny stałaha vieku z chvarobaj Alchajmera. Jaje dom poŭnicca natatkami z nahadvańniami i siamiejnymi fotazdymkami. Štodnia jana zapisvaje videa i pierahladaje staryja zapisy, kab zachavać adčuvańnie siabie. Kali jejnyja ŭspaminy pastupova viartajucca ŭ frahmientach, jana znachodzić svoj zabyty dziońnik i razumieje, što mahła stracić nie tolki pamiać.
«Zaŭtra vy mianie tut nie ŭbačycie»
2024, Polšča
13, 18 listapada — online z 00:00 da 23:59
5 listapada — Vilnia, k/t Skalvija, kvitki chutka źjaviacca ŭ prodažy
Kranalnaja animacyja, zasnavanaja na dziońnikach i hałasavych paviedamleńniach režysiorki Alaksandry Čaboćki ŭ pieryjad ad listapada da śniežnia 2024 hoda. U centry stužki — budni emihrantki, jakaja sprabuje znajści supakoj u drobiaziach: karotkaj pajezdcy tramvajem, hukach vulicy, vypadkovych sustrečach. Heta historyja pra samotu, pamiać i toje, jak zachavać unutranuju svabodu i zdolnaść maryć. Naprykład, pra kania, jaki źjaviŭsia na prypynku.
«Pieradačka»
2025, Danija, Biełaruś
13, 18, 23 listapada — online z 00:00 da 23:59
5 listapada — Vilnia, k/t Skalvija, kvitki chutka źjaviacca ŭ prodažy
«Pieradačka» — toje, što stanovicca adzinaj suviaźziu z vonkavym śvietam dla palityčnych viaźniaŭ, jakich pazbaŭlajuć zvankoŭ i naviedvańniaŭ. Adnajmiennuju nazvu maje animacyjnaja historyja, natchnionaja kazkaj, jakuju siastra napisała bratu, źniavolenamu ŭ Biełarusi pavodle palityčnaj spravy. U filmie pieradačka ažyvaje i sama idzie ŭ turmu da viaźnia — praź ścieny i ciemru, kab prynieści nadzieju i luboŭ.
«Śvinhiery»
2025, Polšča
15, 21 listapada — online z 00:00 da 23:59
5 listapada — Vilnia, k/t Skalvija, kvitki chutka źjaviacca ŭ prodažy
Heta psichałahičnaja kamiedyja režysiora Andreja Kašpierskaha.
Šaściora małaznajomych pamiž saboj asobaŭ siaredniaha vieku sprabujuć damovicca pra śvinhier-viečarynu, ale znachodzicca tysiača i adna drobiaź, što pieraškadžajuć im zabycca pra ŭsio i narešcie adčuć radaść ad biessaromnaj sustrečy. Kamičnaść situacyi spałučajecca ź ironijaj nad čałaviečaj štodzionnaściu i amažami da «Terminatara», ź jakoha pačałosia zachapleńnie režysiora kiniematohrafam. Pakazvać buduć piłotnuju 17‑chvilinnuju sieryju.
«Lebiadzinaja pieśnia Fiodara Ozierava»
2025, Litva, Hiermanija
6 listapada — Varšava, k/t Kinoteka, kvitki chutka źjaviacca ŭ prodažy
20 listapada — Talin, kvitki chutka źjaviacca ŭ prodažy
Hety film Juryja Siamaški sioleta trapiŭ u prahramu adnaho z troch najbujniejšych kinaforumaŭ Jeŭropy — Bierlinskaha kinafiestyvalu.
Na fonie čutak pra Treciuju suśvietnuju vajnu hałoŭny hieroj, 25‑hadovy muzyka Fiodar Ozieraŭ, apantana šukaje svoj ulubiony švedar z ramonkami. Jon pierakanany, što hety švedar nadzialaje jaho mahičnaj zdolnaściu składać pieśni. Z hetaha atrymlivajecca absurdysckaje dramiedzi z aluzijami na hrečaskuju mifałohiju — historyja pra pošuki sensu i nadziei siarod chaosu, i pra toje, jak mastactva moža vyratavać, navat kali ŭsio astatniaje razburajecca.
«Kawalerka»
2025, Polšča
15, 21 listapada — online z 00:00 da 23:59
U centry apaviadańnia — Andrej i Volha, šlubnaja para sa stažam u piatnaccać hadoŭ i dośviedam emihracyi za plačyma. Apynuŭšysia ŭ ciesnaj adnapakajovaj kvatercy, dzie adzin i toj ža pakoj słužyć i haścioŭniaj, i spalniaj, i kuchniaj, jany raptam razumiejuć, što kazać bolš, zdajecca, i niama pra što — chiba što ŭspaminać, jak było raniej.
«Miechanika materyjałaŭ»
2024, Čechija
16, 20, 23 listapada — online z 00:00 da 23:59
Drama, zasnavanaja na realnaści siemjaŭ, razarvanych vajnoju va Ukrainie. U ich liku i siamja aŭtarki. Film daśleduje niepaźbiežny vybar pamiž luboŭju i palitykaj, siabrami i rodnymi, maŭčańniem i supracivam.
Daviedaŭšysia, što jaje najlepšaja siabroŭka apynułasia ŭ pastcy vajny, hałoŭnaja hierainia stužki Jana vymušana zazirnuć u hłybini sumleńnia svajoj siamji. U domie babuli i dziaduli, dzie z ekrana hučyć rasijskaje telebačańnie, jaje praŭda raptam zdajecca čužoju.
Biełaruskija filmy budzie aceńvać mižnarodnaje žury, u skład jakoha ŭvajšli, naprykład, mastackaja kiraŭnica kinafiestyvalu «Mente Locale», kinaekśpiertka i kansultantka Leena Pasanien, režysiorka i scenarystka Mara Tamkovič.
Jašče 8 biełaruskich filmaŭ pakažuć u pazakonkusnaja prahramie. Padrabiaźniej pra ich čytajcie tut.
Padtrymać kinafiestyval možna danatam.
Kamientary