Paŭtara hoda tamu režysior Andrej Kašpierski i scenaryst Michaił Zuj pradstavili sieryjał «Pracesy» — trahikamiedyju pra Biełaruś časoŭ represij. Ciapier Kašpierski i Zuj rychtujuć novuju premjeru ŭ stylistycy Vudzi Alena i zusim biez palityki.
Sieryjał, jaki robiać Kašpierski i Zuj, zaviecca «Śvinhiery». Praŭda, ad samoha śvinhierstva tut zbolšaha tolki nazva.
Hieroi sieryjała, šeść małaznajomych ludziej, žyvuć u Jeŭrasajuzie, bolšaść ź ich — biełarusy. Jany ŭžo nie pieršy hod u emihracyi i ŭładkavalisia ŭ zamiežžy nastolki, kab pierajści ad pytańniaŭ vyžyvańnia da bolš dalikatnych rečaŭ.
Andrej Kašpierski raskazvaje:
«Jany sprabujuć arhanizavacca i zaniacca hrupavym seksam. Svaje patreby nakštałt pracy, siamji i lehalizacyi jany ŭžo zakryli, ale zastajecca prablema niečaha fizičnaha, duchoŭnaha, moža, navat prablema ščaścia.
U kožnaj sieryi jany sustrakajucca, kab zaniacca śvinhierstvam, i ŭ kožnaj sieryi ŭ ich nie atrymlivajecca. Bo heta darosłyja ludzi, šmat chto ź ich u kryzisie siaredniaha ŭzrostu, i šmat kamu pieraškadžajuć darosłyja, pobytavyja i žyćciovyja prablemy».
Pavodle słoŭ Kašpierskaha, ideja «Śvinhieraŭ» uźnikła jašče ŭ 2021-m. Tady jon i Michaił Zuj raspracoŭvali kancepcyju sieryjałaŭ «Pracesy», a taksama «Tut byŭ Lenin» — hety prajekt zadumvaŭsia dla «Čynčynčeneła», jaki tak i nie vyjšaŭ.
Andrej uspaminaje, što chaciełasia stvaryć niešta inšaje, bolš lohkaje. Tak uźnikła ideja «Śvinhieraŭ» — apalityčnaj historyi pra darosłych ludziej, jakija zaŭždy sprabujuć pra niešta damovicca ŭ adnym pakoi, ale ŭ ich nie atrymlivajecca.
Kašpierski nazyvaje filmy, jakija jaho natchnili na «Śvinhieraŭ» — siarod ich stužki Vudzi Alena i Ramana Pałanski:
«Mnie chaciełasia čahości lohkaha i maksimalna razmoŭnaha, kab heta adroźnivałasia i ad «Čynčynčeneła», i ad «Pracesaŭ», i ad usiaho, što my rabili raniej i robim ciapier».
Pakul źniali tolki pieršuju sieryju «Śvinhieraŭ», usiaho ich płanujecca dziesiać. Daŭžynia kožnaj sieryi — 15 chvilin. Pieršuju ź ich, miarkuje Kašpierski, možna budzie pabačyć praź niekalki miesiacaŭ na łakalnych pakazach u Varšavie.
Ciapier treba znajści hrošy na novyja sieryi — stvaralniki «Śvinhieraŭ» płanujuć rabić heta vosieńniu, kaža Andrej:
«Pryjdziem z našym pitčynham na Netflix. Heta ničoha nie značyć, šmat chto tudy idzie. Ale, napeŭna, było b dobra ź jaho pačać. Pakul chočacca znajści finansavańnie praz kinafondy, telebačańnie ci stryminhi, pajści bolš prafiesijnym šlacham.
Ale kali my raptam pabačym, što sabrali tolki častku srodkaŭ, a astatniuju častku nam treba źbirać praz kraŭdfandynh, my, viadoma, pra heta padumajem».
Kašpierski supakojvaje — kali tema śvinhierstva dla vas nieprymalnaja, vy ŭsio roŭna možacie hladzieć hety sieryjał, i voś čamu:
«Takim ža čynam usie hetyja hieroi mahli damaŭlacca pra što zaŭhodna — pra toje, kab pajści razam u basiejn, kino ci opieru. To-bok heta prosta historyja pra darosłych ludziej, jakija sustrelisia i sprabujuć razam niešta rabić».
«Naša Niva» — bastyjon biełaruščyny
PADTRYMAĆCiapier čytajuć
Łukašenka kaža, što prapanoŭvaŭ Zachadu «pieradać niekalki tysiač» palitviaźniaŭ28
Łukašenka kaža, što prapanoŭvaŭ Zachadu «pieradać niekalki tysiač» palitviaźniaŭ
«Ludzi, budźcie pilnyja! U takoj situacyi moža apynucca kožny žychar ES!» Hramadzianin Litvy, asudžany ŭ Biełarusi da 13 hadoŭ za «špijanaž», pieradaŭ list z kałonii3939
Kamientary
A jakija dumki byli ŭ vas u 2021-m, kali jašče zdaralisia čas ad času dvaravyja maršy?
I sapraŭdy, jakaja nacyjanalnaja trahiedyja dy akupacyja? Prahramy pa padtrymcy represavanych pracujuć jak treba, hrošaj chapaje, vyzvolnaja armija nazapašvaje resursy dy ŭsie ŭsie razumiejuć: u jakim stanie apynułasia Biełaruś i što varta rabić kožnamu. Kožnaja prafiesija dy zaniatak daje adkay na hetyja pytańni, tamu zrynańnie režymu i vyzvaleńnie - pytańnie času. Tamu možna zaniacca trochi inšymi temami: kab adciahnuć uvahu ad trahičnaj rečaisnaści dy trochi adpačyć... Ale ž nie.
Tamu ničoha dziŭnaha ŭ biahučym stanie. Hetym ludziam nie patrebna svaja Kraina. 240 hadoŭ akupacyi, padobna, zrabili svaju spravu i całkam vyrazali orhan, što adkazvaje za samaśviadomaść dy nacyjanalnuju hodnaść. Tamu, zamiest refleksii i pošukaŭ vyjścia, hladzicie ciapier kino pra śvinhieraŭ, źniataje ŭ volnym śviecie padčas akupacyi. Chłopcy sapraŭdy farmujuć "załaty fond" i nakiroŭvajuć hrošy na sapraŭdy patrebnyja padčas vajny rečy. Jak ža heta ŭsio brydka.