Kirył Dźmitryjeŭ: chto hety bankir, jaki staŭ niečakanym pasłańnikam Pucina ŭ Vašynhtonie i suaŭtaram mirnaha płana Trampa
Jon naradziŭsia ŭ Kijevie, atrymaŭ adukacyju ŭ Stenfardzie i viedaje, jak pryciahnuć uvahu ŚMI. Apošnim časam Dźmitryjeŭ staŭ hałoŭnym kanałam suviazi pamiž Kramlom i administracyjaj Donalda Trampa ŭ pytańniach miru va Ukrainie. Adnak ci maje jon realnuju ŭładu? Ci źjaŭlajecca ŭsiaho tolki zručnym instrumientam u rukach Pucina? Pra heta piša Foreign Policy.
Pradukt zachodniaj biznes-škoły
Kirył Dźmitryjeŭ naradziŭsia ŭ 1975 hodzie ŭ Kijevie. U 1996 hodzie jon atrymaŭ stupień bakałaŭra ŭ Stenfardskim univiersitecie, a ŭ 2000‑m — stupień mahistra ŭ Harvardskaj škole biźniesu, paśpieŭšy papracavać u kansałtynhavaj kampanii McKinsey.
U 2011 hodzie Dźmitryjeŭ uznačaliŭ Rasijski fond pramych inviestycyj (RFPI) — dziaržaŭnuju arhanizacyju, stvoranuju dla pryciahnieńnia inviestycyj. Da ŭvarvańnia va Ukrainu ŭ 2022 hodzie fond pryciahnuŭ u krainu bolš za 40 miljardaŭ dalaraŭ.
Uznačalvajučy RFPI, Dźmitryjeŭ časta vystupaŭ važnym pasrednikam pamiž Rasijaj i dziaržavami Piersidskaha zaliva, a dziełavyja suviazi, jakija jon vybudavaŭ na Blizkim Uschodzie, stali klučavymi dla jaho sprob naładzić kantakty ź ludźmi z atačeńnia Trampa.
Jak adznačajuć ekśpierty, Kirył Dźmitryjeŭ — pradukt zachodniaj biźnies-škoły. U adroźnieńnie ad bolšaści ludziej u atačeńni Pucina jahony šlach da ŭłady nie pralahaŭ praz kabiniety FSB ci MZS. Jahonym kapitałam stali nie pahony, a ŭmieńnie naładžvać kantakty i pryciahvać hrošy.
Padčas niadaŭniaha vizitu ŭ ZŠA bankir prademanstravaŭ svaje mocnyja baki: daŭ intervju Fox News i CNN, padaryŭ amierykanskamu zakanadaŭcu šakaładnyja cukierki z vyjavaj Pucina i aktyŭna vioŭ svoj profil u tvitary.
— Kirill Dmitriev (@kadmitriev) October 30, 2025
Zdajecca, namahańni Dźmitryjeva prynieśli peŭny plon: vydańnie Axios paviedamiła, što jon ščylna kansultuje pasłanca Trampa Styva Uitkafa pa raspracoŭcy novaha mirnaha płanu dla Ukrainy.
Były namieśnik kiraŭnika Centrabanka Rasii Siarhiej Alaksašanka miarkuje, što Pucin abraŭ Dźmitryjeva nie ŭ apošniuju čarhu dziakujučy jahonym navykam bankira. Alaksašanka, jaki koratka sustrakaŭsia ź im bolš za dziesiać hadoŭ tamu, apisvaje Dźmitryjeva jak abajalnaha čałavieka, jaki ŭmieje budavać adnosiny i dakazaŭ Pucinu, što moža davać vynik, paśpiachova pryciahvajučy hrošy dla Rasii ź Blizkaha Uschodu.
Adnak Alaksašanka pieraścierahaje ad pierabolšvańnia statusu Dźmitryjeva. Pavodle jaho słoŭ, mieć davier Pucina nie aznačaje mieć mahčymaść upłyvać na jaho pohlady.
Choć zachodnija ŚMI časam nazyvajuć Dźmitryjeva «zaklinalnikam Trampa» (Trump whisperer), Aleksašenka ličyć heta vidavočnym pierabolšańniem. Na jaho dumku, Dźmitryjeva varta razhladać chutčej jak pasłanca Pucina, a nie jak hałoŭnaha pieramoŭščyka.
Alaksašanka ličyć, što meta Dźmitryjeva — pasprabavać źmiakčyć pazicyju Vašynhtona, demanstrujučy, što Rasija maje što prapanavać u finansavym płanie ZŠA i ludziam z atačeńnia Donalda Trampa. Jaho bijahrafija tłumačyć, čamu mienavita jon pasuje dla hetaj zadačy.
«Kirył vielmi dobra padrychtavany. Jon viedaje krainu, viedaje administracyju i maje šmat asabistych siabroŭ, jakija viedajuć ludziej va ŭładzie», — tłumačyć Alaksašanka.
Adnak davier uzmacniajecca i asabistymi suviaziami. Jak paviedamlała rasijskaje vydańnie The Insider, žonka Dźmitryjeva, Natalla Papova, źjaŭlajecca siabroŭkaj dački Pucina, Kaciaryny Cichanavaj. Hetaja blizkaść da siamji źjaŭlajecca klučavym faktaram u sistemie, pabudavanaj Pucinym.
Debiut u vialikaj palitycy
Upieršyniu Dźmitryjeŭ vyjšaŭ na amierykanskuju palityčnuju arenu adrazu paśla pieramohi Trampa ŭ 2016 hodzie. Vykarystoŭvajučy svaje biznes-suviazi na Blizkim Uschodzie, jon inicyjavaŭ kantakt ź ziaciem Trampa Džaredam Kušnieram. Pasrednikam vystupiŭ Džordž Nader, daradca kiraŭnika AAE Muchamieda bien Zajda, jaki paznajomiŭ Dźmitryjeva ź siabram Kušniera, kiraŭnikom chedž-fondu Rykam Hiersanam.
Nader taksama dapamoh arhanizavać sustreču Dźmitryjeva na Siejšelskich astravach u studzieni 2017 hoda z Erykam Prynsam — zasnavalnikam skandalnaj pryvatnaj vajennaj kampanii Blackwater i ŭpłyvovym prychilnikam Trampa.
U vyniku hetych kantaktaŭ Kušnier atrymaŭ płan prymireńnia pamiž ZŠA i Rasijaj, jaki paźniej trapiŭ da daradcaŭ Trampa Styva Benana i budučaha dziaržsakratara Reksa Tylersana.
Hetaja burnaja dziejnaść nie zastałasia niezaŭvažanaj. Imia Dźmitryjeva zhadvałasia bolš za 100 razoŭ u dakładzie śpiecprakurora Robierta Miulera pra rasijskaje ŭmiašańnie ŭ vybary. Sam Dźmitryjeŭ paźniej prakamientavaŭ heta tak:
«U dakładzie Miulera mnie było pryśviečana 13 staronak — nijakich parušeńniaŭ nie vyjaŭlena. Ja pracavaŭ nad pabudovaj dyjałohu pamiž ZŠA i Rasijaj».
Realnaja ŭłada ci zručnaja šyrma?
Ź viartańniem Trampa ŭ Bieły dom Dźmitryjeŭ znoŭ aktyvizavaŭsia. Jon udzielničaŭ u pieramovach u Saudaŭskaj Aravii, naviedaŭ Vašynhton (dla čaho ZŠA časova źniali ź jaho sankcyi) i prysutničaŭ na samicie Trampa i Pucina na Alascy.
Adnak, niahledziačy na publičnuju aktyŭnaść, analityki sumniavajucca ŭ realnym upłyvie Dźmitryjeva na pryniaćcie rašeńniaŭ u Kramli.
«Ja b nie nazvała Dźmitryjeva ŭpłyvovaj fihuraj», — adznačaje ŭ intervju vydańniu ekśpiert pa Rasii i navukovy supracoŭnik Centra Karniehi pa vyvučeńni Rasii i Jeŭrazii (Carnegie Russia Eurasia Center) Alaksandra Prakapienka.
Na dumku ekśpiertki, ciapierašni status Dźmitryjeva jak śpiecpradstaŭnika prezidenta byŭ dadzieny jamu chutčej dla taho, kab pasadzić jaho za stoł pieramovaŭ, a nie dla taho, kab nadzialić jaho realnym upłyvam na praces.
Zasnavalnica rasijskaha sajta palityčnaha analizu R.Politik i navukovy supracoŭnik Centra Karniehi Taćciana Stanavaja padkreślivaje, što Dźmitryjeŭ znachodzicca pa-za tradycyjnaj sistemaj pryniaćcia rašeńniaŭ, jakaja ŭklučaje samoha Pucina, MZS, FSB i Ministerstva abarony. «U hetaj sistemie dla Dźmitryjeva niama miesca», — śćviardžaje jana.
Jahonaja rola vyklikaje razdražnieńnie ŭ karjernych dypłamataŭ. Pavodle paviedamleńniaŭ rasijskaha vydańnia «Ahientstvo», padčas sustrečy rasijskich i amierykanskich pieramoŭščykaŭ u lutym hetaha hoda ministr zamiežnych spraŭ Siarhiej Łaŭroŭ sprabavaŭ nie dapuścić Dźmitryjeva za stoł pieramovaŭ.
Amierykanski bok taksama nastrojeny skieptyčna. Ministr finansaŭ ZŠA Skot Biesient publična nazvaŭ Dźmitryjeva rasijskim prapahandystam, a ekanamičnyja prapanovy, jakija jon prasoŭvaje, pakul nie vyklikali cikavaści ŭ Vašynhtonie.
Pa sutnaści, kaštoŭnaść Dźmitryjeva dla Pucina zaklučajecca nie ŭ jahonych dypłamatyčnych talentach, a ŭ jahonych daŭnich kantaktach z kamandaj Trampa.
«Ludziam Trampa byŭ patrebny niechta znajomy, chto nie byŭ zaplamleny suviaziami z papiaredniaj administracyjaj, i Dźmitryjeŭ padyšoŭ na hetuju rolu», — śćviardžaje Prakapienka.
Tym nie mienš, na niastałym poli kramloŭskaj elity Dźmitryjeŭ tearetyčna moža jašče bolš uzvysicca. Źjavilisia čutki pra niezadavolenaść Pucina Łaŭrovym, bo toj prapuściŭ klučavuju sustreču pa jadziernych vyprabavańniach u pačatku listapada i adsutničaje ŭ śpisach udzielnikaŭ samita G20.
Adnak Kreml heta abviarhaje, a ekśpierty sumniavajucca ŭ takoj viersii. U lubym vypadku, navat kali pazicyi Dźmitryjeva ŭmacujucca, kančatkovaje słova zastajecca za adnym čałaviekam. Jak padkreślivaje analityk Taćciana Stanavaja: «Vyrašaje tolki Pucin».
Ciapier čytajuć
Nad šerym kardynałam Nacbanka zhuścilisia chmary? Zatrymali jaho siabra, byłoha vykanaŭčaha dyrektara Banka raźvićcia4
Kamientary