Sieviaryniec: U administracyi SIZA pierakošvała tvary ad adnoj zhadki proźvišča Cichanoŭskaha
Palityk i były palitviazień Pavieł Sieviaryniec apublikavaŭ post, u jakim padzialiŭsia ŭspaminami pra znajomstva ź Siarhiejem Cichanoŭskim i svaim bačańniem jaho roli ŭ historyi Biełarusi. Na dumku Sieviarynca, Cichanoŭski — heta nie vypadkovaja postać, a čałaviek, jaki zmoh stać rezanataram narodnaha nastroju ŭ važny momant.
Ź Siarhiejem Cichanoŭskim my paznajomilisia na mienskaj Płoščy Voli. Uvosieni 2019 hoda Siarhiej, tady jašče prosty homielski błohier, zdymaŭ akcyju pratestu i strymiŭ vystupy pramoŭcaŭ.
Padčas akcyjaŭ za niezaležnaść naprykancy 2019‑ha Siarhiej z kamieraj vynyrvaŭ ź ludskoj huščy to tut, to tam.
Uviesnu 2020-ha, kali pačalisia apazicyjnyja prajmieryz, Cichanoŭski braŭ u mianie intervju — u studyjach i doma (potym u majoj kryminalnaj spravie hetyja intervju stanuć asnovaj abvinavačańnia ŭ «zamyśle i padrychtoŭcy masavych biesparadkaŭ»).
Užo tady ja bačyŭ, što Siarhiej kruty; vielmi spadabałasia jahonaja fraza, adkaz adnamu z hledačoŭ strymu, jaki kazaŭ, maŭlaŭ, «začiem po-biełorusski, ludi nie pojmut»:
— Nie treba pałochać biełarusaŭ biełaruskaj movaj!
Cichanoŭski nastolki prosta razmaŭlaŭ z prostymi biełarusami, zadavaŭ pytańni, byccam ćviki zabivaŭ, i padchoplivaŭ najlepšaje, što ŭžo ŭ krasaviku 2020 hoda, na chvali pandemii, stała jasna — jon narodny lidar, i jon zdolny pavieści ludziej.
Mienavita ŭ im sfakusavaŭsia biełaruski zapyt na revalucyju padčas pandemii – i mienavita jon zrabiŭsia hałoŭnym hierojem leta 2020-ha.
Pišu hetyja vidavočnyja rečy dla tych, chto ciapier «śpisvaje» Siarhieja Cichanoŭskaha, kleić birku «vypadkovaha», hrebliva prachodzicca pa im u kamientarach. U krytyčny momant biełaruskaj historyi Siarhiej staŭ mahutnym rezanataram narodnaha nastroju, prajšoŭ ahoń i vadu, vystajaŭ u turmie — a takija rečy vypadkovymi nie byvajuć.
Nu, a Śviatłana, jakaja pajšła za muža ŭ prezidenty — heta naohuł epičnaja Love story.
Užo ŭ žniŭni na Vaładarcy, u pierapoŭnienym «Šanchai», mnie daviałosia sutykacca z apierskimi «błatnymi», jakija krucili šarmanku pra Siarohaŭ «nizki status», potym čuć historyi, jak ź Cichanoŭskaha ździekvalisia ŭ Žodzina, i bačyć, jak pierakošvała tvary ŭ administracyi ad adnoj zhadki proźvišča.
Vyzvaleny Siarhiej Cichanoŭski idzie svoj šlach i dalej — pryčym idzie, jak i ŭ 2020-ym, razam ź biełaruskim narodam. Šlach da Biełarusi i da biełaruskaści. Rasčaravańnie, vyhnańnie, adčaj, sumnieńni — chto nie prachodziŭ usiaho hetaha za apošnija šeść hadoŭ chacia b u dumkach? Chto nie zdavaŭsia? Nie padaŭ?
I niachaj mnie nie nadta blizkija idei «finlandyzacyi» Biełarusi, i niachaj ja nie zhodny ź niekatorymi jahonymi vykazvańniami — u mianie nie padymiecca ruka kinuć kamień u čałavieka, pad proźviščam jakoha biełarusy padpisvalisia ŭ 2020‑ym u šmattysiačnych čerhach u nadziei na pieramieny.
Voś ža, Siarhiej Cichanoŭski — naš nacyjanalny zdabytak. Takimi asobami, takimi lehiendami nie raskidvajucca. My, biełarusy, nie takija bahatyja dy mocnyja, kab «adbrakoŭvać» lidaraŭ, zdolnych uźniać miljony na zmahańnie za Biełaruś. Cichanoŭski jašče nie skazaŭ svajho apošniaha słova. I jahonaja ŭvaha da chryścijanstva, i jahonaja praca ŭ ZŠA, epicentry suśvietnaj palityki — heta vializny patencyjał.
I, u rešcie rešt, nie treba zabyvacca: mienavita Siarhiej vybraŭ u žonki Śviatłanu Cichanoŭskuju – i jana stała abliččam Biełarusi.
Tak što, Siarhiej — nie zdavajsia! Biełaruś budzie volnaj i niezaležnaj — pad bieł-čyrvona-biełym ściaham!
Vierym! Možam! Pieramožam!
Kamientary