Jak i dzie kupić i pradać zołata ŭ Biełarusi, i ci treba płacić padatki za heta

Vysakarodnyja mietały viarnuli sabie blask i słavu, niby my žyviom u Siaredniavieččy: rost ich koštu apiaredžvaje navat samyja śmiełyja prahnozy, piša «Točka». 

Tak, z pačatku 2025 hoda i da piku, jaki zdaryŭsia 20 kastryčnika, zołata padaražeła na biržach na 66,5% — da $4398 za uncyju.

Potym rušyła karekcyja cen, inakš kažučy, zołata ŭpała ŭ canie. Ale ŭ pačatku listapada košt mietału na ńju-jorkskaj tavarnaj biržy COMEX iznoŭ pajšoŭ uhoru, pierasiahnuŭšy ŭzrovień $4100. A ŭ pačatku śniežnia jon dasiahnuŭ adznaki $4245.

Jak miarkujuć analityki Deutsche Bank, u 2026‑m zołata vyraście da $4450 za uncyju, u 2027‑m — da $5150.

Takoje imklivaje pavyšeńnie cany adbyvajecca tamu, što va ŭmovach bieśpierapynnych hieapalityčnych i ekanamičnych ryzyk jano zastajecca aktyvam — «prytułkam» dla centralnych bankaŭ i inviestaraŭ va ŭsim śviecie.

Pryčym uvierch idzie košt nie tolki zołata, ale i inšych vysakarodnych mietałaŭ.

Tak, srebra za 2025‑y vyrasła ŭdvaja (u listapadzie — da $57,86 za uncyju), a płacina — bolš čym na 70% (da $1650 za ŭncyju).

Pa zołata — u bank

Biełarusy majuć prava svabodna kuplać i pradavać kaštoŭnyja mietały. Ale nie z ruk, a praz kankretnyja dziaržaŭnyja i kamiercyjnyja struktury pa ich prejskurantach.

Tak, kaštoŭnyja mietały ŭ vyrabach i łomie ŭ biełarusaŭ nabyvaje Minfin, adnak heta mienavita skupka «ŭ adzin bok».

Kuplać, kab zatym pradavać zołata, srebra i płacinu, zarablajučy na roźnicy cen, možna praź biełaruskija banki.

Zołata ŭ hetych finarhanizacyjach maje adnu i tuju ž najvyšejšuju, 999-ju, probu i vykładzienaje «na vitrynie» ŭ vyhladzie miernych źlitkaŭ i inviestycyjnych maniet.

Darečy, z 20 kastryčnika apieracyi ŭ kupli-prodažy kaštoŭnych mietałaŭ adnaviŭ i Nacbank.

I hramam, i kiłahramam

Miernyja źlitki zołata byvajuć vahoj ad 1 hrama da 1 kiłahrama. Niadziŭna, što ich košt adroźnivajecca ŭ razy.

Naprykład, u Nacbanku cana samaha maleńkaha źlitka zołata ciapier składaje Br446,79, a samaha vialikaha — Br404 050,40. Tady jak prejskuranty na kuplu — Br384,62 i Br384 624,90 adpaviedna.

Ceny na kuplu-prodaž zołata adroźnivajucca va ŭsich finansavych arhanizacyjach.

Tak, piacihramovy źlitak Biełarusbank kuplaje za Br2125, a pradaje za Br2150, Biełahraprambank — za Br2135 i Br2150, Biełhazprambank — za Br2120 i Br2150 adpaviedna.

Pakolki roźnica pamiž kuplaj i prodažam kaštoŭnych mietałaŭ u bankaŭ moža być vielmi istotnaj, tolki ŭstojlivy (i važki) rost cen zołata na źniešnich rynkach moža zabiaśpiečyć važki prybytak uładalniku źlitka albo maniety.

U pryncypie, zołata dobraje mienavita jak doŭhaterminovy finansavy aktyŭ. Ale ŭkładvać usie resursy ŭ jaho niapravilna — razumnaja častka kaštoŭnych mietałaŭ u partfieli inviestara, z roznych acenak, składaje ad 10 da 20%.

Taksama treba pamiatać, što zołata pieražyvaje pieryjady nie tolki ŭzdymu, ale i spadu ŭ canie.

Akramia kupli kaštoŭnych mietałaŭ u fizičnym vyhladzie, biełarusy mohuć nabyvać ich šlacham adkryćcia tak zvanych mietaličnych rachunkaŭ u bankach.

Što z padatkami na kuplu i prodaž zołata

Na padstavie punkta 43 artykuła 208 Padatkovaha kodeksa Biełarusi dachody fizasob ad realizacyi kaštoŭnych mietałaŭ u vyhladzie bankaŭskich i miernych źlitkaŭ, maniet, kaštoŭnych kamianioŭ Nacbanku i bankam Biełarusi vyzvalajucca ad padachodnaha padatku.

Vydatki, paniesienyja hramadzianami na nabyćcio kaštoŭnych mietałaŭ u biełaruskich bankaŭ, u adpaviednaści z punktam 1 artykuła 196 PK abjektam padatkaabkładańnia padachodnym padatkam taksama nie pryznajucca.

Što da vypłaty PDV, to hety padatak u našaj krainie płaciać arhanizacyi, rastłumačyli Tochka.by u MPZ.

Fizasoby nie pryznajucca płacielščykami PDV pry realizacyi tavaraŭ na terytoryi Biełarusi. Adpaviedna, pry praviadzieńni apieracyj kupli-prodažu z kaštoŭnymi mietałami praź biełaruskija banki padatkovych abaviazacielstvaŭ pa PDV u hramadzian taksama nie ŭźnikaje.

• 3
• 0
• 0
• 0
• 0
• 0
• 0
• 0