Ukraina vyrašyła da kanca hoda likvidavać internacyjanalnyja lehijony

Asobnyja pradstaŭniki lehijonaŭ zajaŭlajuć, što pryniataje rašeńnie moža pryvieści da istotnaha skaračeńnia patoku zamiežnych dobraachvotnikaŭ va ŭkrainskaje vojska, a mahčyma — i da jaho poŭnaha spynieńnia.

U kamandavańni USU zapeŭnivajuć, što hetaja reforma źjaŭlajecca evalucyjnym pracesam i što lehijony ŭžo adyhrali svaju rolu, važnuju najpierš u pieršyja hady vajny.

Što takoje internacyjanalnyja lehijony

Internacyjanalnyja lehijony abarony Ukrainy (časam užyvajucca nazvy «Zamiežnyja lehijony» abo «Mižnarodnyja lehijony») faktyčna źjaŭlajucca asobnymi bataljonami śpiecpryznačeńnia, jakija z pačatku poŭnamaštabnaj vajny isnavali ŭ struktury Terytaryjalnaj abarony, a paźniej — u padparadkavańni Kamandavańnia Suchaputnych vojskaŭ. Asobna ad ich isnuje «Mižnarodny lehijon HUR», stvorany jak vajskovaja čaść Hałoŭnaha ŭpraŭleńnia raźviedki Ministerstva abarony, jaki vykonvaje asobnyja zadačy, pieravažna raźviedvalna-dyviersijnyja.

Internacyjanalnyja lehijony pačali farmiravacca zhodna z rašeńniem prezidenta Uładzimira Zialenskaha ad 27 lutaha 2022 hoda.

Asnoŭny akcent rabiŭsia na dobraachvotnym pryciahnieńni da ŭkrainskaha vojska daśviedčanych zamiežnikaŭ z dośviedam vajskovaj abo palicejskaj słužby. Jany mahli zaklučać kantrakt z USU terminam na try hady, ale, u adroźnieńnie ad ukraincaŭ, mieli prava skasavać jaho praz šeść miesiacaŭ słužby.

Zamiežniki atrymlivajuć takoje ž hrašovaje zabieśpiačeńnie, jak i ŭkrainskija vajskoŭcy, heta značyć, značnyja dapłaty mahčymyja tolki pry praciahłym znachodžańni na bajavych pazicyjach.

Pa stanie na 2025 hod u składzie USU dziejničali čatyry internacyjanalnyja lehijony, kožny kolkaściu prykładna bataljon (kala 400—600 čałaviek). Ź ich try bajavyja i adzin navučalny.

Pieršy internacyjanalny lehijon byŭ stvorany ŭ sakaviku 2022 hoda. U krasaviku—vieraśni taho ž hoda padraździaleńnie ŭdzielničała ŭ abaronie Charkaŭskaj vobłaści kala miažy z RF. U vieraśni 2022 — lipieni 2023 bajcy lehijona ŭdzielničali ŭ kontrnastupie na charkaŭskim kirunku, u pryvatnaści vyzvalali Kupjansk. Paśla kontrnastupu voiny trymali abaronu na vyzvalenych terytoryjach.

U lipieni 2023 — lipieni 2024 hadoŭ lehijon udzielničaŭ u kontrnastupalnych dziejańniach u Bachmuckim rajonie, vyzvalaŭ nasielenyja punkty Andrejeŭka i Klaščejeŭka, a paśla — abaraniaŭ ich.

Uletku 2024 hoda padraździaleńnie ŭdzielničała ŭ bajavych dziejańniach u kirunku Vialikaj Navasiołki i Vuhladara na Danieččynie.

Druhi internacyjanalny lehijon byŭ sfarmavany ŭ kastryčniku 2022 hoda. Asnovu kamandnaha sastavu bataljona skłali pradstaŭniki pieršaj internacyjanalnaj roty śpiecyjalnaha pryznačeńnia USU, jakija ŭdzielničali ŭ bajach za Lisičansk, Hryhoraŭku, Siviersk i Bachmut.

Za hady vajny lehijon vajavaŭ na roznych kirunkach u Danieckaj i Charkaŭskaj abłaściach, u pryvatnaści vioŭ bai za Vaŭčansk i Časaŭ Jar.

Treci internacyjanalny lehijon pačaŭ svoj bajavy šlach u žniŭni 2022 hoda jak bataljon śpiecyjalnaha pryznačeńnia ŭ składzie Suchaputnych vojskaŭ USU. Lehijon pryciahvaŭsia da abarony Charkaŭščyny, udzielničaŭ u charkaŭskim kontrnastupie, vyzvaleńni Kupianska, častki Łuhanskaj vobłaści, Navasiołaŭskaha rajona, a taksama ŭ bajach u rajonie Bachmuta.

Čaćviorty internacyjanalny lehijon funkcyjanuje jak centr padrychtoŭki i rekrutynhu. Inicyjataram jaho stvareńnia staŭ vieteran armii ZŠA Mećju Parkier, jaki słužyŭ u pieryjad z 1990 pa 2011 hod u jakaści kavaleryjskaha raźviedčyka.

Jon prapanavaŭ stvaryć bataljon, jaki śpiecyjalizavaŭsia b na adbory i padrychtoŭcy instruktaraŭ i sałdat dla troch bajavych internacyjanalnych lehijonaŭ ZSU.

Za čas vajny da hetych padraździaleńniaŭ dałučylisia tysiačy pradstaŭnikoŭ bolš jak 75 krain śvietu, u tym liku Vialikabrytanii, ZŠA, Hruzii, Polščy, Biełarusi, Estonii, Kałumbii, Brazilii.

Varta adznačyć, što zamiežniki vajujuć nie tolki ŭ składzie internacyjanalnych lehijonaŭ. Ich imknucca pryciahvać i zvyčajnyja bajavyja padraździaleńni, naprykład 47‑ia asobnaja miechanizavanaja bryhada «Mahura» abo Druhi korpus Nachvardyi «Chartyja».

Adnak mienavita ŭ internacyjanalnych lehijonach rekrutynh zamiežnikaŭ byŭ pastaŭleny na patok z samaha pačatku vajny i mieŭ najbolš sistematyzavany charaktar siarod usich inšych.

Pavodle źviestak krynic BBC Ukraina ŭ vyšejšym kamandnym składzie USU, sioleta vosieńniu Hienštab vydaŭ sumiesny ź Ministerstvam abarony niepubličny zahad ab rasfarmavańni ŭsich internacyjanalnych lehijonaŭ i dałučeńni ich asabovaha składu da šturmavych padraździaleńniaŭ.

Hety praces pavinien zaviaršycca da 31 śniežnia. Heta značyć, što z novaha hoda zamiežnyja dobraachvotniki pavinny byli b užo vajavać u składzie šturmavych vojskaŭ, jakija, vidavočna, płanujuć stvaryć u najbližejšy čas.

Čaćviorty lehijon znachodzicca ŭ pracesie pierafarmatavańnia ŭ navučalny centr, Pieršy i Treci lehijony ŭžo stali častkaj svaich šturmavych pałkoŭ. U pryvatnaści, bajcy Pieršaha lehijonu ŭvajšli jak asobny bataljon u 475‑y asobny šturmavy połk CODE 9.2.

Adnak kateharyčna suprać rasfarmavańnia publična vystupiła kamandavańnie Druhoha internacyjanalnaha lehijona. Jano patrabuje ad kiraŭnictva Hienštaba spynić hety praces i zachavać Druhi lehijon u ciapierašnim statusie asobnaha bataljona abo navat pašyryć jaho da pałka ci bryhady.

Kamandavańnie «buntoŭnaha» lehijona pryvodzić šerah pryčyn, čamu pavinna być mienavita tak, a nie inakš.

Namieśnik kamandzira hetaha bataljona Andrej Śpivak u razmovie z BBC News Ukraina kaža, što ich padraździaleńnie źjaŭlajecca ŭnikalnym vajskovym arhanizmam, jaki, pa-pieršaje, maje vysoki ŭzrovień ukamplektavanaści, a taksama naładžanyja pracesy rekrutynhu zamiežnikaŭ, vialikuju kamandu aficeraŭ, jakija vałodajuć anhlijskaj i ispanskaj movami, uzmocnienuju kampanientu BPŁA i «inavacyjny padychod» da viadzieńnia bajavych dziejańniaŭ.

Jon źviartaje ŭvahu, što šturmavyja vojski, u skład jakich pavinny ŭvajści bajcy lehijona, pakul aficyjna navat nie stvorany.

«Što zaraz adbyvajecca? Nas prosta likvidujuć u «nikudy»», — zajaŭlaje vajskoviec.

«Zamiežniki» suprać «kryminalnikaŭ»

Inšaja prablema, pavodle słoŭ Śpivaka, u tym, što ŭ lehijon zamiežnikaŭ pryciahvali na dobraachvotnaj asnovie. Bolšaść ź ich, kaža namieśnik kambata, išli vajavać za Ukrainu praź simpatyju da hetaj krainy, a nie dziela hrašovaha zabieśpiačeńnia.

Pakolki jany majuć prava skasavać kantrakt z USU paśla šaści miesiacaŭ słužby, u lehijonie byli stvorany ŭmovy, kab utrymać ich, stvaryć kamfortnuju atmaśfieru, padrabiazna tłumačyć funkcyi na poli boju, a nie prosta addavać zahady «šturmavać pasadku».

Byvali vypadki, raspaviadaje Śpivak, kali zamiežnik pahadžaŭsia vykonvać zadańnie tolki paśla taho, jak detalova aznajomicca z płanam apieracyi, ubačyć videa z drona i zrazumieje dalejšy kirunak dziejańniaŭ na hetym učastku frontu.

Dla hetaha jon pavinien całkam daviarać svaim kamandziram i pabracimam z padraździaleńnia.

«Ich nielha prymusić šturmavać prosta tak, jany išli da nas u lehijon, bo daviarali nam», — padkreślivaje aficer.

Na jaho dumku, bolšaść zamiežnych dobraachvotnikaŭ usprymuć svoj «prymusovy pieravod» u šturmavyja vojski jak zdradu i skasujuć kantrakt.

Bolš za toje, pakolki «ŭkrainskija internacyjanalnyja lehijony» byli paznavalnym brendam i mnohija zamiežniki chacieli trapić mienavita siudy, likvidacyja hetych padraździaleńniaŭ moža być uspryniataja imi jak poŭnaja admova Ukrainy ad pryciahnieńnia zamiežnikaŭ u šerahi svajoj armii.

Adnavić ich davier da USU paśla hetaha budzie vielmi ciažka, upeŭnieny Andrej Śpivak.

«My byli jak centr pryciahnieńnia dla zamiežnikaŭ. Da nas išli, bo ŭ nas niama takich paniaćciaŭ, jak «nahnuć», «na…ć» (prymusić i padmanuć). U nas niama słužbovych rasśledavańniaŭ i ŭsiaho takoha. U nas jość kamanda. Da nas, paviercie, ludzi prosiacca ŭ lehijon».

Jašče adna padstava, kab nie likvidavać bataljon, — heta nieabchodnaść zaviaršyć raspracoŭku novaj kancepcyi padrychtoŭki i viadzieńnia boju, jakuju ŭžo amal hod raspracoŭvaje Druhi lehijon. U ahulnych rysach hetaja «inavacyjnaja kancepcyja», pa słovach namieśnika kambata, zaklučajecca ŭ tym, kab zrabić asnoŭny akcent na vykarystańni BPŁA, a nie piachoty padčas praviadzieńnia nastupalnych apieracyj.

Adzin z vajskoŭcaŭ Druhoha internacyjanalnaha lehijona (ukrainiec pa nacyjanalnaści) byŭ bolš adkryty ŭ pryčynach taho, čamu bajcy padraździaleńnia nie harać žadańniem dałučacca da šturmavych vojskaŭ.

Pa jaho słovach, ich chvaluje «sumniŭnaja reputacyja» šturmavych pałkoŭ. Idzie havorka pra nibyta vysokija straty, žorstkaje staŭleńnie kamandavańnia i vysoki pracent tak zvanaha śpieckantynhientu siarod šturmavikoŭ, h.zn. ludziej, jakija trapili na front ź miescaŭ pazbaŭleńnia voli.

«Ni dla kaho nie sakret, što šturmavyja vojski kamplektujucca šmat u čym za košt kryminalnikaŭ, ludziej z sudzimaściami… Heta značyć, u nas z adnaho boku budzie faktyčna «štrafbat», a z druhoha — zamiežniki, jakija pryjšli pa zakliku ŭłasnaha sumleńnia, jakija razumiejuć, nakolki niespraviadlivaja heta vajna, i hatovyja ryzykavać žyćciom dziela Ukrainy. Heta roznyja ludzi, i pavinny być kardynalna roznyja padychody da ich», — kaža jon.

Na jaho dumku, «žorstki padychod» da asabovaha sastavu, jaki praktykujecca ŭ šturmavych padraździaleńniach, całkam nie spracuje z zamiežnikami.

«Ludzi prosta abražajucca, razvaročvajucca i sychodziać. Jak heta ŭvohule z maralnaha punktu hledžańnia — stavić na adzin uzrovień dobraachvotnikaŭ i kryminalnikaŭ?» — aburajecca pradstaŭnik lehijona.

• 1
• 1
• 0
• 2
• 1
• 2
• 1
• 0