U Viciebsku praciahvajecca padrychtoŭka da budaŭnictva akvaparka, choć sami raboty pakul nie pačalisia — prajekt znachodzicca na stadyi raspracoŭki i ŭzhadnieńnia, piša Office Life.
Akvapark płanujuć stvaryć na bazie dvuch byłych karpusoŭ zavoda «Viciaź», jakija vykuplenyja inviestarami. Ahulnaja płošča budučaha kompleksu składzie kala 14 tysiač kvadratnych mietraŭ. Ź ich prykładna 3,5 tysiačy adviaduć pad vodnuju zonu.
Prajekt praduhledžvaje čatyry vodnyja horki, 16 vidaŭ łaźniaŭ, fitnes-centr, hatel, kavorkinh i vialikuju aŭtastajanku bolš čym na 300 mašyn. Adnačasova kompleks zmoža prymać kala 1300 čałaviek.
Prajektam zajmajecca kampanija «FS hrup». Spačatku inviestary vyvučali jeŭrapiejski vopyt i supracoŭničali ź jeŭrapiejskimi vytvorcami abstalavańnia. Ale niadaŭna pradstaŭniki kampanii naviedali Kitaj i praviali pieramovy z kitajskimi partniorami. Ciapier mienavita kitajski bok dapracoŭvaje technałahičnyja rašeńni dla akvaparka pad svajo abstalavańnie.
Pavodle pradstaŭnikoŭ harvykankama, inviestary ŭžo majuć nieabchodnyja dazvoły i ziamielny ŭčastak. Ciapier jany zajmajucca afarmleńniem dadatkovaj terytoryi i padrychtoŭkaj dakumientaŭ dla inžyniernych sietak.
Ułady čakajuć, što ŭ 2026 hodzie prajekt projdzie dziaržaŭnuju ekśpiertyzu i paśla hetaha pačniecca asnoŭny etap budaŭnictva.
Finansavać prajekt płanujuć za košt kredytnaj linii banka. Raniej kampanija taksama šukała dadatkovych inviestaraŭ, u tym liku siarod kitajskaha biznesu.
Upieršyniu pra namier pabudavać u Viciebsku akvapark viciebskija čynoŭniki zahavaryli vosieńniu 2024 hoda, a ŭ studzieni 2025‑ha staršynia Viciebskaha harvykankama Alaksiej Hierojeŭ paviedamiŭ pra kančatkova pryniataje rašeńnie i najaŭnaść inviestara.
Kali płany ździejśniacca, to Viciebsk stanie trecim abłasnym centram paśla Minska i Hrodna, u jakim pabudujuć akvapark.
Akramia taho, u Biełarusi takija abjekty jość ciapier taksama ŭ Žłobinie, Maładziečnie, Kobrynie, Pružanach i ahraharadku Aziory pad Hrodnam.
Kamientary