U Homieli asudzili zasnavalnika art-vioski i jašče traich źniavolenych pa spravie Hajuna
Pravaabaroncam stała viadoma, što zasnavalniku art-vioski «Čyrvony Kastryčnik» Kiryłu Kraŭcovu byŭ vyniesieny prysud, jaki nabyŭ moc, paviedamiła «Homielskaja viasna». U abłasnym sudzie jaho abviaścili vinavatym pavodle č. 1 i 2 art. 361‑4 KK za paviedamleńnie «Biełaruskamu Hajunu», jaki fiksavaŭ pierasoŭvańnie rasijskich vojskaŭ pry nastupie na Ukrainu z terytoryi Homielščyny.
Kiryła Kraŭcova vyzvalili z-pad varty. Pa infarmacyi vydańnia «Fłahštok», jamu prysudzili 4 hady abmiežavańnia voli («chatniaja chimija»).
Pa tym ža abvinavačvańni była asudžanaja 47‑hadovaja žycharka Mazyra Hanna Bahinskaja. Prysud taksama pakul vyśviatlajecca, ale dakładna viadoma, što žančynu źniavolili, prysudziŭšy joj albo pazbaŭleńnie voli ŭ kałonii, albo abmiežavańnie voli z nakiravańniem va ŭstanovu.
Jašče adzin palityčny prysud byŭ vyniesieny taksama žycharu Mazyra. Pa anałahičnym artykule asudzili Dźmitryja Karniejčyka. Pravaabaroncam viadoma, što vyniesieny jamu prysud źviazany z pazbaŭleńniem voli. Sutnaść abvinavačvańniaŭ pakul vyśviatlajecca, ale najbolš imavierna, što źniavolili Karniejčyka taksama ŭ spravie «Biełaruskaha Hajuna».
Čarhovy prysud — znoŭ u dačynieńni žycharki Mazyra. 40‑hadovuju Luboŭ Rahožkinu asudzili na abmiežavańnie voli biez nakiravańnia ŭ kałoniju.
Jašče adzin asudžany za apošni čas — Andrej Jankovič, 39‑hadovy IT-admysłoviec z Homiela, rodam z Rečycy. Dakładny prysud zastajecca nieviadomym.
Akramia taho, pravaabaroncy daviedalisia pra novaha zatrymanaha, vierahodna, pa spravie «Hajuna». Heta Michaił Vaha — 28‑hadovy ŭradženiec Homiela, vypusknik himnazii № 71 i Biełaruskaha nacyjanalnaha techničnaha ŭniviersiteta, dzie jon vučyŭsia na fakultecie infarmacyjnych technałohij i robatatechniki.
Vaha źjaŭlajecca stvaralnikam startapa HandEnergy — partatyŭnaj zaradnaj pryłady dla smartfonaŭ, jakaja vypracoŭvaje elektraenierhiju praź miechaničny ruch. Pra jaho vynachodnictva ŭ 2017 hodzie pisali biełaruskija i zamiežnyja ŚMI, u tym liku hałoŭnaja praŭładnaja hazieta krainy. Michaił šmat padarožničaŭ i žyŭ u krainach Jeŭropy i ZŠA. U śniežni jon byŭ zatrymany ŭ Homieli.
Za palityku asudzili kandydatku bijałahičnych navuk, łaŭreatku stypiendyi Łukašenki dla talenavitaj moładzi
Inžyniera, jaki zapuskaŭ treciuju liniju minskaha mietro, asudzili za «Hajuna»
55‑hadovaha žychara Mazyra adpravili za kraty pa papularnym palityčnym artykule
Mieniedžara z chołdynha «Amkador» asudzili za «sadziejničańnie ekstremizmu»
Ciapier čytajuć
Małodšy syn Sachaščyka abvieščany źnikłym bieź viestak. Vyhladaje, jon vajavaŭ za Rasiju81
Kamientary