Bialacki: Azaronka ŭ kałonii ciarpieć nie mohuć, vyklučajuć adrazu
Nobieleŭski łaŭreat Aleś Bialacki ŭ novym vypusku «TOKu» raskazaŭ, čamu ŭ kałonii viaźni hladziać pieradačy Skabiejevaj, a Azaronka nie mohuć pieranosić.
Aleś Bialacki pryznajecca, što da zatrymańnia naohuł nie viedaŭ, chto takaja rasijskaja prapahandystka Volha Skabiejeva i što za pieradača «60 minut». A kali trapiŭ u źniavoleńnie, i susiedzi pa kamiery jaje ŭklučali, to pratestavaŭ:
«Kali pieršyja miesiacy (…) ŭ kamiery jaje ŭklučali, ja pratestavaŭ kožny raz i patrabavaŭ, kab vyklučyli».
Adnak, jak adznačaje Bialacki, z časam, asabliva paśla pačatku poŭnamaštabnaj vajny va Ukrainie, jaho staŭleńnie da pieradačy źmianiłasia:
«Ja pačaŭ sam užo hladzieć i sam prasić, kab mnie hety čas u kamiery vydzielili mienavita na hetuju pieradaču. Usio astatniaje hladzicie, što chočacie — muzyku tam, kino, ale dajcie mnie pahladzieć [pieradaču Skabiejevaj]».
Na dumku Bialackaha, u toj pieradačy, niahledziačy na prapahandu, šmat faktury. Mienavita heta i cikaviła pravaabaroncu.
«Skabiejeva vykarystoŭvaje fakturu vielmi roznuju. Jana padaje siužety ź niejkich zamiežnych srodkaŭ masavaj infarmacyi, jakija datyčać mižnarodnaha žyćcia i adnosin. Naprykład, Jeŭrapiejskaha sajuza i Ukrainy, Ukrainy z ZŠA, Rasii z ZŠA. Heta ŭsio idzie ŭ jaje takimi linijami. Tam dastatkova infarmacyi, nie treba vyšukvać jak krupinki».
Hałoŭnaja prablema pieradač Skabiejevaj — heta interpretacyja infarmacyi. Tamu treba ŭmieć vydzielić z hetaha patoku fakty.
«Kamientary — voś u hetym sabaka zakapany. Jany dajuć heta tak, jak im treba. Jany śmiajucca, ździekujucca, pačynajuć jorničać. Voś jany ŭsio heta pakazvajuć: «Heta ž usio Zachad hniły, my — rasijanie, my takija, my siakija». I heta zachodzić ruskamu narodu. Treba skazać, što masa rasijan usprymaje na ŭra voś taki padychod.
Ale kali ty siadziš i jak by heta ŭsio adkidvaješ i pakidaješ tolki fakturu, to dastatkova, kab nabracca davoli bahata čaho», — tłumačyć Aleś.
Jak davodzić Bialacki, navat kali rasijskaja prapahanda vybiraje tolki toje, što joj vyhadna, i navat kali kahości sprabujuć vystavić voraham, sutnaść zastajecca zrazumiełaj:
«Pakazvali Naŭsiedu, prezidenta Litvy. Jon zaŭsiody vystupaŭ tak narmalna. Jany chočaš-nie chočaš (tamu što jon inšaha nie havaryŭ) pakazvajuć jaho pryncypovuju pazicyju. Tamu što jon zaŭsiody pryncypovy, jon havoryć toje, što jon dumaje i pa adnosinach da Rasii, i pa adnosinach da vajny, i pa salidarnaści z Ukrainaj, i pa prablemach Jeŭraźviaza.
Ty słuchaješ i razumieješ jaho pazicyju. Ja tut užo kali pryjechaŭ i havaryŭ ź im, razmaŭlaju i baču — u pryncypie toje, što rasijanie pakazvajuć jaho jak voraha, ale dajuć infarmacyju, jakuju ja mahu ŭsprymać i davać užo svaje acenki jahonaj pazicyi paśladoŭnaj, heta narmalna».
Bialacki adznačaje, što pieradačy biełaruskich prapahandystaŭ nie hladziać u kałonii.
«Prosta ich vyklučajuć adrazu. Jak tolki Azaronak — adrazu pačynajucca maty-pieramaty. Jaho nie cierpiać, ciarpieć nie mohuć. Prosta čysta na čałaviečym uzroŭni jon vyklikaje takuju ahidu. Voś hety jaho napor… Adrazu: «Pieraklučajcie. Nie, tolki nie heta»».
Padsumoŭvajučy, Bialacki adznačaje, što rasijskija teleprapahandysty «pracujuć na bolš vysokim uzroŭni, bolš chitra. I infarmacyjna ichnija pieradačy bolš usio ž taki nasyčanyja».
«Chaču ŭziać intervju» — «Nie» — «Davajcie ja vas sfatahrafuju» — «Nie». Bialacki raskazaŭ pra sustreču ŭ kałonii z Pratasievičam
«Azaronak — vydatny žurnalist». Namieśnik ministra infarmacyi prakamientavaŭ strymy Azaronka
Bialacki: Bolšaść ludziej nie padtrymlivaje Łukašenku, heta ja skažu adnaznačna
Kamientary