Navukoŭcy śćviardžajuć: isnuje miaža kolkaści kałoryj, jakija moža spalić čałaviek
Navat samyja ciahavityja ludzi na płaniecie majuć fizijałahičnuju miažu spalvańnia enierhii, jakuju niemahčyma pieraadoleć u doŭhaterminovaj pierśpiektyvie biez nastupstvaŭ dla zdaroŭja. Heta paćviardžajuć vyniki novaha daśledavańnia, pra jakoje piša The Wall Street Journal.
Mnohija z nas paśla praciahłych kaladna-navahodnich śviataŭ vyrašyli viarnucca ŭ trenažornuju zału sa spadzievam za košt bolšaj intensiŭnaści zaniatkaŭ spalić nazapašanyja kałoryi. Adnak, jak tłumačyć The Wall Street Journal, pahavaryŭšy z ekśpiertami, u spalvańnia enierhii jość svaja miaža.
Ultramarafoncy, jakija zvyčajna pieraadolvajuć dystancyi, bolšyja za marafonskuju, mohuć spalvać bolš za 10 000 kałoryj za dzień, ale taki pakazčyk nie moža zastavacca stabilnym na praciahu miesiacaŭ trenirovak.
Pavodle daśledavańnia, apublikavanaha ŭ časopisie Current Biology, paśla prykładna šaści miesiacaŭ bieśpierapynnych nahruzak navat samyja treniravanyja atlety dasiahajuć «mietabaličnaj ściany». Hety doŭhaterminovy limit u siarednim u 2,5 raza vyšejšy za bazavy ŭzrovień mietabalizmu — minimalnuju kolkaść kałoryj, nieabchodnuju arhanizmu ŭ stanie spakoju dla dychańnia i inšych žyćciova važnych funkcyj.
Jak tłumačyć adzin z saaŭtaraŭ daśledavańnia Endru Best — antrapołah z Masačusieckaha kaledža humanitarnych navuk, jaki śpiecyjalizujecca na bijałohii čałavieka, — bolšaść ludziej nie nabližajecca da hetaha limitu. Dla čałavieka vahoj kala 68 kh bazavy mietabalizm składaje prykładna 1700 kałoryj. Kab dasiahnuć stoli, treba spalvać kala 4000 kałoryj štodnia na praciahu mnohich miesiacaŭ. Dla bolšaści zvyčajnych ludziej heta nievykanalnaja zadača.
Choć arhanizm zdolny na karotkačasovyja ryŭki — naprykład, padčas šmatdzionnych honak spartsmieny mohuć spalvać u 7 razoŭ bolš za normu — padtrymlivać taki temp doŭha niemahčyma. Kali hety limit pieravyšajecca ciaham praciahłaha terminu, arhanizm pačynaje raschodavać ułasnyja zapasy tłušču i białku, što viadzie da straty masy cieła.
Jak raskazvaje Best, jaho kamanda na praciahu prykładna hoda nazirała za 14 spartsmienami (dźviuma žančynami i tuzinam mužčyn), jakija zajmajucca vidami sportu na ciahavitaść. Daśledčyki prasili atletaŭ pić vadu, jakaja źmiaščała izatopnyja indykatary kisłarodu i vadarodu, a zatym praz analiz mačy vymiarali, jak chutka hetyja malekuły zasvojvalisia arhanizmam.
Hetaje daśledavańnie, jak i papiarednija, pakazała, što spartsmieny mohuć pieraadoleć «mietabaličny barjer» padčas karotkaterminovych pikaŭ. U takija dni jany spalvajuć prykładna ŭ siem razoŭ bolš kałoryj, čym u stanie spakoju. Adnak padtrymlivać taki temp praciahły čas niemahčyma: arhanizm pačynaje raschodavać nie tolki tłušč, ale i ŭłasnyja białkovyja reziervy, što viadzie da straty masy cieła.
Best paraŭnoŭvaje hety praces ź finansavym doŭham. Vy možacie žyć «u minus» tydni ci navat miesiacy, ale rana ci pozna arhanizm zapatrabuje viarnuć vydatkavanaje. U jakaści prykładu jon pryvodzić atleta, jaki mienš čym za dva miesiacy pieraadoleŭ Apałackuju ściežku daŭžynioj kala 3500 km. Na praciahu ŭsiaho maršrutu jaho mietabalizm pracavaŭ u čatyry razy intensiŭniej za normu, ale paśla finišu jamu spatrebiŭsia ceły miesiac amal poŭnaha biaździejańnia, kab myšcy adnavilisia, a stračanaja vaha viarnułasia.
Jak adznačajuć aŭtary, atrymanyja imi vysnovy majuć krytyčnaje značeńnie dla prafiesijnaha sportu. Płan intensiŭnych trenirovak, jaki vydatna pracuje na praciahu dvuch miesiacaŭ, moža stać praźmiernym i razburalnym, kali jaho sprabavać vytrymać paŭhoda. Takim čynam, navat u samych ciahavitych ludziej na płaniecie jość unutrany «abmiežavalnik», jaki zaścierahaje arhanizm ad poŭnaha samarazbureńnia.
«Miesiačny płaciež paciahnie na 340 rubloŭ». Što budzie ŭ Biełarusi z mabilnym internetam?15
Kamientary