Čamu atłuścieńnie viartajecca? Akazvajecca, tłuščavyja kletki majuć «pamiać»

Jak piša Dziennik Naukowy, navukoŭcy vyjavili miechanizm, adkazny za efiekt jo-jo, jaki zaklučajecca ŭ vahańni masy cieła paśla pieryjadu schudnieńnia, jakoje pačatkova zdavałasia paśpiachovym. Nazva pachodzić ad cacki, jakaja apuskajecca i padymajecca kštałtu majatnika.

Daśledčyki ź Fiederalnaj politechničnaj škoły ŭ Ciurychu (ETH Zurich) vyjavili, što tłuščavyja kletki «pamiatajuć» stan atłuścieńnia praz epihienietyčnyja źmieny. 

Jak kletki prahramujuć cieła

Epihienietyka — heta sukupnaść faktaraŭ, takich, jak ład žyćcia ci dyjeta, jakija ŭpłyvajuć na ekspresiju hienaŭ bieź źmieny samoj paśladoŭnaści DNK. «Epihienietyka kaža kletcy, jakoj jana źjaŭlajecca i što pavinna rabić», — vobrazna tłumačyć Łaŭra Chinte z ETH Zurich.

Epihienom dziejničaje jak nabor pieraklučalnikaŭ, uklučajučy ci vyklučajučy hieny i ŭpłyvajučy na funkcyjanavańnie arhanizma.

Pravodziačy dośledy na myšach, navukoŭcy zaŭvažyli, što atłuścieńnie vyklikaje charakternyja epihienietyčnyja źmieny ŭ tłuščavych kletkach. Što važna, hetyja źmieny zachoŭvajucca navat paśla straty vahi. 

Heta aznačaje, što tłuščavyja kletki «prahramavanyja» na viartańnie da stanu atłuścieńnia. Pakolki tłuščavyja kletki «pamiatajuć» atłuścieńnie, ludzi, jakija schudnieli, bijałahična schilnyja znoŭ nabirać vahu. 

My atrymali heta ŭ evalucyjnym pakiecie 

Daśledavańni, praviedzienyja na ludziach, paćviardžajuć hetyja vysnovy. Analiz tłuščavaj tkanki ludziej da i paśla baryjatryčnaj apieracyi pakazaŭ, što epihienietyčnyja źmieny ŭ tłuščavych kletkach zachoŭvajucca niahledziačy na značnuju stratu masy cieła. 

Hetyja kletki chutčej pahłynajuć pažyŭnyja rečyvy i chutčej razmnažajucca, što spryjaje paŭtornamu naboru vahi. Pavodle acenak, da 85% ludziej, jakija stracili bolš za 10% masy cieła, nabirajuć jaje na praciahu hoda.

Efiekt jo-jo šmat kamu moža padavacca dziŭnym kapryzam pryrody. Ale, kali pahladzieć z evalucyjnaj pierśpiektyvy, jon maje svoj bijałahičny sens.

Evalucyjna tak skłałasia, što arhanizm imkniecca zachoŭvać enierhiju na vypadak niedachopu ježy, što histaryčna było častaj prablemaj. Voś čamu tłuščavyja kletki «prahramavanyja» na nazapašvańnie tłušču, a nie jaho stratu.

Ci možna ścierci hetuju «pamiać»?

Na žal, nie. Va ŭsiakim razie, niemahčyma heta zrabić u karotkaterminovaj pierśpiektyvie. 

Jak kaža Chinte, «tłuščavyja kletki — doŭhažychary. U siarednim jany žyvuć dziesiać hadoŭ, pierš čym naš arhanizm zamianiaje ich novymi kletkami».

Navukoŭcy miarkujuć, što ŭ budučyni, mahčyma, udasca raspracavać sposaby ŭpłyvu na hetyja epihienietyčnyja markiery. Na siońnia ž nie isnuje mietadu, jaki dazvoliŭ by pazbavicca hetaj «pamiaci» tłuščavych kletak. 

Pakul što najbolš efiektyŭny sposab praduchilić efiekt jo-jo — nie nabirać lišniaj vahi z samaha pačatku. Kali ž čałaviek usio ž atłuścieŭ, to vyjście tut — dobra tak źmianić styl žyćcia: adpaviednaja dyjeta, dastatkovaje vysypańnie, fizičnaja i razumovaja aktyŭnaść.

«Mahčyma, što dastatkova doŭhaje zachavańnie panižanaj masy cieła pryviadzie da ścirańnia hetaj «pamiaci» — miarkuje Chinte.

• 2
• 0
• 0
• 0
• 2
• 1
• 0
• 0