Bił i Chiłary Klintan pahadzilisia dać pakazańni Kanhresu ab suviaziach z Epštejnam. Admova pahražała im kryminalnaj spravaj
U miljonach abnarodavanych Miniustam ZŠA dakumientaŭ pa spravie Epštejna Klintan upaminajecca mnostva razoŭ, tam taksama jość fatahrafii byłoha prezidenta ź finansistam.
Były prezident ZŠA Bił Klintan i jaho žonka Chiłary (jakaja ŭ svoj čas zajmała pasadu dziaržsakratara) pahadzilisia dać pakazańni Kamitetu pa nahladzie Pałaty pradstaŭnikoŭ ZŠA. Hety orhan pa inicyjatyvie respublikancaŭ rasśleduje suviazi asudžanaha za piedafiliju finansista Džefry Epštejna z upłyvovymi fihurami, paviedamlaje Bi-bi-si.
U miljonach apublikavanych Miniustam ZŠA dakumientaŭ pa spravie Epštejna Klintan zhadvajecca mnostva razoŭ, tam taksama jość fatahrafii byłoha prezidenta ź finansistam.
Ale paciarpiełyja ad dziejańniaŭ Epštejna nikoli nie vystaŭlali abvinavačvańniaŭ eks-prezidentu abo jaho žoncy, a sami Klintany kažuć, što ničoha nie viedali ab jaho złačynstvach.
Namieśnik kiraŭnika ofisa Biła Klintana paviedamiŭ u svaich sacyjalnych sietkach: «Były prezident i byłaja dziaržsakratar tudy pryjduć».
Apošni raz były prezident ZŠA davaŭ pakazańni pierad adnym z kamitetaŭ Kanhresa ŭ 1983 hodzie, heta byŭ Džerald Ford.
Pałata pradstaŭnikoŭ, dzie bolšaść naležyć respublikancam, mieła namier pravieści hałasavańnie pa pytańni ab pryciahnieńni Klintanaŭ da kryminalnaj adkaznaści za admovu pryjści na słuchańni pa poźvie, vypisanaj Kamitetam pa nahladzie.
U Kanhresa ZŠA jość prava zatrymlivać tych, chto admaŭlajecca dać jamu pakazańni abo pradastavić tyja ci inšyja dakumienty. Kanhres taksama moža adpravić Ministerstvu justycyi zapyt na pieraśled vinavatych u niepavazie abo paprasić sud vynieści rašeńnie, jakoje abaviazvaje vykanać pozvu, jakuju vydali zakanadaŭcy.
Niepavaha da Kanhresa ZŠA źjaŭlajecca kryminalnym złačynstvam, jakoje karajecca štrafam da 100 tys. dalaraŭ i źniavoleńniem na termin da adnaho hoda.
Kiraŭnik Kamiteta pa nahladzie, respublikaniec Džejms Komier kazaŭ, što sužency Klintany byli vyklikanyja dla dačy pakazańniaŭ kala piaci miesiacaŭ tamu, ale tak i nie źjavilisia. Zatym kamitet prahałasavaŭ za ich pryciahnieńnie da kryminalnaj adkaznaści, pry hetym rašeńnie padtrymali niekalki demakrataŭ.
Što kažuć Klintany
Advakaty Klintanaŭ kazali, što vypisanyja im pozvy niemahčyma vykanać, i patłumačyli, što sužency ŭžo pradastavili tuju «abmiežavanuju infarmacyju» pra Epštejna, jakoj jany vałodali.
Klintany nastojvali, što vyrašyli nie davać pakazańni Kanhresu, pakolki hetyja słuchańni majuć vidavočnuju palityčnuju matyvacyju. «Jany źjaŭlajucca ŭsiaho tolki sprobaj zhańbavać palityčnych apanientaŭ pa zahadzie prezidenta Trampa», — ličać były prezident i dziaržsakratar.
U paniadziełak aficyjny pradstaŭnik Biła Klintana Anchiel Ureńja zajaviŭ, što sužency źjaviacca na słuchańniach u Kanhresie. «Jany dobrasumlenna viali pieramovy, a vy — nie, — napisaŭ jon u adras Kamiteta pa nahladzie. — Jany vam raskazali pad prysiahaj usio, što viedali, ale vam da hetaha niama spravy. Jany čakajuć mahčymaści stvaryć precedent, jaki budzie tyčycca ŭsich».
Sumiesnyja zdymki Klintana z Epštejnam byli zrobleny ŭ roznyja pieryjady z 1990‑ch da pačatku 2000‑ch hadoŭ, heta značyć jašče da taho, jak Epštejn byŭ aryštavany pa abvinavačvańni ŭ pieravozcy ludziej z metaj sieksualnaj ekspłuatacyi.
Na adnym z fota były prezident adlustravany ŭ basiejnie na vile Epštejna, na inšym, vierahodna, lažyć u vańnie.
Pradstaŭniki Klintana nastojvajuć, što toj spyniŭ usie suviazi z Epštejnam da taho, jak stała viadoma ab jaho złačynstvach.
Pry hetym jany pryznajuć, što Bił Klintan čatyry razy lotaŭ na pryvatnym samalocie Epštejna ŭ 2002 i 2003 hadach, a taksama sustrakaŭsia ź finansistam u Ńju-Jorku ŭ 2002-m. U toj čas jon taksama naviedvaŭ ńju-jorkskuju kvateru miljaniera.
Amierykanskija ŚMI paviedamlali, što Klintan lotaŭ na samalocie Epštejna značna čaściej: bolš za 20 razoŭ, i časam — biez supravadžeńnia ahientaŭ Sakretnaj słužby, naležnaha jamu dla achovy jak byłomu prezidentu.
Kamientary