Chutčej za ŭsio, spynili pieraśled chatnich chimikaŭ, a voś z kałonij nichto — ci amal nichto — nie vyjšaŭ.
5 sakavika Alaksandr Łukašenka padpisaŭ ukaz ab pamiłavańni 18 asudžanych. 15 ź ich byli asudžanyja pa palityčnych artykułach. 11 pamiłavanych — žančyny. Jość žančyna, jakaja znachodzicca na apošnich terminach ciažarnaści. Jość dziaŭčyna, jakuju aryštavali ŭ 16 hadoŭ. Jość dźvie siamiejnyja pary.
Śpiecpradstaŭnik prezidenta ZŠA pa Biełarusi Džon Koŭł padziakavaŭ Łukašenku, ale nahadaŭ, što Tramp daručyŭ vyzvalić usich palitviaźniaŭ.
Biełaruskija ŭłady tradycyjna nie kažuć, chto ŭvachodzić u hrupu pamiłavanych, pakidajučy intryhu — a ci adpuścili ŭvohule kahości?
Vyhladaje na toje, što pamiłavańnie 5 sakavika 2026 hoda amal całkam paŭtaraje pieradnavahodniaje pamiłavańnie, jakoje adbyłosia 30 śniežnia 2025 hoda. Chutčej za ŭsio, i tady, i ciapier havorka idzie pieravažna pra chatnich chimikaŭ. Jany taksama asudžanyja pa palityčnych artykułach, taksama byli niezakonna represavanyja, ale nie ŭvachodziać u lik tych «1200 palitviaźniaŭ», pra jakich kažuć Tramp i pravaabaroncy.
«Naša Niva» raspytała žančyn, jakija niadaŭna vyzvalilisia z žanočych kałonij u Homieli i ŭ Zareččy. Jany nie viedajuć pra inšych ciažarnych (i asabliva na apošniaj stadyi ciažarnaści), aproč Natalli Levaj, jakaja była indyvidualna pamiłavanaja 19 lutaha 2026 hoda. A schavać takuju infarmacyju ŭ zamknionaj prastory składana, amal niemahčyma.
Niama nijakich śviedčannaŭ pra vyzvaleńnie z kałonij kahości ź siamiejnych par — a kolkaść takich asudžanych sužencaŭ, naturalna, nievialikaja.
Što da pamiłavanaj dziaŭčyny, jakuju pasadzili ŭ 16 hadoŭ, to tut jość dva varyjanty. Kali heta palitźniavolenaja, to pa ŭzroście jana adpaviadaje tolki Alaksandry Pulinovič. Dziaŭčynie prysudzili 10 hadoŭ i 3 miesiacy źniavoleńnia pa spravie «Čornych sałaŭjoŭ» — hrupa maładzionaŭ abjadnałasia ŭ jačejku na čale z 16‑hadovaj ukrainkaj Maryjaj Misiuk, kab dapamahać Ukrainie. Misiuk addali na radzimu jašče ŭ listapadzie 2025 hoda.
Pulinovič — druhaja dziaŭčyna ŭ «Sałaŭjach», astatnija — chłopcy. Ich prysud ustupiŭ u siłu ŭ lutym 2026 hoda. Kali pamiłavanaja nasamreč Pulinovič, to, mahčyma, jana nie paśpieła dajechać da kałonii. U takim razie jaje mahli b adpuścić ź SIZA.
Zrešty, tearetyčna mahła być pamiłavanaja i niejkaja niepalityčnaja dziaŭčyna.
Ciapier čytajuć
Pamiatajecie Piatrušu, jaki vydziraŭ pravady «dydžejam Pieramien»? Jaho pieraviali ŭ treciuju lihu čynoŭnikaŭ paśla miesiacaŭ biespracoŭja10
Kamientary