U Słonimskim rajonie da viadomaj vałanciorki čynoŭniki biez papiaredžańnia pryjšli paličyć sabak, jakich jana ŭtrymlivaje za ŭłasny košt
U lutym čynoŭniki nie mieli pretenzij da Aksany Saŭčuk i vykazvali joj padziaku, a ŭžo ŭ sakaviku pryjšli paličyć vyratavanych žyvioł, piša BGmedia.
Vałanciorku Aksanu Saŭčuk viedajuć nie tolki žychary Słonima, ale i biełarusy pa ŭsioj krainie. Niekalki razoŭ siužet pra jaje zdymaŭ dziaržkanał ANT, pisaŭ teksty «Słonimski vieśnik».
Dziaržaŭnyja ŚMI zachaplalisia dabrynioj žančyny, jakaja pryśviaciła svajo žyćcio vyratavańniu kinutych žyvioł. Vidać, u sakaviku 2026 hoda staŭleńnie miascovych uład da Aksany Saŭčuk źmianiłasia.
Aksana Saŭčuk 12 sakavika raskazała na svajoj staroncy ŭ Instagram, što ranicaj da jaje biez papiaredniaha apaviaščeńnia pryjechała kamisija z udziełam pradstaŭnikoŭ Słonimskaha rajvykankama i ŽKH. Meta vizitu — pieraličyć sabak, jakija ŭtrymlivajucca na ŭčastku. Žančyna admoviłasia puskać ich na terytoryju, zajaviŭšy, što ličyć takija dziejańni parušeńniem svaich pravoŭ jak ułaśnika.
Aksana Saŭčuk śćviardžaje, što vizit staŭ vynikam šmatlikich skarhaŭ z boku susieda. Pavodle jaje słoŭ, toj nakiravaŭ užo niekalki dziasiatkaŭ zajaŭ, u jakich ukazvaje na antysanitaryju, niepryjemny pach i vialikuju kolkaść žyvioł.
Pry hetym jana padkreślivaje, što ŭsie sabaki ŭ jaje zarehistravany, a sama jana zajmajecca dapamohaj biazdomnym žyviołam. Pavodle jaje słoŭ, žyvioły znachodziacca ŭ jaje časova — da momantu, pakul im nie znojduć novych haspadaroŭ.
«Čynoŭniki pryjazdžajuć da čałavieka, tak, jaki viadzie vałanciorskuju dziejnaść, jaki płacić padatkaŭ na dźvie tysiačy, u jakoj zarehistravanyja ŭsie sabaki, razumiejecie? Pryjazdžajuć paštučna paličyć pahałoŭna sabak! Da mianie dadomu, u pryvatny dom, u pryvatnuju ŭłasnaść!» — aburajecca Aksana.
Jana zajaviła, što ŭ jaje tak šmat žyvioł z-za taho, što ŭ Słonimie niama dziaržaŭnaha punkta časovaha ŭtrymańnia žyvioł.
Admovu ŭpuścić kamisiju žančyna patłumačyła tym, što vizit byŭ niečakanym, a sami ŭmovy pravierki — niearhanizavanymi.
Žančyna nie zhodna z pretenzijami nakont sanitarnaha stanu ŭčastka, adznačajučy, što pražyvaje ŭ sielskaj miascovaści, dzie najaŭnaść pachaŭ, źviazanych z utrymańniem žyvioł, źjaŭlajecca zvyčajnaj źjavaj.
Saŭčuk zajaviła, što nie maje namieru pierajazdžać abo admaŭlacca ad utrymańnia žyvioł. U jakaści rašeńnia prablemy jana prapanuje raźvivać sistemu prytułkaŭ i dapamohu ŭ prybudovie biazdomnych sabak.
Słonimski rajvykankam: «Nieabchodnaść pryviadzieńnia ŭtrymańnia žyvioł u adpaviednaść z zakanadaŭstvam»
Na jaje videa adreahavaŭ Słonimski rajvykankam. Jon apublikavaŭ zajavu ŭ svaich sacsietkach:
«Pakolki hetaja situacyja vyklikała hramadski rezanans, ličym važnym prajaśnić jaje pieradhistoryju i faktyčnyja akaličnaści.
Padstavaj dla vyjezdu kamisii pasłužyŭ aficyjny zvarot, jaki pastupiŭ u abłvykankam ad susieda hetaj hramadzianki. U svajoj zajavie susied ukazaŭ na toje, što na terytoryi pryvatnaha domaŭładańnia ŭtrymlivajecca vialikaja kolkaść sabak, jakija, pavodle jaho infarmacyi, nie zarehistravany va ŭstanoŭlenym paradku, u svaju čarhu ad takoj vialikaj kolkaści žyvioł šmat šumu i niepryjemnaha pachu.
Było pryniata rašeńnie ažyćciavić kamisijny vyjezd na miesca. Meta vizitu — pravieryć fakty, vykładzienyja ŭ zajavie, i, u vypadku vyjaŭleńnia parušeńniaŭ dziejnaha zakanadaŭstva (u tym liku tych, što tyčacca rehistracyi i ŭtrymańnia žyvioł), pryniać adpaviednyja miery.
Adnak u momant prybyćcia kamisii dostup na terytoryju domaŭładańnia dla vykanańnia słužbovych abaviazkaŭ žycharkaj rajona zabiaśpiečany nie byŭ. Svaju pazicyju haspadynia matyvavała tym, što na terytoryi ŭ hety momant nie prybrana.
U hetaj situacyi členy kamisii prajavili łajalnaść i prapanavali haspadyni paznačyć zručny dla jaje čas, kali jana zmoža pryniać kamisiju i zabiaśpiečyć dostup dla ahladu terytoryi i žyvioł, jakija tam utrymlivajucca. Na hetu prapanovu hramadzianka adkazała, što joj nieabchodna papiarednie paraicca z advakatam.
Pakazalna, što adrazu paśla vizitu kamisii haspadynia apieratyŭna źviarnułasia ŭ sielski vykanaŭčy kamitet i zarehistravała jašče vosiem sabak. Hety fakt uskosna paćviardžaje abhruntavanaść praviedzienaj pravierki i nieabchodnaść pryviadzieńnia ŭtrymańnia žyvioł u adpaviednaść z zakanadaŭstvam.
Na hety momant situacyja zastajecca na kantroli. Dalejšyja dziejańni buduć pradprymacca z ulikam normaŭ zakanadaŭstva i ŭ miežach ustanoŭlenaha rehłamientu pracy sa zvarotami hramadzian».
Raniej u čynoŭnikaŭ pretenzij da Aksany Saŭčuk nie było, jany dziakavali joj
U toj ža dzień, kali Aksana Saŭčuk apublikavała videa, u asobnym poście jana prymacavała adkaz Upraŭleńnia ŽKH Hrodzienskaha abłvykankama ad 27 lutaha na jaje zvarot u administracyju Łukašenki.
U im jana prasiła pamienšyć joj padatak na ŭtrymańnie žyvioł. U liście čynoŭniki vykazvali padziaku Aksanie Saŭčuk i pretenzij nie mieli, ale ŭ dapamozie admovili: «dziejnym zakanadaŭstvam nie praduhledžana finansavańnie vałanciorskaj dziejnaści».
Pa pytańni stvareńnia ŭ Słonimskim rajonie punkta ŭtrymańnia žyvioł paviedamili, što ŭ Słonimie ŭ 2025 hodzie nieadnarazova pravodzilisia pracedury dziaržaŭnaj zakupki pa vybary padradnaj arhanizacyi na raspracoŭku prajektnaj dakumientacyi pa abjekcie «Budaŭnictva punkta časovaha ŭtrymańnia žyvioł pa vulicy Aniščyka, 90 u Słonimie». Adnak pa pryčynie adsutnaści ŭdzielnikaŭ pracedury dziaržzakupka nie adbyłasia.
«Upraŭleńnie žyllova-kamunalnaj haspadarki abłvykankama vykazvaje vam padziaku za aktyŭnuju dziejnaść u dapamozie bieznahladnym, kinutym i stračanym žyviołam. Dziakuj vam za čułaść, spahadlivaść i spačuvańnie. Spadziajemsia, što vašy dobryja spravy stanuć prykładam dla mnohich ludziej», — havorycca ŭ liście.
Aksana Saŭčuk pračytała zajavu Słonimskaha rajvykankama. U novych videa i pastach jana paprasiła nieabyjakavych biełarusaŭ dapamahčy apłacić joj daŭhi pierad vieterynarnymi klinikami i padatki na ŭtrymańnie chatnich žyvioł.
Jašče Aksana Saŭčuk raskazała, što joj praciahvajuć telefanavać z ŽKH z prośbaj zabrać kinutych žyvioł, jakich jany znachodziać na vulicach Słonima. Ale pry hetym nie saromiejucca prychodzić da jaje z pravierkami, kab pieraličyć jaje hadavancaŭ.
Padpisčyki Aksany Saŭčuk vykazvajuć joj padtrymku i krytykujuć čynoŭnikaŭ. Pad jaje pastami i videa sotni kamientaryjaŭ.
-
«Ja tak zrazumieła, što vam treba ich usich usio roŭna rehistravać. A značyć, i padatak płacić za ŭsich. Daaaa, niama słoŭ».
-
«Jak padatak u dziaržavu — dyk abaviazkova, jak prykłaści namahańni i dapamahčy ŭ pamianšeńni padatku — dyk nie».
-
«Dziakuj za čułaść, spahadlivaść i spačuvańnie, ale padatak zapłacicie. Achacha… Kanstruktyŭnaje vyrašeńnie prablemy».
-
«Zamiest taho, kab usim składam vykankama pryjechać i padziakavać Aksanie za toje, što jana robić ich pracu, dapamahčy joj u pryborcy terytoryi, pryniać rašeńnie ab pamianšeńni padatku na čužych sabak, jany prosta ździekujucca!»
-
«Ahidna. Navošta ja heta ŭbačyła. Tut chacia b nie zaminać, dyk nie, jašče pałki ŭ koły ŭstaŭlajuć. I čamu vałanciory płaciać padatki? Jany robiać toje, što pavinna rabić cyvilizavanaja dziaržava».
Kamientary
"Słuhi" naroda, mať vašu, napłodił łukaš darmojedov!
V darmojedy, nado, avtomatom, zapisyvať vsiech činuš i mientov, sovieršienno biespoleznyje prosłojki, sozdannyje dla toho, čtoby usłožniať žizń ludiam, da dieržať vłasť dla łukašienko, sidia na šieje u Naroda !