Za arhanizacyju ŭ 2020 hodzie buntu ŭ Babrujskaj kałonii asudžanamu za narkotyki viaźniu 6 razoŭ padaŭžali termin
Svoj termin pa narkatyčnym artykule — 7 hadoŭ — jon užo adsiedzieŭ, a jamu dadali bolš — 9 hadoŭ. Pakul va ŭsich termin źmianšajecca, u jaho tolki raście.
Na fonie navin pra vyzvaleńnie častki palitviaźniaŭ Mikoła Dziadok raskazaŭ pra dramatyčny los 48‑hadovaha minčanina Ułada Vakulčyka, jaki znachodzicca ŭ zamknionym kole sudoŭ i ŠIZA i jakoha całkam možna ličyć palitviaźniem, choć jaho imia nie było viadoma pravaabaroncam.
Mikoła piša, što znajomy ź im asabista. Jany sustrelisia ŭ kałonii №9 u Horkach, na pramzonie.
Niahledziačy na toje, što kamunikavać ź Dziadkom było niebiaśpiečna («niepaźbiežnaje ŠIZA»), jon nie pabajaŭsia i padyšoŭ.
Jany znajšli ahulnuju movu: Uład vypisvaŭ «Novy Čas», padtrymlivaŭ pratesty «niedarmajedaŭ» u 2017-m, «aryjentavaŭsia ŭ palitycy.»
«Usie, ci amal usie my ŭdzielničali ŭ revalucyi 2020‑ha na vulicach svaich haradoŭ. Paśpieŭ paŭdzielničać u joj i Uład — ale ŭ kałonii №2 horada Babrujska,» piša Dziadok.
Heta mahło być toje, što aryštanty admaŭlalisia vykonvać kamandu «adboj», ci plaskali ŭ ładki sa słovami «Sychodź!», «navat skłali samarobnyja ŭlotki», śćviardžaje Dziadok.
Administracyja niejki čas ciarpieła niepadparadkavańnie. Ale kali stała zrazumieła, u jaki bok dźmie viecier, pačalisia žorstkija represii. Usim udzielnikam — prafulik «ekstremizm». Najbolš aktyŭnym — «krytaja» turma abo 411‑y artykuł.
A Ułada Vakulčyka administracyja pryznačyła arhanizataram.
Z Babrujska jaho pavieźli ŭ PK-1 Navapołacka. Pa słovach Dziadka, tam jon ledź nie zahinuŭ ad prabadnoj jazvy straŭnika. Jaho vyratavali daktary Navapołackaj haradskoj balnicy. Praz 25 dzion paśla apieracyi jaho pasadzili ŭ ŠIZA.
Pakuty praciahvalisia dalej — u Horkach jaho vanitavała kryvioj, raspaviadaje Mikoła. Z-za taho, što nie pryniali paślaapieracyjny bandaž, utvaryłasia hryža, i pa hety dzień Uład znachodzicca ŭ čarzie na apieracyju.
Jak piša Dziadok, Vakulčyku dadavali termin šeść razoŭ.
3 žniŭnia 2021 hoda ŭ Navapołacku prachodzić sud — dadajuć 1 hod i 3 miesiacy za «złosnaje niepadparadkavańnie administracyi» i viazuć u PK-9 (Horki).
16 červienia 2022 hoda sud u Horkach — dadajuć 1,5 hoda i viazuć u PK-20 (Mazyr).
21 vieraśnia 2023 hoda sud u Mazyry — dadajuć 2 hady i viazuć u PK-11 (Vaŭkavysk).
5 červienia 2024 hoda — sud u Vaŭkavysku. Dadajuć 1 hod. Viazuć u PK-8 (Orša).
3 studzienia 2025 hoda — sud u Oršy. Dadajuć 1,5 hoda. Znoŭ viazuć u Horki.
30 kastryčnika 2025 hoda — sud u Horkach. Dadajuć 2 hady. Znoŭ viazuć u Mazyr.
«Zaraz Uład u mazyrskim PKT, ź jakoha jaho pieryjadyčna kidajuć u ŠIZA. Ź pieršapačatkovych siami jaho termin zaraz składaje 16 hadoŭ i 3 miesiacy. Šasnaccać hadoŭ! Prosta ŭjavicie sabie, jak heta, kali va ŭsich padčas adsiedki termin źmianšajecca, a ŭ ciabie — raście.
Siońnia Uład, adbyŭšy svaje 7 hadoŭ pa artykule 328, praciahvaje znachodzicca ŭ niavoli vyklučna za ŭdzieł u niehvałtoŭnych akcyjach supracivu ŭ Babrujskaj kałonii šeść hadoŭ tamu. I navat kali dapuścić, što jaho 7‑hadovy termin byŭ pryznačany zakonna, zaraz jon siadzić u turmie jak palitviazień.
Jaho žyćciu pahražaje niebiaśpieka. Navat dla maładoha chłopca niekalki hadoŭ u ŠIZA i PKT — heta najciažejšaje vyprabavańnie. Uładu ž užo 48 hadoŭ», — piša Dziadok.
Kamientary
"Viesna", požałujsta, nie zatiahivajtie s priznanijem! Naš čiełoviek pohibajet v zastienkach.
Vy navošta ŭ zahałovak vystaŭlajecie musarskuju łuchtu? Jakija narkotyki? Navošta na čałavieka viešajecie jarłyk "narkamana"?
Kali ŭžo dublujecie nazvy artykułaŭ łukašysckaha "kryminalnaha kodeksu", to chacia b udakładniajcie, za što mienavita čałavieka pasadzili pieršapačatkova: ZA PARU KUSTOŬ KANOPLAŬ! I za hetyja "narkotyki" čałavieku dali 9 hadoŭ!
I heta syjdzie z ruk administracyi?!
Kim by jon nie byŭ - vyzvalajcie. Hodzie ź jaho.