Łatuška: Nie mahu vyklučyć, što na niejkim etapie Mielnikava mahła trapić u pastku śpiecsłužbaŭ

Palityk adznačyŭ, što Ahienctva ŭnutranaj biaśpieki Polščy dahetul rasśleduje kryminalnuju spravu, raspačatuju prakuraturaj, pa fakcie hvałtoŭnaha pazbaŭleńnia voli Mielnikavaj. U miežach jaje źnikłaja śpikierka maje status paciarpiełaj.

«Usio astatniaje moža być acenkaj, śpiekulacyjaj», — skazaŭ Łatuška.

Pavodle Łatuški, viadomyja fakty pakazvajuć, što Mielnikava «zaŭsiody zajmała vielmi kankretnuju i adkrytuju pazicyju suprać režymu [Alaksandra] Łukašenki». Jon padkreśliŭ, što mienavita dziakujučy jejnym asabistym namahańniam Sienat Polščy ŭ studzieni 2025 hoda pryznaŭ Kaardynacyjnuju radu biełaruskim parłamientam u vyhnańni, była pryniataja rezalucyja PARIE ab niepryznańni Łukašenki prezidentam Biełarusi paśla «vybaraŭ» u 2025 hodzie i ab pryznańni KR, Abjadnanaha pierachodnaha kabinieta i Śviatłany Cichanoŭskaj.

Taksama jana za svaje hrošy apłaciła kanfierencyju datyčna adkaznaści Łukašenki za złačynstvy, kali ad jaje finansavańnia admovilisia ZŠA. Tamu, na dumku Łatuški, dziejnaść Mielnikavaj «dakładna nie adpaviadała» intaresam śpiecsłužbaŭ Biełarusi.

«Ja nie mahu śćviardžać, kim jana była. Ja ničoha nie vyklučaju. Ja tolki vykažu fakty. Jana była ŭdzielnicaj našaj kamandy, jakaja efiektyŭna pracuje nad pryciahnieńniem Łukašenki da adkaznaści i ŭpieršyniu ŭ historyi pryviała da pačatku rasśledavańnia prakuroram Mižnarodnaha kryminalnaha suda», — skazaŭ Łatuška.

Pavodle jaho, jana tearetyčna mahła b spynić ci pieraškodzić šmat jakim inicyjatyvam, jakija zaminali intaresam biełaruskich i rasiejskich śpiecsłužbaŭ, ale nie zrabiła hetaha.

«Pierachodziačy ad faktaŭ da śpiekulacyi, ja nie mahu vyklučyć, što na niejkim etapie jana mahła trapić u pastku śpiecsłužbaŭ. Što adbyłosia dalej, ja nie viedaju. Śledstva viaduć aficyjnyja orhany Polščy, jakija, mahčyma, viedajuć pra heta bolš», — skazaŭ jon.

Datyčna źjaŭleńnia fotazdymkaŭ Mielnikavaj ź Miensku, Łatuška nie vyklučaje, što heta było zroblena admysłova pierad vizitam u Miensk śpiecpasłańnika prezidenta ZŠA Džona Koŭła. Pry hetym, pavodle jaho, zdymki pakazvajuć tolki «vielmi padobnuju da Anžaliki asobu», jakaja, mahčyma, była źniataja ŭ Biełarusi, a «ŭsio astatniaje — zdahadki».

U cełym palityk nie vyklučaje źjaŭleńnia taksama intervju prapahandystaŭ ź Mielnikavaj z metaj, u tym liku, dyskredytavać vybary ŭ Kaardynacyjnuju radu.

Ahułam Łatuška adznačyŭ, što biełaruskija demakratyčnyja siły nie majuć prava pravodzić ułasnuju kontrvyviednuju dziejnaść na terytoryi krainaŭ Jeŭrasajuza — heta vyklučnaja kampietencyja miascovych śpiecsłužbaŭ. Tym nie mienš, asobu Mielnikavaj pravieryli z dapamohaj «Bajpoła» i Kibierpartyzanaŭ. Da taho ž jana prajšła praviarańnie Ministerstvam unutranych spraŭ i administracyi i vyviedvalnymi słužbami Polščy pierad atrymańniem polskaha hramadzianstva.

Pavodle jaho, biełaruskija demakratyčnyja siły «sutykajucca z najvialikšym supracivam u svajoj historyi i dziejańniami, nakiravanymi na destabilizacyju i dyskredytacyju našaj pracy z boku śpiecsłužbaŭ režymu Łukašenki». Łatuška spasłaŭsia na «adnaho polskaha ministra», jaki skazaŭ jamu, što «80 % namahańniaŭ śpiecsłužbaŭ Łukašenki nakiravanyja mienavita na źniščeńnie i destabilizacyju demakratyčnych siłaŭ Biełarusi». Supraćstajać hetamu samastojna niemahčyma, skazaŭ palityk.

Historyja źniknieńnia

Za sakavik 2025 hoda Anžalika Mielnikava niekalkimi apieracyjami vyvieła na asabisty rachunak usiu pieraviedzienuju sumu hrantu dla Kaardynacyjnaj rady (kala 107 tysiač dalaraŭ), a taksama ŭsie pakinutyja srodki na rachunku, u tym liku pryznačanyja na prajekty «Partyzanskaha Telehramu» i dapamohu ŭ žurnalisckich rasśledavańniach (kala 30 tysiač dalaraŭ).

Ahułam Mielnikava vyvieła z rachunku bolš za 150 tysiač, apošniaja apieracyja była zroblenaja 24 sakavika 2024 hoda. Na nastupny dzień, 25-ha, jana pierastała vychodzić na suviaź.

Paźniej stałasia viadoma, što byłaja śpikierka KR pakinuła terytoryju Polščy i Jeŭraźviazu 26 lutaha 2025 hoda — praź Vialikuju Brytaniju i Šry-Łanku prybyła ŭ Abjadnanyja Arabskija Emiraty, dzie jejnyja ślady zhubilisia. Da hetaha jana kantaktavała z paplečnikami z Kaardynacyjnaj rady praź videasuviaź, nie była na asabistych sustrečach: kazała, što chvareje.

Rasśledavalniki taksama paviedamlajuć pra mahčymyja suviazi Mielnikavaj z pracaŭnikom KDB Biełarusi Alaksiejem Łabiejevym. Jašče ŭ 2022 hodzie jana, jak śćviardžajecca, pravaliła pieršy test na palihrafie, jaki pravodziła inicyjatyva BYPOL, adnak paśla druhoha testu jaje pryniali. Byłaja pracaŭnica polskaj kontrvyviedki Hanna Hraboŭska-Siviec miarkuje, što Mielnikava mahła być zavierbavanaja jašče ŭ Biełarusi. Ciapier za infarmacyju pra miesca jejnaha pierabyvańnia abiacajuć 10 tysiač jeŭraŭ uznaharody.

Amal praz hod, 19 sakavika 2026-ha, zjavilisia zdymki žančyny, padobnaj da Mielnikavaj, u adnym ź mienskich spartzałaŭ, jaki pačaŭ pracavać tolki ŭ studzieni 2025 hoda. Składana skazać, sapraŭdnyja heta fota ci dypfejk, stvaryć jaki ŭ siońniašnich umovach nie nadta składana.

Adnak paśla ich publikacyi «Naša Niva» datelefanavałasia da svajakoŭ Mielnikavaj. Baćka byłoj śpikierki KR zapeŭniŭ, što taja «daŭnavata» žyvie ŭ Biełarusi, «jana nie źnikła, žyvaja i zdarovaja». Pavodle mužčyny, dačka paprasiła nie telefanavać joj i zaŭsiody zvonić sama, ale sa schavanaha numaru. Apošniaja ichnaja razmova adbyłasia zimoj.

• 2
• 0
• 4
• 4
• 0
• 1
• 0
• 0