«Žyć niejak treba». Jašče adzin viadomy biełaruski śpiavak źbirajecca pracavać taksistam
Pavieł Kłyšeŭski, salist hrupy «Tiani-Tołkaj», paprasiŭ padzialicca dośviedam tych, chto pracuje ŭ taksi — ci varta tudy iści. Kansultacyju paabiacaŭ jaho były kaleha pa scenie — a ciapier i pa čornym śpisie — śpiavak-taksist Alaksiej Chlastoŭ.
«Žyćcio tak skłałasia, što našy kancerty zabaronienyja, a žyć niejak treba. Dumaju pajści pracavać u taksi na arandavanaj mašynie (elektryčnaj). Chłopcy, chto taksuje, padkažycie: ci jość sens, ci možna zarablać? Ci na arendzie heta nierealna?» — napisaŭ Pavieł Kłyšeŭski ŭ Threads. Dadaŭ, što zarobki jamu abiacajuć ad 2500 rubloŭ.
U kamientarach źjaviŭsia Alaksiej Chlastoŭ — śpiavak byŭ vymušany pajści pracavać u taksi praz toje, što trapiŭ u apału — i paabiacaŭ padzialicca dośviedam u svoj vychodny. Darečy, i rodny brat Alaksieja — Andrej Chlastoŭ — jaki taksama raniej śpiavaŭ, ciapier pracuje taksistam. Zorkami za rulom najomnaha transpartu biełarusaŭ užo nie ździviš.
Raniej Pavieł Kłyšeŭski sprabavaŭ zarabić u inšaj śfiery. U 2023 hodzie jon adkryŭ bar, jaki nazvaŭ u honar hrupy — «Tiani-Tołkaj». Ale papracavać spakojna paśpieŭ tolki čatyry dni — potym ułady zakryli bar. Spačatku siłaviki namiakali na toje, byccam bar zamoviŭ rekłamu ŭ «ekstremistaŭ». Potym ułady apublikavali aficyjnuju viersiju — abvinavacili miesca ŭ antysanitaryi.
Paśla «Tiani-Tołkaj» usio ž adnaviŭ pracu — miarkujučy pa instahramie, bar isnavaŭ da vieraśnia 2025 hoda. Pavieł Kłyšeŭski raspavioŭ u kamientarach, što pradaŭ jaho letaś.
A sioleta hurt čakała jašče adna niepryjemnaść. Kalektyvu «Tiani-Tołkaj» aficyjna zabaroniena vystupać u Biełarusi, ale artysty mahli źbiracca i hrać u studyi — zapisvali pieśni dy rabili strymy dla prychilnikaŭ.
U instahramie Pavieł raspavioŭ, što zdymali pamiaškańnie jany 14 hadoŭ. Całkam samastojna artysty abstalavali hukavuju studyju. Śpiavak z bolem u hołasie raskazvaje, jak i što jany rabili. Ale naprykancy sakaviku ŽREA, u jakoha hurt arandavaŭ pamiaškańnie, paviedamiła, što nie budzie praciahvać arendu. Pryčyn dla hetaha nijakich nie było. Nie vielmi składana zdahadacca, što reč znoŭ u šmatznačnym «nu vy ž sami ŭsio razumiejecie».
Vyzvalić pamiaškańnie treba było nastolki terminova, što nie chapiła času navat vyvieźci ŭsiu meblu, zroblenuju na zamovu.
«Nu ničoha, pačynali hrać u haražy, i ciapier haraž dzie-niebudź arandujem, budziem adtul strymić, — kaža Pavieł pa-za kadram. — Budziem žyć».
Ciapier čytajuć
Jak skłaŭsia los internacyjanalnych dziaciej, jakich vychoŭvali ŭ Žodzinie ŭ pieršym u Biełarusi dziciačym domie siamiejnaha typu?5
Kamientary