Alaksiej Chlastoŭ, jaki pajšoŭ u taksisty, staŭ hierojem internetu. Biełarusy zapuścili fłešmob, kab padtrymać śpievaka z čornaha śpisu
Imavierna, pryznacca ŭ tym, što źmianiŭ mikrafon na rul, śpievaku było nie prosta. Ale, atrymaŭšy chvalu padtrymki, Chlastoŭ ledź strymlivaje ślozy. Kaža: «Vy padaryli mnie druhoje žyćcio!».
Nahadajem: čutki pra toje, što Alaksiej Chlastoŭ pačaŭ pracavać u taksi, chadzili daŭno — dyj sam śpiavak namiakaŭ na heta ŭ svaich sacsietkach. Ale tolki niadaŭna jon vyrašyŭ rasstavić kropki nad «i».
Niekalki dzion tamu Chlastoŭ apublikavaŭ videa, jak śpiavaje za styrnom mašyny svaju pieśniu «Kuda isčieźli vsie moi miečty», a pasažyrki padpiavajuć jamu.
«Siabry, ni dla kaho ŭžo nie sakret, što ja kiruju taksi i voś takija cudoŭnyja pasažyry sa mnoj katajucca», — napisaŭ artyst.
Pracuje śpiavak u «Jandeks.Taksi» ŭ katehoryi biznes-kłasa. Pryčyna takoj radykalnaj źmieny dziejnaści nie vielmi aryhinalnaja dla Biełarusi. U 2023 hodzie stała viadoma, što Alaksiej Chlastoŭ trapiŭ u čorny śpis artystaŭ — to-bok ciapier jon nie moža vystupać navat na karparatyvach.
Paśla pryznańnia Alaksieja biełarusy niečakana zładzili fłešmob u sacsietkach. Niechta publikavaŭ fota ci videa sa śpievakom, dzialiŭsia historyjami, źviazanymi ź im. Chtości zapisvaŭ roliki, jak śpiavaje svaje lubimyja pieśni artysta.
I šmat chto pisaŭ, što ciapier chočaš nie chočaš, a pryjdziecca jeździć na taksi. Sustrakalisia navat prapanovy zrabić Chlastovu svajo «taksi, u jakim śpiavajuć» — bo złavić śpievaka praz «Jandeks» nie vielmi prosta.
Fłešmob atrymaŭsia sapraŭdy suśvietnym, bo padklučylisia biełarusy, jakija ciapier žyvuć u samych roznych krainach — ad Ispanii da Tajłanda. Adna z žančyn, naprykład, apublikavała videa, jak jaje maleńkaje dzicia ŭ Arhiencinie ŭ majcy ź biełaruskim arnamientam słuchaje pieśniu Chlastova.
So vsiem uvažienijem!
Paŭdzielničali i viadučyja Artemis Achpaš dy Kaciaryna Rajeckaja.
Karystalniki Threads taksama aktyŭna dałučylisia da fłešmobu — śpievaku navat pryjšłosia stvaryć akaŭnt, kab padziakavać usim. A adnym z samych papularnych staŭ žart: «U Minsku jość dva abjekty, jakija chočuć naviedać usie: Śniežnaja karaleva ŭ «Halerei» i taksi Alaksieja Chlastova».
Artyst zapisaŭ videa, u jakim, zdajecca, ledź strymlivaje ślozy radaści i kaža, što ludzi padaryli jamu druhoje žyćcio.
Brat biełaruskaj karalevy pryhažości trapiŭ u reanimacyju ŭ Azierbajdžanie4
Brat biełaruskaj karalevy pryhažości trapiŭ u reanimacyju ŭ Azierbajdžanie
Małady biełarus nie chacieŭ siadzieć u Rasii za narkotyki, tamu prydumaŭ, jak chutka vyjści z kałonii — i vyjšaŭ na ŭkrainskija pazicyi pad Pakroŭskam44
Kamientary