Dzie ciapier Andrej Chlastoŭ — rodny brat Alaksieja Chlastova, jaki taksama raniej śpiavaŭ?

Andrej i Alaksiej Chlastovy naradzilisia ŭ vielmi prostaj siamji — nijakich znakamitych svajakoŭ, jakija b za ruku mahli pryvieści na scenu, u ich nie było. Tata pracavaŭ budaŭnikom, maci była apieratarkaj EVM.

I Andrej, i Alaksiej u svoj čas skončyli PTV — atrymali pracoŭnyja śpiecyjalnaści. Dvaccać hadoŭ tamu Alaksiej Chlastoŭ raspaviadaŭ, što paśla 9 kłasa zavuč vietliva paprasiŭ jaho syści sa škoły. U vyniku chłopiec trapiŭ u praftechvučylišča №148 — atrymlivaŭ prafiesiju elektramantažnik siłavoha aśviatlalnaha abstalavańnia. Ale sam žartavaŭ: dziakuj Bohu, što nivodnaha dnia nie pryjšłosia pracavać u hetaj śfiery — bo ŭ ludziej chacia b śviatło jość.

— U mianie ŭ kvatery niejak źnikła śviatło, dyk ja nie viedaŭ, dzie probki, dźvie hadziny bieź śviatła siadzieŭ, pakul tata nie pryjechaŭ. Jak ja vučyŭsia? Bolš śpiavaŭ, čym na ŭrokach siadzieŭ.

Andrej ža skončyŭ vučylišča mietalistaŭ, pa adukacyi ślesar-ramontnik. Papracavaŭ usiaho dva tydni — padčas praktyki na zavodzie Vaviłava.

Na scenu chłopcy trapili praz ansambl «Ravieśnik» pry Pałacy pijanieraŭ Frunzienskaha rajona Minska — tam spačatku pačaŭ zajmacca Andrej (jon na 6 hadoŭ starejšy za Alaksieja), a potym pryvioŭ u kalektyŭ małodšaha brata.

Andrej jašče zaśpieŭ čas, kali možna było vystupać «pa kamsamolskaj linii» — navat u Hiermaniju jeździŭ z kancertami ŭ składzie taho samaha «Ravieśnika». Potym padčas vučoby ŭ PTV śpiavaŭ konkursach samadziejnaści.

Pavialičyć

U dzievianostyja braty razam tancavali step — prasoŭvańniem maładych artystaŭ zajmaŭsia sam Anatol Jarmolenka.

U VNU nichto ź ich nie pastupiŭ. Andrej kazaŭ, što paśla PTV adrazu trapiŭ u armiju (dzie praciahnuŭ śpiavać u ansambli). A potym zakruciła darosłaje žyćcio — klikali na konkurs to ŭ Jurmale, to ŭ Viciebsku. Usio niejak nie da pastupleńnia było.

Alaksiej ža sprabavaŭ stać studentam Instytuta kultury, ale zavaliŭ pierakaz pa biełaruskaj movie. A potym taksama nie zmoh znajści čas dla vučoby.

Pavialičyć

Andrej, chacia i byŭ mienš papularnym za brata, vypuściŭ u 2006 hodzie svoj albom pad nazvaj «Spasibo tiebie» i vystupaŭ ź im. «Kamsamołka» pisała pra kurjozny vypadak, kali hazieta dała anons kancerta «A. Chlastova», a potym u redakcyju źviarnułasia aburanaja «niesapraŭdnym Chlestovym» čytačka.

Zorka Alaksiej upeŭniena źziała na biełaruskaj estradzie — dy i nie tolki. Jon pabyvaŭ na «Słavianskim bazary» i «Novaj Chvali», udzielničaŭ u «Pieśni hoda», atrymoŭvaŭ šmatlikija ŭznaharody, u 2010 hodzie zapisaŭ sumiesnuju pieśniu ź niamieckim muzykam i pradziusaram Brendanam Stoŭnam.

Kali-nikali braty śpiavali duetam.

Pośpiech Andreja byŭ bolš ścipłym, ale i jon vystupaŭ. Jašče ŭ 2018 hodzie telekanał STB raspaviadaŭ pra jaho jak pra salista hurta «Hlest-off».

Pavialičyć

U 2023 hodzie stała viadoma, što Alaksiej Chlastoŭ trapiŭ u čorny śpis artystaŭ — to-bok ciapier jon nie moža vystupać navat na karparatyvach. Rajonnyja haziety, jakija ŭ 2021 hodzie brali ŭ artysta intervju, pačali vydalać navat staryja hutarki.

Niadaŭna Alaksiej pryznaŭsia, što pracuje ŭ taksi. Biełarusy pa ŭsim śviecie zładzili maštabny fłešmob u padtrymku śpievaka.

A kudy ž padzieŭsia Andrej Chlastoŭ? Niadaŭna ŭ svaich sacyjalnych sietkach jon raspavioŭ, što taksama ciapier pracuje ŭ taksi.

• 0
• 0
• 0
• 0
• 0
• 0
• 0
• 0