U Biełarusi dystancyjnika chacieli zvolnić, bo jon try hadziny nie byŭ na suviazi. Čym usio skončyłasia
U Mahilovie najmalnik chacieŭ zvolnić dystancyjnaha rabotnika za try hadziny biez suviazi ŭ pracoŭny čas. U spravu ŭmiašaŭsia prafsajuz.
Načalnik zapatrabavaŭ zvolnić rabotnika na dystancyjcy za prahuł paśla taho, jak toj try hadziny nie vychodziŭ na suviaź u pracoŭny čas. Adnak prafsajuzny juryst patłumačyŭ, što kłasičnaje paniaćcie prahułu da dystancyjnych supracoŭnikaŭ u takim vypadku nie prymianialnaje, piša MyFin.
Pazicyja najmalnika
Incydent adbyŭsia na adnym z pradpryjemstvaŭ horada. Kiraŭnik nastojvaŭ na zvalnieńni mieniedžara-dystancyjnika pa artykule za prahuł.
Pavodle jaho słoŭ, supracoŭnik z 14:00 da 17:00 nie adkazvaŭ na zvanki i paviedamleńni, nie zachodziŭ u karparatyŭny čat i nie pradstaviŭ ranišniuju spravazdaču, jakuju abiacaŭ.
Sam rabotnik patłumačyŭ adsutnaść na suviazi bytavoj avaryjaj. U jaho kvatery prarvała trubu, i try hadziny jon likvidavaŭ prablemu, adklučyŭšy elektryčnaść.
Čamu heta nie prahuł
Inśpiektar pracy Taćciana Sudakova rastłumačyła, što zvalnieńnie za prahuł u kłasičnym razumieńni da dystancyjnych rabotnikaŭ nie prymianiajecca.
Prahuł praduhledžvaje adsutnaść na pracoŭnym miescy, jakoje znachodzicca pad kantrolem najmalnika, a ŭ dystancyjnaha supracoŭnika takoha miesca niama.
Pry hetym adsutnaść na suviazi ŭ pracoŭny čas, niazdadzienaja spravazdača abo ihnaravańnie zvankoŭ sapraŭdy mohuć ličycca dyscyplinarnym prastupkam. Za jaho pracadaŭca maje prava abjavić zaŭvahu abo vymovu.
Kali ž u rabotnika ŭžo jość niaźniataje spahnańnie i jon paŭtorna parušaje dyscyplinu, zvalnieńnie mahčymaje, ale ŭžo pa inšaj padstavie — za nieadnarazovaje parušeńnie pracoŭnych abaviazkaŭ.
Što vyrašyŭ prafsajuz
U vypadku z mahiloŭskim mieniedžaram prafsajuz dapamoh dakazać, što avaryja ŭ kvatery była ŭvažlivaj pryčynaj. U vyniku patrabavańnie najmalnika ab zvalnieńni pryznali niepravamiernym i admianili.
Ciapier čytajuć
Što viadoma pra Maksima Palanskaha i Mikałaja Śvirydava — biełaruskich alpinistaŭ, jakija źnikli ŭ harach Kyrhyzstana4
Kamientary