Kaleha biełarusa-vachtavika prainfarmavaŭ jaho žonku, što toj u Rasii žyvie ź inšaj. I pačałosia

Biełarusu Mikałaju Lebiedzievu ŭ Arłoŭskaj vobłaści Rasii prysudzili try hady kałonii za źbićcio svajho siabra-ziemlaka S. Šviadoŭskaha, jakoha ŭsie viedali pa mianušcy «Raul».

Pra dramatyčnyja padziei, jakija razhortvalisia ŭ pakoi haścinicy «Mcenskaja», varta raskazać padrabiazna.

Lebiedzieŭ i Šviadoŭski pachodziać z adnoj miascovaści ŭ Biełarusi, raniej byli susiedziami, a paśla stali katacca na pracu da adnaho i taho ž rasijskaha ipešnika. Siabry pracavali armaturščykami.

U Lebiedzieva ŭ Biełarusi zastałasia sužycielka pa imieni Julija. Kali ŭ vieraśni 2024 hoda Šviadoŭski byŭ doma pamiž vachtami, jana spytała ŭ jaho pra svajho mužčynu. Ale tady Šviadoŭski ničoha skazać nie moh, bo Lebiedzieŭ ź im u adnym internacie nie žyŭ.

Kali ž praź niekalki tydniaŭ Šviadoŭski viarnuŭsia na vachtu ŭ Mcensk, to navioŭ daviedki i daznaŭsia što Lebiedzieŭ žyvie ź inšaj žančynaj. Tady jon vyrašyŭ adspravazdačycca pra heta Julii — napisaŭ paviedamleńnie z sumnaj praŭdaj u WhatsApp.

14 kastryčnika 2024 hoda Šviadoŭski viarnuŭsia ŭ pakoj raniej času, bo praz doždž pracu spynili. Tam užo byli čaćviora jaho susiedziaŭ, častka ź ich pili.

Praź niekatory čas u pakoj pryjšoŭ Lebiedzieŭ, užo pjany. Spačatku razmova pamiž im i Šviadoŭskim išła spakojna: Lebiedzieŭ raskazaŭ, što pasvaryŭsia ź Julijaj mienavita tamu, što Šviadoŭski paviedamiŭ joj pra supiernicu. Adnak chutka ton razmovy źmianiŭsia — pamiž mužčynami pačaŭsia kanflikt na pavyšanych tanach.

Lebiedzieŭ staŭ nanosić Šviadoŭskamu, jaki lažaŭ na svaim łožku, aplavuchi. Śviedki naličyli kala dziesiaci takich udaraŭ.

Susiedzi sprabavali spynić Lebiedzieva, ale jon zaklikaŭ ich nie ŭmiešvacca i zapeŭniŭ, što sam vyrašyć, kali varta skončyć źbićcio. Sam Šviadoŭski ŭ hety čas tolki prasiŭ, kab jaho pakinuli ŭ spakoi, spasyłajučysia na toje, što choča spać, a zaŭtra jamu treba na pracu.

Susiedzi pajšli na pierakur, a kali viarnulisia, to pabačyli, što Šviadoŭski lažyć na padłozie, a Lebiedzieŭ praciahvaje kałacić jaho. Šviadoŭski ŭ hety momant zakryvaŭsia rukami, prasiŭ prabačeńnia i kazaŭ, što bolš nikoli nie budzie pisać žoncy Lebiedzieva. Niahledziačy na heta, Lebiedzieŭ nanios jamu jašče 4—5 udaraŭ, raźbiŭšy hubu da kryvi.

Šviadoŭski ź ciažkaściu padniaŭsia i sieŭ na svoj łožak. Lebiedzieŭ zahadaŭ jamu «być mužykom» i ŭstać. Kali Šviadoŭski padniaŭsia na nohi, Lebiedzieŭ, stojačy da jaho tvaram, ź vialikaj siłaj nanios adzin bakavy ŭdar ścisnutym kułakam pravaj ruki ŭ levy bok tvaru. Ad hetaha ŭdaru Šviadoŭski ŭpaŭ pamiž łožkami — i, pavodle śviedki, udaryŭsia hałavoj ab draŭlanuju pryłožkavuju tumbačku. Upaŭšy, jon zachrypieŭ i straciŭ prytomnaść, z rota pajšła kryvavaja piena.

Ubačyŭšy, nakolki surjoznaja situacyja, prysutnyja pasprabavali supakoić i adciahnuć Lebiedzieva, a taksama patelefanavali kalehu, jaki žyŭ u toj ža haścinicy na pieršym paviersie. Toj pryjšoŭ, zahavaryŭ ź Lebiedzievym na cyhanskaj movie i zahadaŭ jamu sychodzić, paśla čaho vyklikaŭ bryhadu chutkaj dapamohi. Pad hałavu nieprytomnaha Šviadoŭskaha padkłali padušku, kab toj nie zachłynuŭsia kryvioju.

U vyniku mužčynu advieźli ŭ balnicu z dyjahnazam zakrytaja čerapna-mazhavaja traŭma, udar hałaŭnoha mozhu ciažkaj stupieni, vostraja subduralnaja hiematoma sprava, aciok hałaŭnoha mozhu, koma I stupieni.

Na nastupny dzień Lebiedzieva zatrymali. Jon pryznaŭ vinu tolki častkova: maŭlaŭ, paru ŭdaraŭ było, ale kali adychodziŭ, to Šviadoŭski byŭ u prytomnaści. Ale jamu nie pavieryli.

U vyniku dziejańni Lebiedzieva kvalifikavali pavodle č. 1 st. 111 KK RF — naŭmysnaje pryčynieńnie ciažkaj škody zdaroŭju, niebiaśpiečnaj dla žyćcia čałavieka. Jamu pryznačana pakarańnie ŭ vyhladzie troch hadoŭ kałonii.

• 2
• 1
• 2
• 9
• 0
• 0
• 5
• 0