«Abaniemient na spakojnaje žyćcio anulavany». Kamandujučy Siłami BPŁA Ukrainy prakamientavaŭ nalot na Maskvu i znoŭ pryhraziŭ Łukašenku
«Justas — Aleksu Ryhoraviču» — Broŭdzi znoŭ u abraźlivaj formie źviarnuŭsia da Łukašenki.
Kamandujučy Siłami bieśpiłotnych sistem Ukrainy Robiert Broŭdzi, viadomy pad pazyŭnym «Madziar», prakamientavaŭ maštabnuju ataku BPŁA na Maskvu i Padmaskoŭje, jakaja adbyłasia ranicaj 17 maja, i źviarnuŭsia da biełaruskaha kiraŭnictva.
Broŭdzi nazvaŭ ataku i ciapierašnija mahčymaści Ukrainy «viersijaj 17.05».
Jon zajaviŭ, što «šansy zraŭnialisia» — ad hetaha dnia dla rasijskaj stalicy «skasavany adnabakovy abaniemient na spakojnaje žyćcio na Patrykach [elitny rajon Maskvy] i ŭ navakolli».
«Maskva ciapier nikoli nie śpić», — paździekavaŭsia jon.
Broŭdzi znoŭ u abraźlivaj formie źviarnuŭsia da Łukašenki. «Justas — Aleksu Ryhoraviču: važna, jak uvajści ŭ patrebnuju razmovu, ale jašče važniejšaje mastactva vychadu ź jaje. Łukašesku, pryhladvajsia da pierśpiektyŭ», — napisaŭ jon.
Broŭdzi znoŭ pierajnačyŭ proźvišča Łukašenki na Łukašesku — anałohija ź Nikałaje Čaŭšesku, dyktataram Rumynii, jakoha rasstralali ŭ vyniku narodnaha paŭstańnia 1989 hoda.
Hetyja zajavy byli zrobleny na fonie niadaŭnich słoŭ prezidenta Ukrainy Uładzimira Zialenskaha ad 15 maja, što Maskva aktyŭna sprabuje ŭciahnuć Minsk u vajnu i znoŭ vykarystać terytoryju Biełarusi dla praviadzieńnia svaich nastupalnych vajennych apieracyj.
Post Broŭdzi źjaŭlajecca pramym papiaredžańniem, što ŭ vypadku paŭtornaj ahresii ź biełaruskaha kirunku adkaz anałahičnymi srodkami čakaje i abjekty ŭ Biełarusi.
Učora kamandujučy Siłami bieśpiłotnych sistem Ukrainy taksama vystupiŭ ź biesprecedentnymi pahrozami na adras Łukašenki, jakoha nazvaŭ «haŭlajtaram».
«Minski haŭlajtar Łukašesku! My fiksujem pralot kožnaha asobnaha šachieda, jaki, skarystaŭšysia kalidorami Biełarusi, nakiroŭvajecca va Ukrainu, kožnuju tvaju frykcyju i chistańnie militarnaha adcieńnia…
Ty možaš kolki chočaš krucić vusy na kamieru i chłusić svajmu zastrašanamu narodu pra «niejtralitet», ale tvaje kancaviny ŭžo pa samyja plečy ŭ kryvavaj jušcy zabojstvaŭ mirnych ukraincaŭ.
Trek nastupny: kalidor dla zabojcaŭ = saŭdzieł = kasa», — napisaŭ Broŭdzi.
Kamientary