Kamandujučy Siłami bieśpiłotnych sistem Ukrainy vystupiŭ ź biesprecedentnymi pahrozami na adras Łukašenki, jakoha nazvaŭ «haŭlajtaram»

Kamandujučy Siłami bieśpiłotnych sistem Ukrainy nazvaŭ Alaksandra Łukašenku haŭlajtaram — tak padčas Druhoj suśvietnaj vajny nazyvali administrataraŭ akupavanych nacystami terytoryj. Broŭdzi taksama pierajnačyŭ proźvišča Łukašenki na Łukašesku — anałohija ź Nikałaje Čaŭšesku, dyktataram Rumynii, jakoha rasstralali ŭ vyniku narodnaha paŭstańnia 1989 hoda.

Zajava Broŭdzi prahučała 16 maja, na nastupny dzień paśla narady Uładzimira Zialenskaha z kiraŭnikami Hienštaba USU, Hałoŭnaha ŭpraŭleńnia raźviedki Ministerstva abarony, SBU i Słužby zamiežnaj raźviedki Ukrainy, jakaja prajšła ŭ piatnicu 15 maja. Pa vynikach toj narady Zialenski zrabiŭ niekalki zajaŭ, u jakich zhadaŭ i Biełaruś.

Narada ŭ Zialenskaha prajšła praź dzień paśla adnoj z samych masavych rasijskich rakietna-dronavych atak za čas vajny. U čaćvier 14 maja rasijanie vypuścili pa Ukrainie 731 rakietu i dron, pryčym asnoŭny ŭdar nanosiŭsia pa poŭnačy i zachadzie krainy. Jak minimum šeść pavietranych abjektaŭ vykarystali padčas ruchu pavietranuju prastoru Biełarusi. U Kijevie ad udaru rakiety abrynuŭsia padjezd žyłoha doma. Zahinuli 24 žychary, siarod ich dvoje dzietak. Dziasiatki ludziej byli paranienyja.

Raniej Uładzimir Zialenski zajaŭlaŭ, što ŭ Biełarusi raźmieščanyja abjekty, jakija vykarystoŭvajucca dla naviadzieńnia rasijskich šachiedaŭ na celi va Ukrainie. Akramia taho, va Ukrainie byŭ źbity pavietrany šar, jaki zalacieŭ ź Biełarusi i, miarkujuć ukraincy, byŭ retranślataram dla rasijskich šachiedaŭ. 

«Minski haŭlajtar Łukašesku! — piša kamandujučy Siłami bieśpiłotnych sistem Ukrainy. — My fiksujem pralot kožnaha asobnaha šachieda, jaki, skarystaŭšysia kalidorami Biełarusi, nakiroŭvajecca va Ukrainu, kožnuju tvaju frykcyju i chistańnie militarnaha adcieńnia…

Ty možaš kolki chočaš krucić vusy na kamieru i chłusić svajmu zastrašanamu narodu pra «niejtralitet», ale tvaje kancaviny ŭžo pa samyja plečy ŭ kryvavaj jušcy zabojstvaŭ mirnych ukraincaŭ.

Trek nastupny: kalidor dla zabojcaŭ = suŭdzieł = kasa», — napisaŭ Broŭdzi.

50‑hadovy Robiert Broŭdzi, etničny vienhr z Zakarpaćcia byŭ kamandziram-navataram, jaki zasnavaŭ i raźviŭ padraździaleńnie bieśpiłotnych apieracyj «Ptachi Madziara». Jaho nadzvyčajnaja efiektyŭnaść źviarnuła ŭvahu kamandavańnia. Major, jon u 2025 hodzie byŭ pryznačany kamandujučym Siłami bieśpiłotnych sistem Ukrainy, dzie multyplikavaŭ svoj dośvied. Pa vynikach pieršych sta dzion na hetaj pasadzie, pavodle paviedamleńnia kamandujučaha, padraździaleńni Hrupoŭki SBS ździejśnili bolš za 402 tys. bajavych vyletaŭ, paškodzili abo źniščyli 76 859 celaŭ praciŭnika. Razumnaje vykarystańnie dronaŭ pryviało da taho, što, pa acenkach zachodnich raźviedak, suadnosiny rasijskich i ŭkrainskich strat dasiahnuli ciapier praporcyi piać da adnaho.

• 68
• 0
• 3
• 1
• 0
• 0
• 0
• 2