Prezident Ukrainy prakamientavaŭ adkaz Pucina na jaho list ab zakančeńni vajny.
«Na žal, rasijski bok znoŭ vybiraje vajnu — usie siońnia pačuli hety adkaz. Słaby adkaz. Jon prosta nie choča zakančvać vajnu. Dumaju, što mnohich u śviecie hety adkaz rasčaravaŭ. Jon nie choča ničoha źmianiać i nie choča pryznać, što jaho vajna padabajecca tolki jamu i tym, chto atrymlivaje ź jaje hrošy, — usie jany siońnia byli vielmi ŭśmiešlivyja. Značyć, hrošaj u Rasii pavinna stać mienš, a cisku na Rasiju — bolš. Ja dziakuju ŭsim, chto dapamahaje nam! Ja dziakuju ŭsim, chto razam z Ukrainaj, chto choča sapraŭdnaha miru», — paviedamiŭ Uładzimir Zialenski ŭ svaim telehram-kanale.
U čaćvier, 4 červienia, prezident Ukrainy napisaŭ adkryty list Pucinu, u jakim zaklikaŭ da pieramovaŭ, kab skončyć vajnu.
«Vybar zaraz za vami. Davoli vajny. Ukraina prapanuje skončyć hetu vajnu. Treba zrabić heta sumlenna, hodna i harantavać, što nie budzie novaha raspalvańnia vajny.
My bačym, što Złučanyja Štaty nadajuć usiu svaju ŭvahu pytańniu Irana, i niapravilna prosta čakać, kali ŭ ichniaj uvazie čarha dojdzie da vajny ŭ Jeŭropie. Ukraina prapanuje skončyć vajnu ŭ farmacie pamiž nami i vami. Ja prapanuju vam sustreču», — pisaŭ jon.
Uładzimir Pucin padčas vystupleńnia na Pieciarburhskim mižnarodnym ekanamičnym forumie prakamientavaŭ pasłańnie Zialenskaha.
Prytym vykazaŭsia pra list padkreślena pahardliva. Maŭlaŭ, «Piaskoŭ učora pakazaŭ mnie list Zialenskaha, ja pahladzieŭ z ranicy hetu papierku».
Na prapanovu asabistaj sustrečy ź Zialenskim Pucin adkazaŭ admoŭna. Pavodle jaho słoŭ, Ukraina imkniecca spynić rasijskaje nastupleńnie, u toj čas jak Rasija zacikaŭlenaja ŭ doŭhaterminovych damoŭlenaściach, a nie ŭ časovym pieramirji.
Taksama Pucin vykazaŭ nierazumieńnie nakont taho, čamu Kijeŭ nie žadaje bačyć administracyju Donalda Trampa ŭ roli haranta mahčymych budučych damoŭlenaściaŭ. Pry hetym jon padziakavaŭ Trampu za jaho namahańni ŭ adnosinach da vypraŭleńnia «manieraŭ» Zialenskaha i dadaŭ, što praca ŭ hetym kirunku jašče nie zavieršanaja.
U svaju čarhu, Emanuel Makron zaznačyŭ, što list Zialenskaha dapamoža dabicca mirnaha ŭrehulavańnia. «Ja dumaju, što heta dobraja inicyjatyva, i dobra, što pieramovy mohuć adnavicca», — skazaŭ prezident Francyi.
U toj čas ministr abarony Litvy Robiertas Kaŭnas adznačyŭ, što naiŭna čakać, što Pucin prosta voźmie i adstupić.
Poŭnamaštabnaje ŭvarvańnie Rasii va Ukrainu pačałosia 24 lutaha 2022 hoda, z taho času prajšło bolš za čatyry hady i try miesiacy, abo 1564 dni.
Pieršaja suśvietnaja doŭžyłasia 1567 dzion.
Kamientary