Skasavanyja achoŭnyja zony pałaca Patockich i zamka Sapiehaŭ u Vysokim. Na ich terytoryi pabudujuć basiejn «Nyrec»
Ministerstva kultury całkam skasavała prajekt zon achovy pałacava-parkavaha ansambla ChVII—XIX stahodździaŭ, nie zaćvierdziŭšy novaha dakumienta. Śpiecyjalisty kažuć, što heta pieršy taki vypadak.
Pastanova, pryniataja 2 červienia 2026 hoda, skasavała dakumient, jakim vyznačalisia achoŭnyja zony pałacava-parkavaha ansambla ŭ Vysokim Kamianieckaha rajona. Novaje rašeńnie nabyvaje moc z 1 lipienia 2026 hoda, pakidajučy pomnik faktyčna biez abaronienych miežaŭ i zrazumiełych rehłamientaŭ zabudovy, zaŭvažyŭ telehram-kanał «Spadčyna».
Ansambl składajecca z reštkaŭ ziemlanych vałoŭ i ŭjaznoj bramy zamka Sapiehaŭ XVII stahodździa, a taksama muravanaha pałaca Patockich 1815 hoda i piejzažnaha parku. Uvieś ansambl maje status histaryčna-kulturnaj kaštoŭnaści respublikanskaha značeńnia (2‑j katehoryi).
Jak adznačajuć śpiecyjalisty, situacyja źjaŭlajecca nietypovaj: zvyčajna stary prajekt admianiajecca adnačasova z pryniaćciem novaha.
Mahčymaj pryčynaj jurydyčnaj kalizii moža być toje, što na terytoryi histaryčnaj siadziby miascovyja ŭłady płanujuć uźvieści fizkulturna-azdaraŭlenčy kompleks z basiejnam pad nazvaj «Nyrec».
Hramadskaje abmierkavańnie architekturna-płanirovačnaj kancepcyi prachodziła ŭ lutym 2026 hoda. Zhodna z prajektam, raspracavanym «Brestprajektam» na zakaz Upraŭleńnia kapitalnaha budaŭnictva Kamianieckaha rajona, budynak pamieram 24 na 48 mietraŭ raźmieścicca ŭ centralnaj častcy horada, pamiž vulicaj Lenina i rakoj Pulva, pobač z terytoryjaj isnujučaj sanatornaj škoły-internata. Praduhledžvajecca taksama budaŭnictva asobnaj kacielni i parkoŭki.
U skasavanym dakumiencie 2015 hoda isnujučyja pabudovy vakoł hetaj placoŭki, u tym liku savieckaja škoła-internat, byli pryznanyja dysharmaničnymi i rekamiendavalisia da vynasu pa miery fizičnaha znosu dla zachavańnia cełasnaści pomnika. Ciapier ułady sprabujuć ucisnuć na hetuju terytoryju jašče adzin bujny budynak.
Akramia taho, u architekturna-płanirovačnym zadańni na prajektavańnie basiejna zakładziena nieabchodnaść raspracoŭki prajekta z ulikam karektavańnia i miežaŭ pałacava-parkavaha ansambla, nieabchodnaść jakoj nie tłumačyłasia.
Farmalna da pryniaćcia novaha prajekta zon achovy raspracoŭka prajektnaj dakumientacyi dla hetaj terytoryi całkam zabaroniena.
Kamientary
Mabyć hałoŭny sipaty budaŭnik užo nie tonie ŭ vadzie ?)))