Pamiatajecie «Schod nieabyjakavych»? Jon jašče žyvy, ale telehram-čat u ich užo skrali

Apazicyjnaja i da Alaksandra Łukašenki, i da Śviatłany Cichanoŭskaj inicyjatyva «Schod nieabyjakavych» paviedamiła padpisčykam, što ich čat vyjšaŭ z-pad kantrolu arhanizataraŭ i ciapier kirujecca nieviadomymi asobami.

U čacie pa staroj spasyłcy visić paviedamleńnie ad imia inicyjatyvy pra nibyta «samarospusk»: u im «Schod» byccam by pryznaje ŭłasnuju «niekampietentnaść» i zaklikaje ruch raspuścicca. Sama inicyjatyva ad hetaha paviedamleńnia admiažoŭvajecca — jaho pakinuli tyja, chto pierachapiŭ spasyłku.

U aficyjnym kanale «Schodu nieabyjakavych» situacyju patłumačyli tak: na čat była «ataka botaŭ», paśla čaho spasyłku na ŭstupleńnie vydalili, a staronku pa joj, pavodle inicyjatyvy, uziała pad kantrol «režymnaja ahientura». Udzielnikaŭ papiaredžvajuć nie dadavacca pa staroj spasyłcy.

Jak takoje atrymałasia? Toje, što adbyłosia, — nie «ŭzłom» u zvykłym sensie. Złamyśnikam nie spatrebiłasia ni parolaŭ, ni dostupu da akaŭntaŭ arhanizataraŭ. U asnovie lažyć miechanizm, viadomy jak pierachop vyzvalenaha imieni.

U telehramaŭskaj spasyłki na čat byŭ publičny adras (juzierniejm). Kali arhanizatary, pavodle ich ułasnych słoŭ, reahavali na «ataku botaŭ» i prybrali spasyłku na ŭstupleńnie, hety adras vyzvaliŭsia i staŭ dastupny kamu zaŭhodna. Chtości adrazu stvaryŭ novy čat i prysvoiŭ jamu toj samy adras. U vyniku staraja spasyłka, jakaja dahetul visić u materyjałach inicyjatyvy i ŭ dziasiatkach pierapostaŭ, ciapier viadzie nie da «Schodu», a ŭ čat pad kantrolem złamyśnikaŭ. Mienavita tam i źjaviŭsia falšyvy dopis pra «samarospusk».

Hałoŭnaja pamyłka inicyjatyvy ŭ tym, što, prybirajučy publičny adras, jany nie ŭličyli: vyzvaleny adras nie źnikaje, a traplaje ŭ ahulny dostup.

Paralelna źjaviłasia i padrobka samoha kanała. Aryhinalny kanał inicyjatyvy maje adras @sxod_by, a ŭ kłona — @sxob_by: roźnica ŭsiaho ŭ adnoj litary, raźličanaja na toje, što čytač nie zaŭvažyć padmieny.

Naŭrad ci niechta źviarnuŭ by ŭvahu na fejł stvaralnikaŭ napaŭmiortvaha kanała i čata, kali b pra heta nie staŭ aktyŭna pisać ananimny telehram-kanał «Biełaruskaja ahientura». Nieviadoma, chto za im staić — ci to siłaviki, ci toje niechta z aktyvistaŭ apazicyi, kamu ŭ radaść vyśmiejvać pamyłki «Schodu nieabyjakavych» i inšych apanientaŭ Cichanoŭskaj. U vyniku «Biełaruskaja ahientura» adnačasova vystupaje i ŭ roli taho, chto vyjaviŭ prablemu, i prapanuje ŭłasnyja pasłuhi pa kibierbiaśpiecy.

• 2
• 0
• 8
• 3
• 0
• 0
• 0
• 0