Maładoje pakaleńnie pierastała hetaha saromiecca: 22% amierykancaŭ pakaleńnia Z ličać siabie ŁHBTK. Absalutnaja bolšaść ź ich — heta biseksuały

Dola amierykancaŭ, jakija adnosiać siabie da ŁHBTK-supolnaści, za apošniaje dziesiacihodździe vyrasła bolš čym udvaja. Kali ŭ pačatku 2010‑ch pra takuju identyčnaść zajaŭlali kala 3,5% darosłych žycharoŭ ZŠA, to ciapier, pavodle danych Gallup, — 7,6%.

Hałoŭnym ruchavikom hetych źmien stali pradstaŭniki pakaleńnia Z. Siarod maładych amierykancaŭ, jakija niadaŭna ŭstupili ŭ darosłaje žyćcio, da ŁHBTK siabie adnosiać 22,3% — bolš za kožny piaty. Dla paraŭnańnia: siarod pakaleńnia bebi-bumieraŭ — tych, kamu ciapier 70—80 hadoŭ, — takich tolki 2,3%.

Bolšaść tych, chto adnosić siabie da ŁHBTK, zajaŭlaje pra svaju biseksualnaść. Siońnia 15% usich darosłych pradstaŭnikoŭ pakaleńnia Z nazyvajuć siabie biseksualnymi, a siarod tych, chto adnosić siabie da ŁHBTK-supolnaści, ludzi z takoj identyčnaściu składajuć bolš za pałovu — 57,3%.

Asabliva časta pra biseksualnaść kažuć maładyja žančyny. Bolš za kožnuju piatuju žančynu pakaleńnia Z (20,7%) možna adnieści da biseksuałak. Siarod žančyn-milenijałak u biseksualnaj identyčnaści pryznavalisia kala 9%.

Źmieny adbyvajucca i siarod mužčyn. Amal 7% mužčyn pakaleńnia Z nazyvajuć siabie biseksuałami — heta bolš čym udvaja pieravyšaje dolu tych, chto nazyvaje siabie hiejem (2,8%). Siarod mužčyn-milenijałaŭ dola biseksuałaŭ i hiejaŭ prykładna adnolkavaja (adpaviedna 2,5% i 2,3%). Akramia taho, usio bolš maładych mužčyn apisvajuć siabie jak «pieravažna hieteraseksualnych», a nie vyklučna hieteraseksualnych.

Pavodle sacyjołahaŭ, reč nie tolki ŭ źmianieńni seksualnych pavodzin. Maładoje pakaleńnie ŭsio radziej usprymaje seksualnaść jak nabor žorstkich katehoryj. Dla mnohich pradstaŭnikoŭ pakaleńnia Z seksualnaja ciaha vyhladaje chutčej jak śpiektr, čym jak dychatamičny padzieł na «hieteraseksuałaŭ» i «homaseksuałaŭ».

U hetym, jak piša The Wall Street Journal, niama ničoha pryncypova novaha. Jašče ŭ 1948 hodzie aŭtar znakamitaj spravazdačy pra seksualnaść Alfred Kinsi pisaŭ, što čałaviectva nielha padzialić na dźvie asobnyja hrupy — hieteraseksuałaŭ i homaseksuałaŭ. «Nie ŭsio ŭ śviecie čornaje i nie ŭsio biełaje», — adznačaŭ jon.

Pry hetym biseksualnyja pavodziny nie zaŭsiody supadajuć ź biseksualnaj identyčnaściu. Pavodle źviestak Pew Research Center, 88% biseksuałaŭ, jakija majuć pastajannaha partniora, znachodziacca ŭ hieteraseksualnych adnosinach.

Pavialičyć

Situacyju dadatkova ŭskładniaje najaŭnaść mužčyn, jakija nie ličać siabie biseksuałami, ale tym nie mienš adčuvajuć ramantyčnuju abo seksualnuju ciahu da asob svajho połu.

Psichołah Ryč Savin-Uiljams, aŭtar knihi «Pieravažna hieteraseksuały: seksualnaja fluidnaść siarod mužčyn» (Mostly Straight: Sexual Fluidity Among Men), pryjšoŭ da vysnovy, što pamiž vyklučna hieteraseksualnymi i biseksualnymi mužčynami isnuje značnaja pramiežkavaja hrupa. Havorka pra ludziej, jakija ličać siabie hieteraseksuałami i ŭ asnoŭnym adčuvajuć ciahu da žančyn, ale pry hetym mohuć adčuvać peŭnuju seksualnuju abo ramantyčnuju ciahu i da mužčyn.

U šerahu daśledavańniaŭ, u tym liku z vykarystańniem fizijałahičnych pakazčykaŭ nakštałt vymiareńnia pašyreńnia zrenak pry prahladzie eratyčnych vyjaŭ, vyjaviłasia, što takija mužčyny adroźnivajucca jak ad vyklučna hieteraseksualnych, tak i ad biseksualnych mužčyn. Savin-Uiljams nazyvaje hetuju hrupu «pieravažna hieteraseksualnymi» i ličyć, što jana značna bolš raspaŭsiudžanaja, čym pryniata dumać.

Inšyja daśledavańni taksama śviedčać, što mužčynskaja seksualnaja aryjentacyja nie abmiažoŭvajecca prostym padziełam na dźvie katehoryi. Jak adznačali aŭtary adnaho daśledavańnia 2020 hoda, mužčynskaja seksualnaść isnuje chutčej na kantynuumie, čym u vyhladzie strohaj dychatamii.

Apytańnie, praviedzienaje ŭ 2025 hodzie, uvohule prapanavała vosiem roznych katehoryj biseksualnaści — ad ludziej, jakija tolki časam adčuvajuć ciahu da svajho połu, da tych, chto chacieŭ by mieć taki dośvied u budučyni.

Jak adznačaje WSJ, pradstaŭniki pakaleńnia Z asabliva schilnyja ŭsprymać seksualnuju ciahu nie jak žorstkuju katehoryju, a jak śpiektr abo škału. Jany taksama bolš svabodna staviacca da raździaleńnia identyčnaści i faktyčnych pavodzin, śćviardžaje Džyn Tvendž, aŭtarka knihi «Pakaleńni: realnyja adroźnieńni pamiž Gen Z, milenijałami, Gen X, bumierami i maŭklivym pakaleńniem — i što jany značać dla budučyni Amieryki» (Generations: The Real Differences between Gen Z, Millennials, Gen X, Boomers and Silents—and What They Mean for America's Future).

«Dla pakaleńnia Z toje, što pačynałasia jak pryniaćcie adroźnieńniaŭ, a potym pieratvaryłasia ŭ pryniaćcie kankretnych identyčnaściej, ciapier stała pracesam poŭnaj admovy ad jarłykoŭ, — tłumačyć Tvendž. — Ich pazicyja palahaje ŭ nastupnym: «Ja mahu lohka źmianicca zaŭtra». I jany staviacca da hetaha absalutna naturalna i niazmušana».

• 10
• 2
• 2
• 9
• 2
• 0
• 3
• 1