Vobraz mača ŭžo nie ŭ modzie: jak pakaleńnie Z abiraje partniora

Jak piša Welt.de, u apytańni, praviedzienym instytutam Opinium u hetym hodzie pa zamovie Tinder, pryniali ŭdzieł try tysiačy niemcaŭ va ŭzroście ad 18 da 25 hadoŭ. Jaho vyniki pakazali, što dapuščalna dla novaha pakaleńnia na spatkańniach, a što nie.

Abmien paviedamleńniami ŭ toj ža viečar

Kłasičnaje dla milenijałaŭ «praviła troch dzion», jakoje dazvalaje patelefanavać ci napisać paśla pieršaj sustrečy tolki na čaćviorty dzień, ciapier amal nie pracuje. 73% chłopcaŭ i 75% dziaŭčat ličać narmalnaj pierapisku ŭ toj ža viečar.

Ščyryja razmovy pra seks

Pryblizna pałova (51%) apytanych adkryta stavicca da seksualnaj tematyki i moža abmiarkoŭvać jaje ŭžo na pieršaj sustrečy. Ale heta nie aznačaje, što intymnaja blizkaść dla ich źjaŭlajecca normaj: dla kala 40% maładych ludziej i prykładna pałovy dziaŭčat seks na pieršym spatkańni — tabu.

Chto płacić u restaranie

Kali sprava dachodzić da rachunku, pohlady roźniacca. 59% maładych mužčyn chočuć apłacić abied abo viačeru całkam. Siarod hieteraseksualnych dziaŭčat tolki 45% ličać, što heta abaviazak partniora-chłopca.

Što sapraŭdy pryvablivaje

Pavodle apytańnia, najbolš pryvabnymi ličacca tyja, chto nie chavaje svaich emocyj: 72% dziaŭčat addajuć pieravahu emacyjnamu intelektu (zdolnaść čałavieka razumieć ułasnyja emocyi i emocyi inšych ludziej, kiravać imi i vykarystoŭvać heta razumieńnie dla lepšych uzajemaadnosin i pryniaćcia rašeńniaŭ) pierad źniešnaściu «kłasičnych mača».

84% chacieli b bačyć pobač čałavieka, jaki padtrymlivaje ich mety i dapamahaje raźvivacca. Pry hetym patencyjny partnior pavinien całkam zasiarodzicca na spatkańni: 61% ličać flirt ź inšym čałaviekam formaj zdrady, i navat prosta pierapiska ŭ internecie ź inšymi dla mnohich źjaŭlajecca nieprymalnaj.

Čaho nie varta rabić na pieršym spatkańni

Jość i inšyja momanty ŭ pavodzinach patencyjnaha partniora, jakija absalutna nieprymalnyja padčas pieršaha spatkańnia. Kožny treci apytany (35%) nazyvaŭ niepavahu da inšych hałoŭnym faktaram, jaki ich adšturchoŭvaje, zatym iduć pastajannyja razmovy pra byłoha partniora (28%) i słabaja kamunikacyja (26%).

Biez hulniaŭ i biez «hostynhu»

Pakaleńnie Z nie lubić taktyčnych hulniaŭ nakštałt «nie być zanadta dastupnym». 56% addajuć pieravahu adrazu vykazvacca pra svaje namiery. 64% ličać, što «hostynh» (rezkaje spynieńnie jakich-niebudź adnosin biez papiaredžańnia i tłumačeńnia mahčymych na toje pryčyn) horšy za pramoje «nie».

Psichičnaje zdaroŭje i surjoznyja razmovy

Apytańnie taksama pakazała, što dla pakaleńnia Z važna abmierkavańnie padčas pieršaha spatkańnia temy psichičnaha zdaroŭja.

Adkrytaść u razmovie pra ŭłasnaje psichičnaje zdaroŭje abo terapiju ŭsprymajecca jak prykmieta stałaści i zdolnaści da samaanalizu. 64% chłopcaŭ i 70% dziaŭčat zajavili, što adčuvajuć bolšuju simpatyju da čałavieka, jaki nie baicca adkryta zakranać hetuju temu.

Toj, chto ŭžo na etapie znajomstva adkryta havoryć pra svoj emacyjny stan, vidavočna nie maje žadańnia vieści pustyja razmovy. Zamiest hetaha mnohija abmiarkoŭvajuć mety ŭ karjery i adnosinach: 30% padčas spatkańnia achvotna havorać pra asabistaje raźvićcio, a 32% — pra karjeru. Pry hetym 72% ličać pryvabnym, kali čałaviek moža jasna sfarmulavać, čaho čakaje ad adnosin.

• 4
• 0
• 1
• 1
• 0
• 0
• 0
• 0