U Minsku zatrymali kryŭdziciela Valanciny, jakaja śpiavaje pra Isusa
Milicyja ŭstanaviła mužčynu, jaki «šturchnuŭ» pažyłuju minčanku Valancinu ŭ vahonie mietro. Siłaviki zanialisia hetaj spravaj paśla taho, jak jana stała aktyŭna abmiarkoŭvacca ŭ siecivie.
Jak paviedamlaje HUUS Minskaha harvykankama, paśla pravierki situacyi byli apytanyja vidavočcy, jakija paćvierdzili, što padčas kanfliktu nieviadomy mužčyna sapraŭdy «šturchnuŭ» žančynu.
Mužčynu zatrymali. Pa jaho słovach, pryčynaj kanfliktu stała toje, što piensijanierka hučna śpiavała ŭ vahonie mietro.
Raniej pra toje, što zdaryłasia, raskazała ŭ instahramie Volha Mamantava. Valancinu jana sustreła ŭ mietro na «Kastryčnickaj». Jak i zaŭsiody, taja śpiavała pra Isusa — ale tvar žančyny byŭ u kryvi.
Volha padyšła da śpiavački, kab dapamahčy pryvieści siabie ŭ paradak. Valancina raskazała, što jechała ŭ vahonie i śpiavała, kali na «Płoščy Lenina» adzin z maładych mužčyn ustaŭ i ŭdaryŭ jaje kułakom u tvar — trapiŭ u nos. A potym spakojna sieŭ na svajo miesca.
Videa pra zdareńnie mienš čym za sutki nabrała 200 tysiač prahladaŭ i sotni kamientaroŭ. Šmat chto aburajecca abyjakavaściu biełarusaŭ, jakija nie tolki nie adreahavali na sam momant źbićcia, ale i ihnaravali žančynu ŭ kryvi, jakaja śpiavała pasiarod płatformy adnoj z samych zahružanych stancyj minskaha mietro.
Valancinu, badaj, viedaje kožny, chto pražyŭ u biełaruskaj stalicy chacia b miesiac. Žančyna śpiavaje pra Isusa kala mietro — i nikoli nie prosić hrošaj, u adroźnieńnie ad zvyčajnych vuličnych śpievakoŭ. Jana zaŭsiody na pazityvie. Śpiavačku nazyvajuć lehiendaj stalicy.
Kamientary
[Zredahavana]