Zamianiŭ 95% trupy, ale nie zavajavaŭ publiku. Što robić ź biełaruskim baletam eks-premjer rasijskaj Maryinki

Jak vynikaje z niadaŭniaha intervju hałoŭnaha baletmajstra teatra Ihara Kołba «Rośsijskoj hazietie», jaho šlach u Minsku pačynaŭsia ŭ ciažkaj atmaśfiery.

Čatyry hady tamu, kali były premjer Maryinskaha teatra ŭznačaliŭ biełaruskuju trupu, jon sutyknuŭsia z kalektyvam, jaki, pavodle jaho ž słovaŭ, «byŭ nie zusim kankurentazdolnym». U štacie sa 115 stavak 38 byli vakantnymi. Tracina trupy prosta adsutničała.

Ihar Kołb pajšoŭ na radykalnyja miery. «Na siońniašni dzień trupa abnaviłasia na 95 pracentaŭ», — kanstatuje jon. Hetaja ličba aznačaje, što za čatyry hady byŭ zamienieny praktyčna ŭvieś artystyčny skład.

Paśla pratestaŭ u 2020 hodzie teatr źviedaŭ chvalu zvalnieńniaŭ. Kadravy vakuum, jaki ŭtvaryŭsia paśla palityčnych čystak va ŭsioj kulturnaj śfiery Biełarusi, ułady pačali zapaŭniać śpiecyjalistami z Rasii. Ihar Kołb, uradženiec Pinska, jaki 26 hadoŭ prapracavaŭ u Maryinskim teatry, staŭ adnym z takich «antykryzisnych» mieniedžaraŭ. Jon sfarmavaŭ novuju kamandu z maładych vypusknikoŭ i, jak śćviardžaje, navat pryciahnuŭ zamiežnikaŭ.

Adnak «pierazapusk» biełaruskaha baleta akazaŭsia vielmi balučym dla publiki.

Novyja pastanoŭki Kołba vyklikali chvalu abureńnia siarod zaŭziatych teatrałaŭ, jakija ŭbačyli ŭ ich biezhustoŭščynu i «apahanieńnie śviatoha». Paśla premjer jaho baletaŭ «Skoki (Karmen-siuita)» i «Ščaŭkunok» sacyjalnyja sietki vybuchnuli aburanymi vodhukami. «Bałahan», «cichi žach», «balerynu niasuć, jak nasiłki z rastvoram» — takimi epitetami hledačy apisvali ŭbačanaje, patrabujučy viarnuć na scenu kłasičnyja pastanoŭki metra biełaruskaha baleta Valancina Jelizarjeva.

Sam Ihar Kołb u intervju «RH» pryznaje: «Inšyja śpiektakli, jakija mnoj byli zrobleny, vyklikali vielizarnyja debaty. Dachodziła navat da chiejtu».

Da tvorčych pretenzij nieŭzabavie dadalisia i abvinavačvańni ŭ płahijacie. Rasijski chareohraf Aleh Habyšaŭ publična zajaviŭ, što Ihar Kołb prysvoiŭ jaho ideju baleta pra Marka Šahała, jakuju Habyšaŭ asabista prezientavaŭ kiraŭnictvu minskaha teatra za paŭtara hoda da anonsu anałahičnaj pastanoŭki.

Na fonie ŭnutranych skandałaŭ hastroli ŭ Maskvie vyhladajuć sprobaj atrymać pryznańnie za miažoj. Pryčym u rasijskuju stalicu Kołb viazie nie prosta adnoŭleny śpiektakl, a svaju novuju aŭtarskuju redakcyju baleta «Bajaderka». U repiertuary minskaha teatra ŭžo isnavała staraja viersija, faktyčna kopija pastanoŭki Maryinskaha teatra. Ale, pa słovach Kołba, u jaho «źjaviŭsia šaniec prapanavać svaju redakcyju».

Hałoŭnym novaŭviadzieńniem staŭ pierarobleny finał, dla jakoha pryjšłosia całkam pierapracavać muzyčnuju partyturu. Tak źjaviłasia svaja, aryhinalnaja viersija suśvietna viadomaha baleta. Jakuju publika ŭ Minsku, pa słovach baletmajstra, pryniała «na ździŭleńnie vietliva».

• 0
• 2
• 1
• 15
• 1
• 0
• 2
• 0