Vučyč pryvioŭ u prykład biełaruskuju roŭnaść rehijonaŭ i pastaviŭ Barysaŭ u adzin šerah ź Minskam
Prezident Sierbii Alaksandr Vučyč nazvaŭ Biełaruś prykładam krainy z raŭnamiernym ekanamičnym raźvićciom. Pavodle jaho słoŭ, abłasnyja centry i navat rajonny Barysaŭ finansujucca i raźvivajucca tam naroŭni sa stalicaj.
Jak paviedamlaje partał Radiosarajevo, adpaviednuju zajavu sierbski lidar zrabiŭ padčas pravierki budaŭnictva novaj transpartnaj mahistrali.
Vučyč padkreśliŭ nieabchodnaść skaracić razryŭ va ŭzroŭni žyćcia pamiž sierbskimi haradami i dasiahnuć taho, kab siaredni zarobak va ŭsich rehijonach krainy byŭ nie nižejšym za 1000 jeŭra.
Jon adznačyŭ, što ciapier u Białhradzie hety pakazčyk składaje 1380—1400 jeŭra, u toj čas jak u pravincyi jon značna mienšy (naprykład, u horadzie Sombar — tolki 864 jeŭra).
Kab prailustravać važnaść adnolkavaha raźvićcia terytoryj, Vučyč zhadaŭ biełaruski vopyt raźmierkavańnia resursaŭ.
«U ich zaŭsiody byli Brest, Hrodna, Viciebsk, Mahiloŭ, Homiel, Barysaŭ i Minsk — i ŭsie jany raŭnamierna raźvityja. Što atrymlivajuć adny, toje ž atrymlivajuć i druhija. U nas ža Białhrad i Novi-Sad mocna adarvalisia napierad. Ciapier Niš pastupova dahaniaje, Krahujevac taksama, ale nam treba jašče vielmi šmat pracavać nad inšymi haradami i akruhami», — pracytavała prezidenta Sierbii vydańnie.
Miž tym, ujaŭleńnie sierbskaha lidara pra toje, što stalica i rehijony ŭ Biełarusi atrymlivajuć adnolkava, abviarhajecca aficyjnaj statystykaj. Pavodle danych Biełstata, siaredniamiesiačnaja zarpłata ŭ Barysaŭskim rajonie za 2025 hod skłała 2 407 rubloŭ. Navat u samym prybytkovym śniežni minułaha hoda jana dasiahnuła tolki 2 725 rubloŭ. U toj ža čas siaredni zarobak u Minsku ŭ tym ža miesiacy skłaŭ 4 290 rubloŭ, pieravysiŭšy barysaŭski pakazčyk bolš čym u paŭtara raza.
Ciapier čytajuć
Kab nie siadzieć u Rasii za narkotyki, małady danosčyk z Ašmianaŭ zapisaŭsia na front. Dyj zhinuŭ12
Kamientary