U Mali paŭstancy i džychadzisty atakavali pazicyi rasijskaha Afrykanskaha korpusa

U Mali paŭstancy i džychadzisty praviali sieryju atak na pazicyi armii i praŭradavych sił. Pad udar patrapili harady Aniefis, Ahielchok i Haa na poŭnačy krainy, Sievare i rajon Kony ŭ centralnaj častcy Mali, a taksama turma ŭ Kienijerobie na poŭdzień ad stalicy Bamako, piša The Insider.

Hałoŭnaj metaj staŭ Aniefis u rehijonie Kidal. Tam znachodziacca pazicyi malijskaj armii i rasijskich bajcoŭ «Afrykanskaha korpusa», jakija padtrymlivajuć vajskovuju chuntu ŭ Bamako. Paśla papiaredniaha bujnoha nastupleńnia ŭ krasaviku malijskija i rasijskija siły adstupili ŭ Aniefis z Kidala i Tesalita.

Pradstaŭnik tuarehskaha «Frontu vyzvaleńnia Azavada» Machamied Elmaŭłud Ramadan śćviardžaje, što bajcy hrupoŭki ŭvajšli ŭ Aniefis. Le Monde pryvodzić jaho słovy pra toje, što «Front vyzvaleńnia Azavada» kantraluje horad, ale malijskija i rasijskija vajskoŭcy zastajucca ŭ svaim łahiery. France 24 sa spasyłkaj na miascovaha čynoŭnika taksama piša, što paŭstancy ŭziali pad kantrol Aniefis, a rasijskija bajcy «akapalisia ŭ łahiery».

Niezaležnaha paćviardžeńnia poŭnaha zachopu Aniefisa pakul niama. Vojska Mali zajaviła, što ŭsie ataki byli adbityja, a situacyja «całkam pad kantrolem». Pavodle jaho viersii, u Sievare byli zabity 20 napadnikaŭ, u Haa — jašče šeść, adzin praŭradavy bajec zahinuŭ i čaćviora atrymali ranieńni. Rasijski «Afrykanski korpus» taksama śćviardžaje, što jaho padraździaleńni razam z malijskim vojskam adbivajuć ataki.

Telegram-kanał «Afrikaŕ» pryznaje, što bajeviki ŭvajšli ŭ haradskuju rysu Aniefisa. Pry hetym kanał śćviardžaje, što im nie ŭdałosia zachapić klučavy abjekt — vajskovuju bazu na zachad ad horada, a ŭ Haa, Sievare i Ahielchoku ataki byli adbity abo abmiežavalisia abstrełami.

Adkaznaść za ataki faktyčna zajavili dźvie siły. Pieršaja — «Front vyzvaleńnia Azavada», tuarehskaja sieparatysckaja hrupoŭka, jakaja damahajecca niezaležnaści paŭnočnaha Mali. Druhaja — «Džamaat Nusrat al-Isłam val-Muślimin», filijał «Al-Kaidy» ŭ Sachieli. Pavodle dadzienych Reuters, pieršaja zajaviła, što atakavała i zachapiła nie mienš za siem pazicyj vojska abo praŭradavych sił, adnak hetaja zajava taksama nie paćvierdžana niezaležna.

Paśla razryvu z Francyjaj i inšymi zachodnimi partniorami vajskovaja chunta Mali zrabiła Maskvu adnym z hałoŭnych źniešnich vajskovych sajuźnikaŭ. Rasijski «Afrykanski korpus» pryjšoŭ na źmienu PVK «Vahnier» i dapamahaje malijskaj armii ŭtrymlivać terytoryi, zmahacca z džychadzistami i zdušać tuarehskich sieparatystaŭ.

Aniefis maje stratehičnaje značeńnie, bo heta adzin z apošnich apornych punktaŭ malijskaha vojska i rasijskich sił u rehijonie Kidal paśla krasavickaha nastupleńnia paŭstancaŭ.

Le Monde adznačaje, što strata horada stała b surjoznym udaram pa chuncie: Aniefis raźmieščany na šlachu da Haa i Tambuktu, dvuch najbujniejšych haradoŭ na poŭnačy Mali.

Ciapierašniaje nastupleńnie stała praciaham krasavickaj eskałacyi, kali «Front vyzvaleńnia Azavada» i «Džamaat Nusrat al-Isłam val-Muślimin» užo praviali bujnuju sumiesnuju apieracyju, atakavali niekalki haradoŭ, uklučajučy Bamako. U Maskvie śćviardžali, što praciahnuć padtrymlivać ułady Mali.

• 4
• 0
• 1
• 0
• 0
• 0
• 0
• 0