Ci zakryjuć Jeŭropu dla biełarusaŭ? Daradca Cichanoŭskaj raspavioŭ, pra što damoviŭsia ŭ Bierlinie
Dzianis Kučynski pravioŭ sustrečy ŭ Fiederalnaj kancylaryi z kamandaj kanclera Frydrycha Mierca, a taksama ŭ Ministerstvie zamiežnych spraŭ Hiermanii.
Płany Jeŭrasajuza pa mahčymym uzmacnieńni vizavych abmiežavańniaŭ nie pavinny zakranuć hramadzian Biełarusi. Pra heta, pavodle daradcy Śviatłany Cichanoŭskaj pa pytańniach dypłamatyi Dzianisa Kučynskaha, jamu zajavili padčas pracoŭnych sustreč u Fiederalnaj kancylaryi i Ministerstvie zamiežnych spraŭ Hiermanii.
Pytańnie vizavaj palityki apošnija tydni znoŭ apynułasia ŭ centry ŭvahi paśla taho, jak u Hiermanii prahučali prapanovy jašče bolš uzmacnić abmiežavańni dla hramadzian Rasii. U pryvatnaści, pradstaŭniki kiroŭnaha błoka CHDS/CHSS vystupili za poŭnaje spynieńnie vydačy šenhienskich viz rasijanam u miežach dalejšaha ŭzmacnieńnia cisku na Maskvu.
Heta vyklikała pytańni i siarod biełarusaŭ: ci nie mohuć novyja miery raspaŭsiudzicca i na hramadzian Biełarusi. Mienavita tamu tema viz stała adnoj z klučavych padčas pracoŭnaha vizitu Dzianisa Kučynskaha ŭ Bierlin.
«Padčas kansultacyj mianie zapeŭnili, što biełaruskija hramadzianie nie razhladajucca ŭ miežach hetych abmiežavańniaŭ. Kali adpaviednyja rašeńni i buduć pryniatyja, jany buduć datyčycca pieradusim hramadzian Rasii, a taksama tych asobaŭ, jakija majuć dačynieńnie da ahresii suprać Ukrainy», — paviedamiŭ jon «Našaj Nivie».
Pavodle Kučynskaha, heta jašče raz paćviardžaje, što niamieckija ŭłady praciahvajuć prytrymlivacca pryncypu raźmiežavańnia pamiž režymam Łukašenki i biełaruskim narodam.
Hiermanija zachavaje cisk na režym Łukašenki
Jak paviedamiŭ daradca Śviatłany Cichanoŭskaj, u Bierlinie jon pravioŭ sustrečy ŭ Fiederalnaj kancylaryi z kamandaj kanclera Frydrycha Mierca, a taksama ŭ Ministerstvie zamiežnych spraŭ Hiermanii.
Pa słovach Kučynskaha, kožnaja sustreča doŭžyłasia kala paŭtary hadziny, što dazvoliła abmierkavać šyrokaje koła pytańniaŭ — ad biaśpieki ŭ rehijonie i ŭdziełu Minska ŭ rasijskaj ahresii suprać Ukrainy da padtrymki biełaruskich demakratyčnych sił.
Pavodle jaho, hałoŭnym vynikam kansultacyj stała paćviardžeńnie taho, što Bierlin nie płanuje mianiać svaju palityku adnosna Biełarusi.
«Hiermanija praciahnie kaardynavać svaje dziejańni ź Jeŭrasajuzam, zachoŭvać cisk na režym Łukašenki i adnačasova padtrymlivać biełaruski narod, hramadzianskuju supolnaść i demakratyčnyja siły», — pierakazaŭ jon pazicyju niamieckaha boku.
Prajaznyja dakumienty i lehalizacyja
Jašče adnoj važnaj temaj pieramoŭ stała pravavoje stanovišča biełarusaŭ, jakija ciapier znachodziacca ŭ Hiermanii.
Kučynski paviedamiŭ, što pieradaŭ niamieckamu boku pakiet prapanoŭ, jakija datyčacca spraščeńnia vydačy prajaznych dakumientaŭ dla biełarusaŭ, jakija nie mohuć biaśpiečna atrymać abo padoŭžyć nacyjanalny pašpart, bolš hnutkaha vykarystańnia humanitarnych miechanizmaŭ lehalizacyi, a taksama ŭliku asablivaściaŭ biełaruskich palityčnych represij pry razhladzie mihracyjnych i prytułkavych spraŭ. Asobna ŭzdymałasia prablema ludziej, jakija mohuć stracić pravavy status tolki tamu, što nie majuć mahčymaści abnavić biełaruski pašpart.
Pavodle daradcy, hiermanski bok paćvierdziŭ hatoŭnaść vyvučyć hetyja prapanovy i praciahnuć pracu nad mahčymymi rašeńniami razam z kampietentnymi viedamstvami.
Akramia taho, Kučynski padziakavaŭ Hiermanii za padtrymku vyzvalenych biełaruskich palitviaźniaŭ i adznačyŭ, što kraina zastajecca adnoj ź lidaraŭ pa vydačy šenhienskich viz hramadzianam Biełarusi.
Ciapier čytajuć
Toj samy masažyst raskazaŭ, navošta zdymaŭ hołych klijentak16
Kamientary
ludi nie to, čto miesiacami ždut dokov, užie hodami. a polakam - plevať.
a u koho prosročien pasport voobŝie ich na ruki mohut nie połučiť.
dažie nie tak, "nie połučat dažie pri połožitielnom riešienii o vydačie".
Tolki što hałasili što maskoŭskich.
)))