20 litraŭ u bak i nijakich kanistraŭ? Ci sapraŭdy na biełaruskich zapraŭkach na miažy z Rasijaj uviali limity na bienzin
U internecie razychodzicca infarmacyja, što na adnoj ź biełaruskich AZS kala samaj miažy z Rasijaj nibyta abmiežavali prodaž paliva: nie bolš za 20 litraŭ u adzin aŭtamabil i nijakich kanistraŭ. Pryčynaj nazyvajuć kiroŭcaŭ, jakija jeduć u Rasiju i zapraŭlajucca pierad miažoj, stvarajučy prablemy z palivam dla miascovych žycharoŭ.
«Naša Niva» pravieryła, ci sapraŭdy takija abmiežavańni źjavilisia na biełaruskim pamiežžy i ci možna ciapier zapravić poŭny bak pierad pajezdkaj u Rasiju.
Što zdaryłasia ŭ Jeziaryščy
Paviedamleńnie pra mahčymyja abmiežavańni źjaviłasia 18 lipienia. Śćviardžałasia, što na AZS u haradskim pasiołku Jeziaryšča Viciebskaj vobłaści, raźmieščanym niedaloka ad biełaruska-rasijskaj miažy, aŭtamabili zapraŭlajuć nie bolš jak na 20 litraŭ.
Pavodle kiroŭcaŭ, na jakich spasyłalisia ŭ paviedamleńni, taki režym dziejničaŭ prynamsi ŭ čaćvier i piatnicu. Rabotniki AZS nibyta tłumačyli, što atrymali ŭkazańnie nie zapraŭlać aŭtamabili da poŭnaha baka i nie adpuskać paliva ŭ kanistry. Pryčyna — vialiki popyt z boku tych, chto jedzie ŭ Rasiju: jany zapraŭlajucca pierad miažoj i, jak śćviardžałasia, faktyčna «spustašajuć» miascovyja zapraŭki.
«A poŭny bak možna?» — «Viadoma»
Kab vyśvietlić, što adbyvajecca na biełaruskich zapraŭkach, «Naša Niva» patelefanavała na niekalki AZS niedaloka ad miažy z Rasijaj. My pradstavilisia padarožnikami, jakija viartajucca ź Biełarusi ŭ Rasiju i niepakojacca, što pierad miažoj nie atrymajecca zapravić poŭny bak.
Na AZS u Jeziaryščy nam adkazali, što ŭ ich nijakich limitaŭ niama.
— U nas nijakich abmiežavańniaŭ niama, paliva chapaje, pryjazdžajcie i zapraŭlajciesia.
— To-bok my zmožam zapravić poŭny bak i kanistry?
— Tak, viadoma.
Padobnuju karcinu my atrymali i padčas zvankoŭ na inšyja AZS u Viciebskaj i Mahiloŭskaj abłaściach. Tam taksama zapeŭnili: abmiežavańniaŭ na kolkaść paliva niama, aŭtamabil možna zapravić da poŭnaha baka, a taksama zapoŭnić kanistry.
Pytańnie pra pamiežnyja AZS uźnikaje nie ŭpieršyniu
Padobnyja čutki źjaŭlajucca na fonie maštabnaha paliŭnaha kryzisu ŭ Rasii. Adnoj ź jaho hałoŭnych pryčyn stali rehularnyja ŭdary Ukrainy pa rasijskaj naftapierapracoŭčaj infrastruktury. Za apošnija miesiacy ŭkrainskija siły nanieśli dziasiatki ŭdaraŭ pa NPZ, u vyniku čaho častka naftapierapracoŭčych mahutnaściaŭ krainy była vyviedzienaja z ładu. U šerahu rasijskich rehijonaŭ u červieni i lipieni ŭvodzili abmiežavańni na prodaž bienzinu. U zaležnaści ad rehijona kiroŭcam mahli adpuskać pa 15‑30 litraŭ za raz, a ŭ niekatorych miescach asobna abmiažoŭvali prodaž paliva ŭ kanistry.
Na hetym fonie biełaruskija AZS, asabliva raźmieščanyja pablizu miažy, akazalisia pad pavyšanaj uvahaj. Jašče ŭ červieni źjaŭlalisia paviedamleńni, što rasijanie aktyŭna zapraŭlajucca ŭ Biełarusi i viazuć paliva z saboj.
U pačatku lipienia źjaviłasia infarmacyja i pra abmiežavańni ŭ advarotnym kirunku. Na pierachodzie Kaśkoŭ-Klukina na trasie Smalensk-Mścisłaŭ rasijskija pamiežniki, pavodle paviedamleńniaŭ, nie dazvolili kiroŭcu vyvieźci ŭ Biełaruś bienzin u dadatkovaj kanistry ŭ abjomie bolš za 10 litraŭ. Svajo rašeńnie jany patłumačyli zabaronaj na vyvaz paliva z Rasii za miažu.
Biełaruskija ŭłady i «Biełarusnafta» pry hetym publična zapeŭnivajuć, što deficytu paliva ŭ Biełarusi niama. Jašče ŭ pačatku lipienia pradstaŭnik kampanii zajaŭlaŭ, što paliva na AZS i składach dastatkova, pastaŭki adbyvajucca svoječasova, a limitaŭ, u tym liku na pamiežnych zapraŭkach, niama.
Kamientary