Sajman Šuster: Heta jana. Zialenski aficyjna zapuściŭ apieracyju M&Ms, kab paralizavać maskoŭskija aeraporty
Ukraina pačała apieracyju, jakaja pavinna zrabić rasijskaje nieba nastolki niebiaśpiečnym, kab zamiežnyja avijakampanii pierastali lotać u Maskvu. Žurnalist The Atlantic Sajman Šuster śćviardžaje, što heta i jość sakretny płan M&Ms: masavyja naloty tannych dronaŭ, raźličanyja na praciahłaje zakryćcio aeraportaŭ i cisk rasijskaj elity na Pucina.
2 vieraśnia aŭtar The Atlantic Sajman Šuster paviedamiŭ, što Uładzimir Zialenski aficyjna abviaściŭ pačatak apieracyi M&Ms, pra padrychtoŭku jakoj žurnalist raskazaŭ jašče ŭ žniŭni.
«Zialenski aficyjna abviaściŭ pačatak apieracyi, viadomaj jak M&Ms, pra jakuju my pisali ŭ minułym miesiacy ŭ The Atlantic. Adna z krynic, jakaja pieršapačatkova raspaviała mnie pra płan, paćvierdziła siońnia ranicaj, što heta mienavita jana», — napisaŭ Šuster.
Sam Zialenski kodavaj nazvy M&Ms publična nie ŭžyvaŭ. Ale 1 vieraśnia jon zajaviŭ, što Ukraina rezka pavialičyć kolkaść bieśpiłotnikaŭ i rakiet u rasijskaj pavietranaj prastory.
«U rasijskim niebie prosta buduć drony ŭ takoj kolkaści, ź jakoj daviadziecca ličycca», — skazaŭ jon.
Zialenski asobna papiaredziŭ zamiežnyja avijakampanii, strachavyja kampanii i pasažyraŭ, jakija praciahvajuć karystacca pavietranaj prastoraj i klučavymi aeraportami Rasii.
«Rasijskaje nieba faktyčna budzie zakryvacca. Vajna, jakuju pačała Rasija, zakryvaje jaje nieba», — zajaviŭ jon.
Kiraŭnik Ukrainy padkreśliŭ, što havorka nie idzie pra naŭmysnyja ataki na cyvilnyja samaloty. Meta — stvaryć takuju pastajannuju pahrozu vakoł rasijskich aeraportaŭ, kab ich pracu davodziłasia rehularna spyniać, a zamiežnyja pieravozčyki sami admovilisia ad palotaŭ.
Što takoje apieracyja M&Ms
Prajekt byŭ upieršyniu padrabiazna apisany Šusteram u The Atlantic u žniŭni.
Nazva M&Ms adsyłaje da mnostva maleńkich, tannych i amal adnolkavych dronaŭ, nieabchodnych dla apieracyi. Pavodle krynic žurnalista, Ukraina razhladała mahčymaść zapuskać da tysiačy bieśpiłotnikaŭ za noč, kab pierahruzić rasijskuju supraćpavietranuju abaronu i nadoŭha zakryć aeraporty Maskvy.
Pieršapačatkova płan praduhledžvaŭ vykarystańnie aŭtanomnych dronaŭ sa štučnym intelektam. U ich pamiać pavinny byli zahruzić karty maršrutu i vyjavy celaŭ. Padčas palotu bartavaja kamiera zdymała b miascovaść, a ałharytm paraŭnoŭvaŭ ubačanaje z zachavanymi vyjavami i samastojna nakiroŭvaŭ bieśpiłotnik u cel — biez paćviardžeńnia ŭdaru čałaviekam.
Heta vyklikała surjoznyja sumnievy ŭ Zialenskaha. Pavodle The Atlantic, jon bajaŭsia, što vypadkovaha traplańnia ŭ pasažyrski samalot abo hibieli cyvilnych. Tamu aŭtary płana prapanoŭvali zahadzia papiaredžvać avijakampanii, kab tyja vyvodzili svaje łajniery z rasijskich aeraportaŭ.
Raźlik na niezadavolenaść elity
Metaj apieracyi pavinna było stać nie tolki parušeńnie pavietranych znosin. Jaje aŭtary spadziavalisia izalavać rasijskich čynoŭnikaŭ, aliharchaŭ i inšych zamožnych prychilnikaŭ Pucina ad zamiežnych maršrutaŭ.
Praz zachodnija sankcyi ŭ Maskvu ŭžo nie lotajuć jeŭrapiejskija i amierykanskija pieravozčyki, ale zastajucca Turkish Airlines, Emirates i šerah avijakampanij z Kitaja, Turcyi i krain Piersidskaha zaliva. Praz Stambuł i Dubaj rasijskaja elita zachoŭvaje zručny vychad u astatni śviet.
Kali hetyja kampanii taksama spyniać rejsy, raźličvajuć aŭtary M&Ms, upłyvovyja rasijanie mohuć pačać patrabavać ad Pucina vyrašeńnia prablemy. U spałučeńni ź inšymi ekanamičnymi nastupstvami vajny heta pavinna padšturchnuć Kreml da pieramoŭ.
Raniej paviedamlałasia, što padrychtoŭka apieracyi spyniłasia ŭ lipieni paśla zvalnieńnia jaje mierkavanaha aŭtara — ministra abarony Michaiła Fiodarava. Adnak ciapier Šuster śćviardžaje, što płan usio ž byŭ adnoŭleny i aficyjna zapuščany.
Pakul nie zrazumieła, ci budzie apieracyja realizavanaja dakładna ŭ pieršapačatkovym vyhladzie. Ale jaje palityčnaja častka ŭžo pačałasia: Ukraina aficyjna papiaredziła śviet pra niebiaśpieku palotaŭ u Rasiju i zajaviła pra namier faktyčna zakryć jaje nieba.
Ciapier čytajuć
Vital z-pad Vilejki, jaki padpaliŭ chatu z ułasnymi dziećmi, zavierbavaŭsia ŭ rasijskaje vojska. I prapaŭ na pieršym ža bajavym zadańni5
Kamientary
Połučajetsia čto nastuplenije budiet usilivaťsia, składy horieť i zimioj nie budiet śvieta, zato samolety nie budut tak často letať...