Rasija za dvoje sutak naniesła ŭdary pa šaści ŭkrainskich pravajdarach. Častka Kijeva zastałasia bieź internetu

U čaćvier Etherlink, jaki absłuhoŭvaje centralnuju častku stalicy, paviedamiŭ ab paškodžańni asnoŭnaha vuzła sietki i rašeńni pieranieści jaho ŭ inšuju łakacyju. Terminy adnaŭleńnia pracy internetu nie nazyvajucca.

Akramia taho, rasijskija vajskoŭcy źniščyli data-centr chostynh-pravajdara MiroHost. Jaho zasnavalnik Alaksandr Alšanski papiaredziŭ, što z-za hetaha mohuć uźniknuć prablemy z dostupam da sajtaŭ, jakija raźmiaščalisia na jaho siervierach. Paškodžańni taksama atrymała infrastruktura Cityhost.

23 vieraśnia ŭ vyniku rasijskaj ataki byli paškodžanyja data-centry UTELS i «Pavuciny», z-za čaho pieraboi ź internetam uźnikli prykładna ŭ 100 tysiač chatnich haspadarak u Kijevie i vobłaści, paviedamlała Ministerstva ličbavaj transfarmacyi Ukrainy. Taksama pad udar trapiŭ vuzieł abmienu internet-trafikam u stalicy, što pryviało da prablem u klijentaŭ Crazy Network u Vińnickaj i Chmialnickaj abłaściach.

Paškodžanyja data-centry naležać da hramadzianskaj infrastruktury, jakaja zabiaśpiečvaje dostup da infarmacyi i papiaredžańniaŭ ab pavietranych pahrozach. Chutkaja dastaŭka paviedamleńniaŭ ab rakietnych i dronavych atakach važnaja dla ludziej, jakija dziakujučy hetamu paśpiavajuć znajści schovišča.

Ministerstva abarony Rasii paćviardžała ŭdary 24 vieraśnia pa telekamunikacyjnych centrach «Kijeŭstar» i «Parkavy», zajaŭlajučy, što jany vykonvajuć pasłuhi suviazi i vyličalnyja mahutnaści dla USU.

Rasija atakuje ŭkrainskuju infrastrukturu suviazi ŭžo niekalki tydniaŭ.

15 vieraśnia bieśpiłotnik paškodziŭ data-centr BeMobile u Kijevie, z-za čaho ŭźnikli prablemy z sajtami, raźmieščanymi ŭ UCloud, u tym liku z partałam Nacyjanalnaha paralimpijskaha kamiteta Ukrainy. 17 vieraśnia paviedamlałasia ab paražeńni jašče adnaho kamiercyjnaha data-centra, a 19 vieraśnia pad udar trapiŭ De Novo — adzin z najbujniejšych kamiercyjnych data-centraŭ Ukrainy.

Pradstaŭnik punkta abmienu internet-trafikam Anatol Fralankoŭ adznačyŭ, što rasijskija ŭdary pa ŭkrainskaj telekamunikacyjnaj infrastruktury ŭžo stali sistemnymi. Pavodle jaho słoŭ, ciapier u praciŭnika ŭ pryjarytecie vuzły suviazi ŭ Kijevie, a ŭ dalejšym metami stanuć anałahičnyja abjekty na zachadzie krainy.

Ukrainskija pravajdary ŭžo pačali papiaredžvać klijentaŭ ab roście koštu pasłuh. Uładalnik UTELS zajaviŭ, što stabilny internet za 300—350 hryŭniaŭ (6‑7 dalaraŭ) na miesiac zastaniecca ŭ minułym. Pavodle jaho słoŭ, apieratary, jakija zabiaśpiečvajuć reziervovaje siłkavańnie i kanały suviazi, nie mohuć praciahvać pracavać pa raniejšych taryfach.

• 1
• 0
• 0
• 1
• 0
• 0
• 0
• 0