Maładyja spartsmieny ŭsio čaściej prymajuć duš u trusach. U čym pryčyna?
Zvyčki źmianilisia i ŭ spartsmienaŭ, i ŭ spartsmienak.
Jašče hadoŭ 10—15 tamu futbalisty paśla matča abo treniroŭki prymali duš hołymi. A ciapier tak i myjucca — u šortach. Na hetuju źmienu zvyčak źviarnuŭ uvahu Krystaf Kramier — były hulec zbornaj Hiermanii, jaki ŭ 2014 hodzie staŭ čempijonam śvietu pa futbole.
«Raniej my ŭsie mylisia hołymi. A ciapier, ja b skazaŭ, 80% prymajuć duš u trusach», — adznačyŭ futbalist u adnym ź niadaŭnich padkastaŭ. Sam jon pryznaŭsia, što nie vielmi razumieje takoha padychodu, i vykazaŭ zdahadku, što sprava ŭ roźnicy pamiž pakaleńniami. Zrešty, ličba 80% — jaho asabistaje nazirańnie.
Žurnalisty Tagesspiegel vyrašyli razabracca ŭ hetym fienomienie i parazmaŭlali z maładymi spartsmienami z amatarskich kłubaŭ. Vyśvietliłasia, što ŭ niekatorych kamandach mycca ŭ trusach abo kupalnikach sapraŭdy stała zvyčajnaj praktykaj.
Asabliva prykmietnaja hetaja źmiena ŭ žanočym futbole: pavodle apoviedaŭ maładych futbalistak, paśla trenirovak i hulniaŭ amal nichto ŭ ich kamandach nie prymaje duš hołym. Pry hetym sama tema akazałasia nastolki dalikatnaj, što surazmoŭcy žurnalistaŭ paprasili zachavać ich ananimnaść. A ich adkazy pakazali, što za adnoj i toj ža zvyčkaj mohuć stajać zusim roznyja matyvy.
Čamu maładyja spartsmieny nie chočuć raspranacca
Adna z pryčyn — saramlivaść. Asabliva heta datyčyć padletkaŭ, jakija pieražyvajuć fizičnyja źmieny i časta paraŭnoŭvajuć siabie ź inšymi. Svaju rolu adyhryvajuć i sacyjalnyja sietki, dzie maładyja ludzi pastajanna bačać idealizavanyja cieły. Na hetym fonie ŭłasnaje cieła moža zdavacca niedastatkova pryhožym. U prafiesijnym sporcie dadatkovy cisk stvarajuć rehularnyja ŭzvažvańni, vymiareńni tłuščavaj masy i pravierki fizičnaj formy.
Raniej da myćcia aholenymi mužčyny pryvučalisia ŭ armii, dzie heta było adnym z patrabavańniaŭ hihijeny. Adnak za apošnija paŭstahodździa słužbu pa pryzyvie admianiali spačatku ŭ ZŠA, a paśla i ŭ bolšaści krain Jeŭrasajuza. Pastupova atrafiravałasia i zvyčka, što farmiravałasia ŭ vojsku.
Ale reč daloka nie zaŭsiody ŭ niaŭpeŭnienaści va ŭłasnym ciele. Niekatoryja maładyja ludzi prosta nie chočuć pakazvać intymnyja častki cieła inšym i ličać heta pytańniem asabistaj pryvatnaści. U asobnych vypadkach značeńnie majuć relihijnyja pierakanańni.
Naprykład, u isłamie isnujuć praviły, pavodle jakich mužčynam naležyć prykryvać cieła ad pupka da kaleniaŭ. Adnak toje, jak hetaje praviła vykonvajecca pad dušam, zaležyć ad kankretnaha čałavieka i jaho pohladaŭ.
Jašče adna pryčyna — žadańnie nie vyłučacca z kalektyvu. Kali bolšaść kamandy prymaje duš u trusach, raspranucca dahała aznačaje stać adnym ź niamnohich, chto pavodzić siabie inakš. Tamu navat tyja, chto asabista nie bačyć prablemy ŭ aholenaści, pakidajuć na ciele nižniuju bializnu, kab adčuvać siabie častkaj hrupy.
Psichołah: ničoha dziŭnaha, usio narmalna
Śpiecyjalistka ŭ halinie spartyŭnaj psichałohii Maryjon Zulprycya ličyć, što ŭ novaj zvyčcy niama ničoha dziŭnaha abo tryvožnaha. Kali jana sama zajmałasia sportam, było zvyčajnaj spravaj prymać duš biez adzieńnia. Ale paźniej, pracujučy trenierkaj dziavočych kamand, jana ŭžo sutykałasia z tym, što spartsmienki mylisia ŭ kupalnikach. Na jaje dumku, ź psichałahičnaha punktu hledžańnia heta całkam zrazumieła, asabliva kali havorka idzie pra padletkaŭ.
«Mienavita ŭ pieryjad pałavoha vyśpiavańnia mnohija adčuvajuć patrebu chavać svajo cieła abo paraŭnoŭvać siabie ź inšymi», — tłumačyć ekśpiertka.
Ahulnaja raździavalnia moža być asabliva ŭraźlivym miescam dla niepaŭnaletnich. Tut isnuje ryzyka naśmiešak, bulinhu, kryŭdnych zaŭvah i parušeńnia asabistych miežaŭ.
Adnak Zulprycya nie ličyć, što niežadańnie maładych ludziej raździavacca pierad inšymi — heta štości kiepskaje. Naadvarot, jana bačyć u hetym mahčymuju prykmietu pazityŭnych źmien: dzieci i padletki ŭsio čaściej sami vyznačajuć, što dla ich prymalna, a što nie, zamiest taho kab aŭtamatyčna padparadkoŭvacca čužym patrabavańniam.
«Heta dobra, kali dzieci i padletki nie robiać taho, što vyklikaje ŭ ich dyskamfort. Kali jany kažuć, što im niepryjemna i jany čahości nie chočuć, dla hetaha najpierš patrebnaja śmiełaść. Heta śviedčyć pra siłu, a nie abaviazkova pra saramlivaść», — adznačaje psichołah.
Na dumku ekśpiertki, za apošnija hady źmianiłasia i sama kultura spartyŭnych kłubaŭ. Raniej niaredka treniery navat prymali duš razam z vychavancami, heta ličyłasia važnym dla kamandnaha duchu. Ciapier takaja praktyka ŭžo ličycca nieprymalnaj. Bolš uvahi nadajecca asabistamu kamfortu dziaciej i ich pravu samastojna vyznačać svaje miežy.
-
U Aŭstralii mietearadary pačali pakazvać doždž, jakoha niama. Akazałasia, što heta miljony matylkoŭ
-
Darosłyja ŭsio čaściej kuplajuć cacki dla siabie, a dziaciej naradžajuć usio mienš. Što adbyvajecca?
-
Kasatki navučylisia palavać na vialikich biełych akuł i zdabyvać ich piečań. Navukoŭcy zaniepakojenyja nastupstvami
Małodšy syn Sachaščyka abvieščany źnikłym bieź viestak. Vyhladaje, jon vajavaŭ za Rasiju88
Kamientary