Darosłyja ŭsio čaściej kuplajuć cacki dla siabie, a dziaciej naradžajuć usio mienš. Što adbyvajecca?

Naradžalnaść padaje va ŭsim śviecie. Pavodle danych AAN, u 2024 hodzie na adnu žančynu ŭ siarednim prypadała 2,2 dziciaci, tady jak u 1960‑ia hady — kala piaci. Bolš jak u pałovie krain naradžalnaść užo apuściłasia nižej za ŭzrovień, nieabchodny dla prostaha ŭznaŭleńnia nasielnictva. Nie vyklučeńnie i Biełaruś. Pavodle infarmacyi biełaruskich navukoŭcaŭ, sumarny kaeficyjent naradžalnaści pa krainie ŭ 2024 hodzie skłaŭ 1,1, a ŭ Minsku — usiaho 0,6.

U toj čas jak dziaciej naradžajecca ŭsio mienš, u industryi cacak nazirajecca niečakanaja tendencyja: usio bolšuju rolu na hetym rynku adyhryvajuć darosłyja pakupniki.

Pavodle źviestak daśledčaj kampanii Circana, u pieršaj pałovie 2026 hoda na amierykanskija chatnija haspadarki bieź dziaciej prypała 55% prodažaŭ cacak u hrašovym vyražeńni. Za hod prodažy hetaj katehoryi pakupnikoŭ vyraśli na 16%. Heta dapamahło amierykanskaj industryi cacak pakazać najlepšyja vyniki za pieršaje paŭhodździe za apošnija šeść hadoŭ.

Zachapleńnie cackami siarod darosłych isnavała zaŭsiody, adnak raniej jano ličyłasia chutčej nišavym chobi. Ciapier ža pieratvaryłasia ŭ masavuju źjavu, jakaja atrymała nazvu kidult — ad anhlijskich słoŭ kid (dzicia) i adult (darosły). Tak nazyvajuć darosłych, jakija zachaplajucca dziciačymi cackami i zabavami.

Adnym z prykładaŭ staŭ pośpiech Lego. Cikavaść darosłych da hetych kanstruktaraŭ stała nastolki vialikaj, što dacki vytvorca pačaŭ śpiecyjalna vypuskać i rekłamavać nabory dla hetaj aŭdytoryi. U darosłych prychilnikaŭ Lego navat jość ułasnaja nazva — AFOL (Adult Fans of Lego).

Padobnaja historyja adbyłasia z kalekcyjnymi kartkami Pokémon. Rečy, jakimi zachaplalisia dzieci ŭ 1990-ja, ciapier stali pradmietam kalekcyjanavańnia i darahich inviestycyj. U 2026 hodzie adnu z redkich kartak pradali za rekordnyja $16,5 miljona.

Adnak zachapleńnie darosłych nie abmiažoŭvajecca cackami. Vialikija supolnaści prychilnikaŭ jość i ŭ Disney, i ŭ «Hary Potera». Jany naviedvajuć tematyčnyja parki bieź dziaciej, pieraapranajucca ŭ lubimych piersanažaŭ, kuplajuć kaściumy, suvieniry i inšyja kalekcyjnyja rečy. Dla takich fanataŭ u anhlijskaj movie navat źjavilisia asobnyja nazvy — Disney adults i Harry Potter adults. Praŭda, hetyja vyrazy niaredka ŭžyvajucca ź ironijaj, namiakajučy, što ludzi tak i nie pastaleli.

U 2025 hodzie sapraŭdny ažyjataž vyklikali lalki Labubu — nievialikija puchnatyja fihurki ź vialikimi vačyma i vostrymi zubami. Kalekcyjaniery stajali ŭ čerhach, a asobnyja madeli pierapradavalisia ŭ niekalki razoŭ daražej za pieršapačatkovy košt.

Asablivaj papularnaściu Labubu karystalisia siarod maładych žančyn. Dla mnohich hetyja fihurki stali modnym aksiesuaram i sposabam samavyjaŭleńnia. Padobnuju papularnaść atrymali i japonskija minijaciurnyja fihurki Sonny Angel.

Čamu darosłyja viartajucca da dziciačych zabaŭ?

Na pieršy pohlad, masavaje zachapleńnie cackami možna patłumačyć nastalhijaj. Ludzi, jakija vyraśli ŭ 1990‑ia i 2000‑ia hady, ciapier mohuć dazvolić sabie kupić toje, pra što maryli ŭ dziacinstvie.

Jak tłumačyła vydańniu The Telegraph ekśpiertka pa suśvietnym rynku cacak kampanii Circana Frederyk Tut, darosłyja ŭsio čaściej źviartajucca da kanstruktaraŭ, nastolnych hulniaŭ, pazłaŭ, kalekcyjnych fihurak i miakkich cacak, kab spravicca sa stresam i niaŭpeŭnienaściu ŭ budučyni na fonie vojnaŭ i ekanamičnych prablem.

Znajomyja ź dziacinstva rečy mohuć vyklikać pačućcio biaśpieki i pradkazalnaści. Źbirańnie kanstruktara abo kalekcyjanavańnie fihurak dazvalaje chacia b nienadoŭha adciahnucca ad paŭsiadzionnych prablem.

The Independent źviartaje ŭvahu, što pryčyny, praź jakija ludzi adkładajuć naradžeńnie dziaciej, mohuć častkova supadać z tymi, što padšturchoŭvajuć ich šukać suciašeńnie ŭ dziciačych zachapleńniach. Adnak pramoj suviazi pamiž hetymi tendencyjami pryviedzienyja danyja nie dakazvajuć.

• 2
• 0
• 2
• 0
• 2
• 2
• 0
• 0