Trenier hrodzienskaha «Niomana» ledź nie zhareŭ žyŭcom u svaim darahim aŭtamabili

«Nu, mnie pryjemna, što ja pravioŭ 600 matčaŭ u dobrym horadzie, jaki vielmi lublu. Tak skłałasia, tak zahadaŭ los. Žyćcio, viedajecie, takaja dziŭnaja reč, 600‑ha matča mahło b i nie być. Mianie vielmi lubić maja radzima, tamu ja, napeŭna, pavinien byŭ zhareć u horadzie Ivanava. Ja tam naradziŭsia i, na ščaście, zastaŭsia žyvy. Mahło b być 599 matčaŭ, a tak — 600. Budziem ruchacca dalej, nakolki chopić sił».

Možna było padumać, što heta žart ci mietafara, ale za słovami Kavaleviča staić realny vypadak, jaki moh skončycca trahiedyjaj.

8 kastryčnika na sajcie vydańnia «Anłajnier» źjaviłasia navina pra aŭtamabil, jaki zahareŭsia na adnoj ź biełaruskich daroh. Vidavočca dasłaŭ u redakcyju videa zdareńnia. U materyjale zhadvali, što aŭtamabil naležyć viadomamu ŭ Biełarusi futbolnamu trenieru, ale imia jaho nie nazyvali.

Krynicy «Trybuny» śćviardžajuć, što za rulom taho krasoviera byŭ mienavita hałoŭny trenier «Niomana».

Volvo XC90 Ihara Kavaleviča zadymiŭsia i spyniŭsia na ŭzbočynie. Paśla spynieńnia dym z-pad kapota zrabiŭsia jašče macniejšy, ale kiroŭca pa niezrazumiełaj pryčynie zastavaŭsia ŭ sałonie. Tolki praz 18 siekundaŭ, jak aŭto spyniłasia, dźviery kiroŭcy adčyniŭ mužčyna, jaki padbieh ź inšaha aŭto. Kavalevič vybraŭsia i amal adrazu z-pad kapota žachnuła połymia. Trenier na niekalki siekund viarnuŭsia i niešta zabraŭ z sałona. Prykładna praz chvilinu, kali aŭto pałała jašče macniej, Kavalevič adčyniŭ bahažnik i vykinuŭ adtul niejkija rečy. Vohnietušylnik trenier uziaŭ ź inšaha aŭtamabila, ale spynić pažar nie zdoleŭ.

Pavodle słoŭ Kavaleviča, jon «pavinien byŭ zhareć» na radzimie, u Ivanavie. Viadoma, što trenier «Niomana» naradziŭsia ŭ hetym rajonnym centry, a voś futbołam pačaŭ zajmacca ŭ haradskim pasiołku Antopal susiedniaha, Drahičynskaha rajona. Pamiž Ivanavam i Antopalem — prykładna 60 kiłamietraŭ.

U Antopali Kavalevič hadavaŭsia ŭ babuli ź dziadulam. U adnym ź intervju trenier raskazvaŭ, što praź pierajezdy siamji (baćka byŭ vajskoŭcam) źmianiŭ piać škoł. U Antopali paźniej žyli baćki treniera, taksama tam dahetul pravodzicca dziciačy futbolny turnir na pryzy Kavaleviča.

Zdareńnie z aŭtamabilem zasmuciła Kavaleviča. Užyvany Volvo XC90 u zaležnaści ad hodu vypusku i kamplektacyi moža kaštavać ad 20 da 40 tysiač dalaraŭ (ceny na novyja madeli startujuć ad 85 tysiač). Ale hałoŭnaje, što ŭ hetaj historyi ŭsio abyšłosia biez trahičnych nastupstvaŭ.

• 0
• 0
• 3
• 1
• 1
• 0
• 0
• 0