Ekanamičny sud Mahiloŭskaj vobłaści raspačaŭ vytvorčaść pa spravie ab bankructvie TAA «BNBK-AHRA Hłusk». Heta daččynaje pradpryjemstva Biełaruskaj nacyjanalnaj bijatechnałahičnaj karparacyi (BNBK), stvoranaje ŭ 2022 hodzie paśla pieradačy BNBK ziamiel u niekalkich rehijonach krainy, u tym liku ŭ Hłuskim rajonie, piša Office Life.
U 2022—2023 hadach BNBK aktyŭna pašyrała svaju syravinnuju bazu. U Babrujskim rajonie karparacyja atrymała ŭ davierčaje kiravańnie na try hady akcyi troch sielskahaspadarčych pradpryjemstvaŭ, a ŭ Hłuskim rajonie — šaści arhanizacyj.
U 2023 hodzie BNBK płanavała pavialičyć abjom vytvorčaści pradukcyi da miljona ton, tamu joj terminova spatrebilisia značnyja sielskahaspadarčyja ŭhodździ. Paźniej urad vyrašyŭ pieradać karparacyi častku ziamiel i ŭ inšych rajonach Biełarusi — Puchavickim, Asipovickim i Bychaŭskim.
Paviedamlałasia, što BNBK ukłała kala 60 miljonaŭ rubloŭ u raźvićcio sielskahaspadarčaj vytvorčaści ŭ Hłuskim rajonie. Adnak ciapier daččynaje pradpryjemstva karparacyi ŭ hetym rajonie znachodzicca ŭ stadyi likvidacyi. Adpaviednaje rašeńnie naziralnaja rada BNBK pryniała jašče ŭ žniŭni.
Zaviaršyć likvidacyju biez pracedury bankructva pradpryjemstva nie zmahło praz značnyja pazyki, jakija našmat pieravyšajuć košt jaho aktyvaŭ. Jak paviedamili ŭ sudzie, ahulnaja zapazyčanaść TAA «BNBK-AHRA Hłusk» pierad kredytorami składaje bolš za 10,8 miljona rubloŭ.
Pry hetym aktyvy pradpryjemstva acanili prykładna na 116 tysiač rubloŭ. Bolš za 112 tysiač z hetaj sumy składaje debitorskaja zapazyčanaść — hrošy, jakija pavinny vypłacić samomu pradpryjemstvu.
Nastupnaje sudovaje pasiadžeńnie ŭ spravie pryznačanaje na 29 studzienia. Pavodle acenki Office Life, vierahodnaść bankructva arhanizacyi amal stasotpracentnaja.
Trahiedyja z 30‑hadovaj doktarkaj sa Starobina — pajšła vydalać zub mudraści i pamierła23
Kamientary