Cichanoŭskaja: Biełaruskija ŭłady zaklikajuć žančyn naradžać, ale paśla naradžeńnia dziciaci mnohija sutykajucca ź finansavaj jamaj
Demakratyčnaja lidarka źviarnułasia da biełarusaŭ z nahody Dnia maci, jaki siońnia adznačajecca ŭ Biełarusi.
«Być maci — adna z samych składanych i adnačasova samych važnych i kaštoŭnych zadač, ź jakoj sutykajucca žančyny. Heta tytaničnaja praca, u jakoj niama vychodnych, pierapynkaŭ i vodpusku. Vy addajacie svaim dzieciam siabie całkam: razam ź imi adkryvajecie hety śviet, vučycie ich adroźnivać dobraje ad drennaha, padtrymlivajecie, kali im strašna, i radujeciesia kožnaj ich maleńkaj pieramozie. Pra dobraje i drennaje lohka havaryć, kali heta kazki i multfilmy. Ale kali havorka zachodzić pra realnaje žyćcio, nie zaŭsiody znachodziacca słovy», — napisała Śviatłana Cichanoŭskaja.
Pa jaje słovach, zaraz u biełaruskich miescach pazbaŭleńnia voli znachodziacca 113 palityčnych źniavolenych žančyn. Prynamsi 14 ź ich — matuli niepaŭnaletnich dziaciej.
«Biełaruskija ŭłady zaklikajuć žančyn naradžać, ale paśla naradžeńnia dziciaci mnohija sutykajucca ź finansavaj jamaj. Padčas dekreta vypłata pa dohladzie za pieršym dziciem składaje 35% siaredniaha zarobku — a kali žančyna vyrašaje viartacca da pracy, to časta sutykajecca z prapanovami zvolnicca, pieranosami pracoŭnych miescaŭ ci składanaściami z pošukam pracy», — zaznačyła palityk.
Jana zaznačaje, što, na žal, matčynu pracu vielmi časta ŭsprymajuć jak niešta samo saboj zrazumiełaje. Maci moža adkładać svaje płany, karjeru, son, adpačynak i ŭłasnyja žadańni dziela svajho dziciaci i ničoha nie patrabavać naŭzamien.
«Ja viedaju, što ciapier u Biełarusi mnohija z vas adčuvajuć tryvohu za budučyniu svaich dziaciej, za ich biaśpieku i svabodu. I navat kali samim byvaje strašna i niaprosta, vy praciahvajecie być dla svaich dziaciej aporaj, davać im luboŭ, kłopat i adčuvańnie biaśpieki.
Mienavita tamu jašče važniej znoŭ i znoŭ paŭtarać: dziakuj. Dziakuj za vašu luboŭ, ciarpieńnie i siłu. Za toje, što vy zachoŭvajecie ŭ dzieciach vieru ŭ dabro, svabodu i spraviadlivaść, navat kali navokał časta adbyvajecca zusim inšaje. I ja całkam upeŭnienaja, što vašyja dzieci vyrastuć u cudoŭnych darosłych, jakija zrobiać Biełaruś lepšaj. Z Dniom maci!» — napisała Śviatłana Cichanoŭskaja.
Trahiedyja z 30‑hadovaj doktarkaj sa Starobina — pajšła vydalać zub mudraści i pamierła24
Kamientary
Navošta ty siabie katavała, "addajučy siabie", kali heta tabie było nie ŭ ščaście? Navošta ty hety niehatyŭ padśviadoma dzieciam pieradavała? Čamu ty pazbaviła dziaciej mahčymaści pravodzić čas u jakasnych dziciačych sadkach, siekcyjach, ustanovach, prosta dapamahajučy mužu RAZAM płacić za dabrabyt dziaciej?
Čamu ty tolki zaraz spachvaciłasia "pracavać da načy", kab mieć kapiejčynu na dziaciej? Što tabie pieraškadžała dapamahać mužu ŭ svoj čas, a nie visieć u jaho na karku?