Troje dziaciej i adzin darosły zahinuli ŭ vyniku stralby ŭ pačatkovaj škole ŭ ZŠA
Zahinułym dzieciam było piać, vosiem i 11 hadoŭ. Napadniku było 16.
16‑hadovy padletak adkryŭ stralbu ŭ pačatkovaj škole ŭ horadzie Bend (štat Arehon), zabiŭšy traich dziaciej i nastaŭnika. Paźniej jaho zastreliŭ miascovy žychar, piša Bi-bi-si.
Zahinułym dzieciam było piać, vosiem i 11 hadoŭ. Jašče adnaho dziciaci va ŭzroście siami hadoŭ i 54‑hadovaha nastaŭnika ŭ krytyčnym stanie dastavili ŭ balnicu, paviedamili ŭ palicyi.
Pavodle źviestak pravaachoŭnych orhanaŭ, napadnik pranik u pačatkovuju škołu Silver Rail Elementary, adkryŭšy ahoń pa zamknionych dźviarach. Inšych padrabiaznaściaŭ pra padazravanaha, akramia jaho ŭzrostu, palicyja nie paviedamiła.
Taksama nieviadoma, ci byŭ napadnik jakim-niebudź čynam źviazany sa škołaj.
«My ŭzrušanyja i zabityja horam z-za hetaj biessensoŭnaj trahiedyi», — zajaviŭ kiraŭnik školnaj akruhi Bend — Ła-Pajn Styvien Kuk.
«Niemahčyma padabrać słovy, kab vykazać hora, jakoje pieražyvaje naša supolnaść», — dadaŭ jon.
Pavodle słoŭ načalnika palicyi Benda Majka Kranca, 16‑hadovaha padletka zastreliŭ miascovy žychar, jaki zaŭvažyŭ, jak toj pranik u škołu, i pajšoŭ za im.
Hubiernatarka Arehona Cina Kotek padziakavała miascovamu žycharu, jaki, pavodle jaje słoŭ, «hieraična ŭmiašaŭsia, kab praduchilić dalejšyja čałaviečyja achviary».
Stralanina va ŭstanovach adukacyi — pastannaja źjava ŭ žyćci ZŠA.
Siarod najbolš rezanansnych napadaŭ — stralba ŭ siaredniaj škole «Kałumbajn» u 1999 hodzie, pačatkovaj škole «Sendzi-Chuk» u 2012 hodzie, starejšaj škole imia Mardžary Stoŭnman Duhłas u 2018 hodzie i pačatkovaj škole Robba ŭ horadzie Juvałdzi, štat Techas, u 2022 hodzie.
Pavodle padlikaŭ CNN, stralanina ŭ Bendzie stała 36‑m vypadkam stralby na terytoryjach amierykanskich škoł z pačatku 2026 hoda.
Kožnaje padobnaje zdareńnie znoŭ raspalvaje dyskusii pra zakanadaŭstva ŭ śfiery abarotu zbroi ŭ krainie, dzie prava na zachoŭvańnie i našeńnie zbroi abaroniena Druhoj papraŭkaj da Kanstytucyi ZŠA.
Prychilniki prava na zbroju vystupajuć za ŭzbrajeńnie nastaŭnikaŭ, ličačy heta adnoj z mahčymych mier abarony.
Ciapier čytajuć
«Paśla pieršaha zabojstva ź im raźviałasia žonka». Što viadoma pra šmatdzietnaha Siarhieja sa Stolinskaha rajona, jaki paśla vyzvaleńnia z kałonii zabiŭ troch čałaviek33
Kamientary