Palicyja padazraje padpał.
U Bavaryi adbyŭsia bujny pažar u histaryčnym budynku Kielštajnchaus, viadomym jak «Arlinaje hniazdo», jaki ŭ nacysckija hady vykarystoŭvaŭsia dla pradstaŭničych sustreč Adolfa Hitlera. Ahoń uspychnuŭ napiaredadni ŭviečary, piša Bild.
Praz 12 hadzin pažarnym usio jašče nie ŭdałosia całkam patušyć połymia. Pa słovach pradstaŭnika palicyi, budynak atrymaŭ nastolki surjoznyja paškodžańni, što adnavić jaho, vierahodna, užo nie ŭdasca.
Palicyja rasśleduje mahčymy padpał. Pa darozie da miesca zdareńnia pravaachoŭniki zaŭvažyli matacyklista, jaki ruchaŭsia nasustrač pažarnym mašynam.
Mužčynu spynili i zatrymali, ciapier jaho dapytvajuć. Pry hetym śledčyja pakul nie vyznačyli, ci datyčny jon da pažaru. Asoba padazravanaha i mahčymyja matyvy nie raskryvajucca. Pavodle papiarednich źviestak, paciarpiełych niama, u momant uzharańnia ŭnutry budynka nikoha nie było.
Kielštajnchaus raźmieščany na vyšyni 1834 mietraŭ nad horadam Bierchteshaden.
Budynak pabudavali ŭ 1937—1938 hadach jak pradstaŭničuju rezidencyju dla Hitlera, choć sam jon byvaŭ tam redka.
Padčas Druhoj suśvietnaj vajny zbudavańnie praktyčna nie paciarpieła, a z 1952 hoda vykarystoŭvałasia jak horny restaran i turystyčnaja słavutaść. Zaraz raźmieščanaja tam ekspazicyja raspaviadaje pra nacysckaje minułaje budynka.
Trahiedyja z 30‑hadovaj doktarkaj sa Starobina — pajšła vydalać zub mudraści i pamierła24
Kamientary