«Centuryjon» Niła Maršała – histaryčny «vyžyvalnicki» bajavik.
Vialikabrytanija, 2010, kalarovy, 97 chv.
Režysior: Nił Maršał
Roli vykonvajuć: Michael Fasbender, Daminik Uest, Volha Kurylenka, Noel Kłark, Devid Morysi
Žanr: Histaryčny «vyžyvalnicki» bajavik
Adznaka: 5 (z 10)
117 hod našaj ery. Pikty napadajuć na pamiežny rymskuju krepaść. Centuryjon Kvintus Dyjas — adziny acaleły. Hieroj adpraŭlajecca ŭ brytanskija lasy źniščyć kiraŭnika buntaŭnikoŭ Harłakona. Ale dzikija šatłandskija partyzany abviaščajuć palavańnie na rymlanaŭ.
Karcina Niła Maršała – žorstkaja hulnia na vyžyvańnie, tolki pa niedahladzie pradusaraŭ pastaŭlenaja ŭ histaryčnych dekaracyjach. (Zrešty, dekaracyi henyja vielmi ścipłyja.) Sam Maršał paśpiachova śpiecyjalizujecca na nizkabiudžetnych žachaŭkach. U jahonym «Spusku» alpinistki zmahalisia z kanibałami, u «Sabakach-vajarach» vajskoŭcy bilisia z vaŭkałakami.
Brytanskija partyzany – tyja ž vaŭkałaki.I mietady ichniaje baraćby – samyja dzikija. Ale čornaj – va ŭsich sensach – pierlinaj stužki źjaŭlajecca niemaja Volha Kurylenka, jakaja paśla miłoščaŭ z Džejmsam Bondam pieraŭtvaryłasia ŭ sapraŭdnuju viedźmu.
Niahledziačy na imiony impierataraŭ i rymskija fałanhi, amataram achajnaj historyi lepiej nie turbavacca.
Film – tolki dla zaŭziataraŭ ekstrymalnych hulniaŭ, prahnych da impierskaj kryvi.
Kamientary