Akulary Domaša (Ci moža nizki na vočy čałaviek stać prezydentam u Biełarusi?)

Akulary Domaša

Ci moža nizki na vočy čałaviek stać prezydentam u Biełarusi?

Pavodle aŭtaraŭ “Psychalahičnaha dapamožnika dla palitykaŭ” pad redakcyjaj Jahoravaj-Hantman, bolšaści ludziej lider ujaŭlajecca jak salidny čałaviek, niemałady, pryjemny dla voka, pryčym mužčyna, a nie žančyna. Praviedzienaje va Ŭkrainie daśledavańnie pakazała: bolšaść ukrainskich vybarcaŭ (pad 80%) ličyć, što prahałasavali b za kandydata ź niepryjemnym tvaram i navat nie źviarnuli b uvahi. Adnak takija vyniki nielha ličyć pakazalnymi, bo vybarca zvyčajna nia moža praanalizavać mechanizmy ŭpłyvu palityka na siabie, i hałasuje za kandydata, pryvableny jahonym vyhladam, choć sam śviata ŭpeŭnieny, što jaho pierakanała palityčnaja prahrama.

Jak musić vyhladać idealny palityčny lider? Ahulnaj schiemy niama. Specyjalisty zvyčajna rajać paźbiahać usiaho, što moža adciahnuć uvahu vybarca padčas sustrečy – pryčoska nie pavinna być ekstravahantnaj, skura musić być dahledžanaja, akulary najlepš zamianić na linzy.

Supracoŭniki hrupy daśledavańnia psychalohii masavaj kamunikacyi Maskoŭskaha ŭniversytetu pryjšli da vysnovy: dośvied zachodnich imidžmejkieraŭ nie zaŭsiody prydatny dla ŭschodnieeŭrapiejskaj rečaisnaści. Naprykład, parada apranacca stroha i niakidka, kab vopratka nie adciahvała ŭvahi hledača, doŭhi čas nie apraŭdvała siabie na postsavieckaj prastory, bo “byłym savieckim hramadzianam taki dziełavy styl bolš nahadvaŭ rajkam KPSS; u našym minułym panavali šeryja stroi, tamu jany vyklikajuć nehatyŭnuju reakcyju. Stroj musić być zapaminalnym, padkreślivać mužnaść ci žanockaść. Heta vyklikaje zacikaŭleńnie i sympatyju”. Zabrakavali taksama raspaŭsiudžanaje mierkavańnie, što ŭ nas kandydat musić uvieś čas uśmichacca ŭ kadry.

Na vybar čałavieka ŭpłyvajuć nia peŭnyja rysy tvaru jak takija, a sacyjalny stereatyp – sukupnaść ujaŭleńniaŭ, što farmujucca ŭ śviadomaści hramadztva. U kožnaj krainie isnuje svoj archietyp lidera – u zaležnaści ad palityčnych tradycyj, histaryčnych abstavin, ekanamičnaj sytuacyi. Stereatypy, što ŭpłyvajuć na pavodziny biełaruskich vybarcaŭ, jašče nie zrabilisia abjektam vialikaha sacyjalahičnaha daśledavańnia, choć kampanija vybaru adzinaha demakratyčnaha kandydata — dobraja nahoda dla hetaha.

Ci mohuć biełaruskija vybarščyki prahałasavać za kandydata ŭ akularach? – spytalisia my, majučy na ŭvazie, što pieravažnaja bolšaść demakratyčnych supołak schilajecca da padtrymki Siamiona Domaša.

Aleh, žurnalist, bakser pa adukacyi: Nie, bo čałaviek u akularach vyhladaje biezabaronnym. Palityčnamu lideru nielha vyhladać biezabaronnym.

Nina, supracoŭnica “sabiesu”: Prahałasujuć mienavita za čałavieka ŭ akularach. Naš narod dumaje, što kali ŭ akularach, značyć, vielmi razumny, adukavany. Zrazumieła, akulary nia jość harantyjaj vialikaha rozumu, ale hetaha stereatypu z nas užo nia vybješ.

Stanisłaŭ, nastaŭnik fizyki, matematyki i vajskovaj padrychtoŭki ŭ Mienskim rajonie: Naŭrad ci. Kali čałaviek abiraje prezydenta — pradstaŭnika ŭsiaho narodu — jon imkniecca vybrać najlepšaha – samaha zdarovaha, mocnaha, u jakoha nia budzie vośpinaŭ na tvary, buduć dobryja zuby, i, naturalna, nijakich akularaŭ.

Saša, “nia miesny”: Za akularyka prahałasujuć, a voś za łysaha j vusataha – užo napeŭna nie.

Jadviha, handlarka na “Dynama”: Chutčej nie, bo akulary (asabliva ciomnyja) stvarajuć barjer pamiž taboj i čałaviekam, ja heta pa markietynhu, zdajecca, vučyła.

Vital, supracoŭnik firmy pa ramoncie kamputaraŭ: Akulary ličacca prykmietaj intelihiencyi, a asnoŭnaja masa vybarcaŭ – rabaciahi. Taki kandydat nia budzie dla ich “svaim”.

Inesa, pracuje chatniaj rabotnicaj u siamji daktaroŭ 1-j bolnicy: Naŭrad ci, bo miarkujecca, što čałaviek u akularach – heta toj, chto siadzić nad papierami ŭ siabie ŭ kabineciku i nie aryjentujecca ŭ tym, što adbyvajecca ŭ krainie za ścienami jaho kantory.

Eŭlalija, pensijanerka, za Stalina była represavanaja: Za jaho mohuć prahałasavać, bo ciapier mnoha chto drobna bačyć, mnoha chto nosić akulary i heta ni pra što nia kaža.

Vałodzia, majstar u domaŭpraŭleńni: A čaho nie? Što mohuć nie prahałasavać ludzi ź vioski, dla jakich akulary buduć asacyjavacca z horadam? Dyk padličycie pracent tych, chto žyvie na vioscy, i tych, chto žyvie ŭ haradoch.

Rusana, pracuje ŭ Maskvie na zarobkach: Čałaviek u akularach bačyć śviet nie takim, jakim jaho bačyć čałaviek biez akularaŭ. Asabista ja prahałasavała b za takoha kandydata mienavita z-za hetaha, ale ja nia peŭnaja, što bolšaść pahodzicca sa mnoju.

Viktar, “toža beenefaviec”: Ja toža pa-biełarusku lublu havaryć, ja toža beenefaviec, ličycie. Heta vy pra Domaša namiakajecie? A čamu ž nia moža? Nu, nie za Kazłoŭskaha ž z Čyhirom budzie narod hałasavać!

Halina, vykładčyca Technalahičnaha: Chaj idzie na vybary razam ź vice-prezydentam biez akularaŭ.

Apytvała Hanna Štejnman