Новы кіраўнік СК Віцебскай вобласці прыйшоў на фоне скандалу: былы пракурор горада патрапіў за краты
Учора стала вядома, што ў Віцебскага абласнога СК новы начальнік — Аляксандр Гуцко, які да таго быў намеснікам начальніка ўпраўлення па Гомельскай вобласці.
Ранейшы начальнік СК па Віцебскай вобласці, генерал-маёр юстыцыі Павел Ігнатаў звольнены са службы па стане здароўя.
Гэта такі своеасаблівы генеральскі «лайфхак», бо выхад на пенсію для генерал-маёра ўстаноўлены ў 55 гадоў, да якіх Ігнатаву яшчэ багата. Аднак пасля медыцынскай камісіі можна атрымліваць генеральскую пенсію, не дапрацоўваючы па ўзросце.
Можна было б падумаць, што гэта проста новы начальнік Дзмітрый Гора прыбірае выхадцаў з міліцэйскага следства і прызначае пракурорскіх, блізкіх сабе.
Але ўсе гэтыя ракіроўкі, як стала вядома «Нашай Ніве», адбываюцца на фоне грандыёзнага скандалу.
Так, за кратамі ў Мінску па абвінавачванні ў карупцыі знаходзіцца нядаўні пракурор Віцебска Юрый Раманоўскі. Разам з ім у 2021 годзе затрыманы яшчэ адзін работнік віцебскай пракуратуры і адзін следчы.
Як вядома з нашых крыніц, у 2020-м Юрый Раманоўскі праявіў сябе ў справе прэміравання падначаленых за падтрымку палітычных абвінавачванняў.
Кар’ера яго скончылася імкліва. Сябры экс-пракурора нібыта забілі лася, якога ў тых абставінах забіваць было нельга. А Раманоўскі не тое што не завёў на іх крымінальную справу, але і нібыта еў лася разам з імі, што ў выніку стала вядома вышэйшаму начальству ў Мінску.
Па нашай інфармацыі, дасланая праверка заспела Раманоўскага ў стане, які нельга назваць працоўнымі, пасля чаго яго і звольнілі. А праз некалькі месяцаў арыштавалі.
Таксама нашы крыніцы дадаюць, што выкрылася сувязь між Раманоўскім і адным з работнікаў абласнога следства. Дэталі гэтай сувязі нам невядомыя, але цяпер абодва вывучаюць свае справы ў мінскім ізалятары.
Разам з гэтымі двума за кратамі аказаўся начальнік аддзела віцебскай абласной пракуратуры. Суразмоўцы «НН» адзначаюць, начальніка аддзела вінавацяць ў тым, што ён нібыта браў хабары ад жонкі віцебскага чыноўніка і спевака Іллі Смунева, які цяпер абвешчаны ў вышук.
Цікава, што па нашай інфармацыі, Смунеў падтрымліваў цёплыя адносіны з экс-пракурорам Раманоўскім.
У прэс-службе Генеральнай пракуратуры запыт «Нашай Нівы» адносна сапраўдных дэталяў гэтай гісторыі прачыталі, але праігнаравалі. Як толькі мы атрымаем каментар на гэты конт, адразу ж яго апублікуем.
Цяпер чытаюць
Брат беларускай каралевы прыгажосці трапіў у рэанімацыю ў Азербайджане6
Каментары